حكاوي القهاوي (9)
(39)
حن يا للي ملكت الروح وما لكش قلب يحن
يا ترى إيه أخرة قسوة قلب الحكومة على الناس الجالسين قدام مجلس الشورى ومجلس الشعب ومجلس الوزرا وكل المجالس اللي في مصر، دلوقت الموضوع وصل للقلع وبقى الاعتصام بالملابس الداخلية، وشكلهم كده في المرحلة الجاية حيرسلوا تلغرافات يقولوا فيها "يا ترى نقلع الملابس الداخلية ولاّ نتريث".
عموماً أنا بأنصحهم بالتريث، وكل اللي تعبان من هدومه ينضم لهم ويقلع. بس يا ترى إيه آخرتها يا حكومة؟ المعتصمين من يأسهم بقوا يناشدوا السيد الرئيس علشان يتدخل. يا خوفي حد يفكر بكره يروح روكسي علشان يناشده، لأ عند دي وفيه خط أحمر مش لعبة هي، وبعدين هو مش هناك. المفروض تحمدوا ربنا قوي، وكفاية عليكم إن الحكومة سايباكوا تقلعوا. عموما ما تقلقوش أنا واثق إن حكومتنا الرشيدة أكيد في يوم ح ترد وتبطل ترفع شعار "فيكم يا ولاد الـ... طظ".
(40)
ملك الترسو
كل ديكتاتور جديد بيلعب لعبة اسمها "نقطة ومن أول السطر" علشان يعرف ياخد شعبية عند المتخلفين اللي بيحكمهم. واللعبة دي هي أن سيادته يشيل الظلم بتاع الديكتاتور القديم، وطبعا البقر بيصدقوا إن أخيرا ربنا أكرمهم بالديكتاتور العادل ويخرجوا يهتفوا باسمه. بس البقر ما يعرفوش إن أخينا كل اللي بيعمله إنه بيستغفلهم وبيعمل نقطة علشان يكتب هو من أول السطر حدوتة ظلم جديدة هو البطل فيها. الظريف بقى إنه في عصرنا الحديث قرر الديكتاتور اللي لسه ح يجي إنه يكتب ملحمة الظلم على قفا الديكتاتور اللي لسه ما مشي.
يعني صاحبنا يظلم ويفتري براحته ولما البقر يضجّوا من الظلم، حيقوم سيادته يظهر في الصورة ويعمل فيها فريد شوقي في أفلام الترسو بتاعة زمان ويضرب محمود المليجي والعصابة كلها. طبعاً الناس المغفلين أكيد حيصفقوا له ويقولوا هييه يعيش فريد شوقي ملك الترسو. بس المشكلة إن العصابة بتاعة محمود المليجي هي هي الشلة بتاعة فريد شوقي، طب عم فريد يعمل إيه بقى؟ إحتمال يبلّغ عن واحد من العصابة ويخلّيه يشيل القضية؟ زي تجار المخدرات كده لما يبلغوا عن واحد منهم علشان الباقي يشتغل. أو زي الدكاترة لما يضحْوا بالجنين والأم علشان الدكتور يعيش.. المشكلة الكبيرة إن عم فريد شوقي كان فاكر إن الفيلم ح يخلص في ساعتين بس الموضوع فلت من أيد المخرج وماحدش عارف الفيلم الزفت ده ح يخلص أمتى.
(41)
تنظيم نت
وصلني ايميل من ضمن الايميلات اللي بتيجي لي كل يوم وما لهاش أول من آخر، لما قريته قلت يا عيني على التكنولوجيا. الايميل عبارة عن منشور سري، يا سلام يا أولاد المنشورات السرية بقت تتوزع على النت ومن غير تعب أو أي مشاكل وتوصل لكل البشر وفي كل مكان، وحاجة ببلاش كده. المصيبة إن الايميل ده جاي من جماعة اسمها "حركة كلنا مقاومة"، واخدين بالكم من الاسم، دا تنظيم سري بقى. الظريف إنهم كاتبين الايميل بتاعهم علشان يتواصلوا مع الناس، دول مستبْيعين!! مش خايفين لا من أمن دولة ولا من اختراق ولا من أي حاجة؟!! زمان علشان التنظيمم السري يبقى سري، يبقى لازم محدش يعرف عنه حاجة ولو عملوا منشورات يبقى لازم تتوزع زي المخدرات في السر، وفي الآخر يطلع في الجرايد أنه تم إلقاء القبض على مجموعة بتفكر تقلب نظام الحكم.
لما فكرت في الموضة دي ما لقتيش اسم ينفع لها غير "تنظيم نت". بس يا خوفي تنتشر ونلاقي كل كام عيل يتلموا على بعض ويعملوا لنا تنظيم نت جديد. ما هو العيال بتوع القاعدة كل يوم يفتحوا موقع ويقولوا كل التخاريف بتاعتهم، وأمريكا بجلالة قدرها مش عارفة تسد عليهم. طب نروح بعيد ليه ما هو إحنا عندنا موضات كثيرة، مدونات تلاقي وجوربات سياسة تلاقي، كل حاجة متوفرة في الأسواق. بصراحة الله يكون في عون الحكومة وفي عون السادة المسئولين. معنديش حاجه أقولها غير حسبي الله ونعم الوكيل في اللي كان السبب.. واخترع النت طبعاً، الله يلعن النت والنتيتةة واللي بينتتوا عليه.
(42)
حكايتي مع الإنترنت
مع انتشار الانترنت والجروبات المنيلة بنيلة، إتجننت مرة في عقلي وقلت ياواد اشترك في مجموعة من بتوع السياسة بدل ما أنا قاعد كده زي الحمار مش فاهم حاجه. بمجرد ما اشتركت لقيت إيميلات الدنيا جت لي، نصها إعلانات عن أفلام سكس من اللي قلب العازب يحبها، قلت يا بركة دعا الوالدين. بس بعد شوية ركبني الخوف، ما هو أنا شكّاك وباخاف من خيالي. يكون يا واد السي آي إيه هي اللي باعته الافلام دي، يكون فيها "تروجان" علشان يتجسسوا علي دماغي ويعرفوا أنا بأفكر في إيه. ولاّ يكون السي آي إيه هي اللي عاملة الجروبات دي علشان يلمّونا بعد كده ويحطوناا في جوانتاماناموش، ما هو حسب معلوماتي إن جوانتانامو لبتوع القاعدة وجوانتاماناموش للّي زي حالتنا.
عموما الحمد لله أنا بطلت وتبت ومعنديش حاجة أخاف منها لا في الكمبيوتر ولا في دماغي، غيرش هي شوية حكاوي لا تودي ولا تجيب، ولا حتى توقع عصفور من ع الشجر. بس الكدب خيبة أنا عندي شوية أفلام من اللي بعتوها لي، بصراحة قلت فرصة نطلع بحاجة من الجروب تنفع وقت زنقة بدل الكلام اللي مش حيجيب غير البهدلة. هي دي كل حكايتي مع الانترنت من طقطق لسلام عليكم والتروجان يشهد... أنا مخلّيه زي ما هو من ساعة ما وصلني حتى اسألوه.
واقرأ أيضاً:
هيلن كيلر معجزة لن تتكرر / ولمَ لا؟/ حكاوي القهاوي
تعليقات الأعضاء