حكاوي القهاوي (10)
(43)
بيتك بيتك
عندنا في الفلاحين والاحياء الشعبية الستات بتربي الفراخ في العشش، وتيجي الست من دول تخَرّج كل الفراخ علشان ياكلوا بقايا الأكل بتاع البيت. ولما المغرب يأدن الست تقول للفراخ "بيتك بيتك"، الفراخ تفهم على طول إنها لازم تدخل العشة تاني وتسمع الكلام فوراً. مش عارف ليه المعتصمين عندنا في مصر فكروني بالفراخ دول. أول الحكومة ما قالت لهم "بيتك بيتك"، في غمضة عين قاموا ومشيوا وكل واحد دخل بيته. الفرق الوحيد بينهم وبين الفراخ، إن الفراخ بتمشي سوا، إنما أصحابنا مشيوا مش أكتر من خمسة مع بعض. واضح والله أعلم إن ست الدار هي اللي خرجتهم مش هم اللي خرجوا من نفسهم. واضح كمان إن الشمس رجعت تغرب من تاني، ولاّ هي ما طلعتش من أصله يا رجاله.
(44)
الله يخرب بيتك يا أستاذ خليفة
واضح إن المعارضة عندنا في مصر المحروسة ما تزيدش في نسبة الذكاء عني كتير. واضح كمان إن الحكومة مطمئنة جداً لذكاء المعارضة إنه كفيل يوديها في داهية. الدليل على كده إن المعارضة بدل ما تتفرغ لمعارضة الحكومة راحوا يعارضوا نفسهم، وواخدين تفرغ كامل لمعارضة كل اللي يروح أمريكا، قال إيه رفض الإستقواء بالخارج. بالذمة ده أسمه كلام بدل ما تحطوا إيدكم في إيد بعض يا أولاد الأذكياء رايحين تتهموا بعض.
زمان السادات الله يرحمه مطرح ماراح بقى قال إن امريكا في إيدها 99% من خيوط اللعبة. المعارضة زعلت وقتها منه وقالت إزاي يقول كده مش عيب؟!!! الحقيقة أنا مش عارف إيه هو العيب؛ إني أشوف الحقيقة وانكرها ولاّ اشوفها وأتعامل معاها صح. كمان عمنا مبارك أعطانا درس في الدهاء، لما صدام إحتل الكويت والناس لامت عليها إنها طلبت النجدة من أمريكا، ساعتها الرئيس مبارك قال "دا أنا أتحالف مع الشيطان علشان بلدي". حكومتنا الرشيدة نفسها إتحالفت مع الشيطان وبنت له جدار. هو إحنا ليه مش بنتعلم.. مش حاجة تغيظ دي؟!!!.
لو كان الخارج مش ح يسبب أي ضرر أو خوف على الحكومة ما كنتش الحكومة عملت كل اللي تقدر عليه علشان ترجع المصريين الغلابة من الكويت، ولا كانت تجتهد وتتهم كل اللي يروح امريكا بإنه خاين وعميل. خاين وعميل يا حكومة!! طب عيني في عينك كده. كأن الحكومة بتقول "إتكلموا بس مع اللي أعرف أحكمه أو أسجنه". حكومتنا الرشيدة فكرتني بالعيال اللي بتتخانق في الشارع، تلاقي الواد من دول يقول "لو راجل إطلع لي بره"، بس الحكومة بقى بتقول "لو راجل أدخل لي جوه". عموماً أنا قادر أفهم اللي بتعمله الحكومة لكن بصراحة مش قادر أفهم المعارضة، اللي بتعمل للحكومة أكتر من اللي نفسها فيه. علشان كده معنديش حاجة أقولها غير "الله يخرب بيتك يا أستاذ خليفه".
(45)
مبروك الدوري
عندنا في بلدنا فريقين فريق اسمه ظلماوي والتاني أسمه رفضاوي. فريق ظلماوي خطته في المكسب محفوظة، يشتري لاعيبة رفضاوي وبكده ما يلعبوش تاني، واللي يرفض ينباع يبقى كسره هو الحل. الحق ينقال ظلماوي فريق منظم له زي رسمي وجزمة من حديد. أما رفضاوي فعددهم كبير بس كغثاء السيل. كل واحد فيهم لابس فالنة بلون مخالف عن زميله. النفر منهم ينزل الملعب وهاتك جري وعويل ويمين تلاتة بالله العظيم يا الكل يجروا على هواه يا محدش لاعب. اللاعيبة كلهم هجوم، وكل واحد فيهم لازم هو اللي يجيب الجون. رفضاوي بيجروا في الملعب زي المساخيط يا ولداه، أصرخ من حسرتي مش بالكلام يا ولدي ح تكسب...
حرام دا بالتنظيم والانسجام، وبدل ما انتم فريق واحد إعملوا منكم فرق كتير، مش مهم مين فيكم يا ولدي يكسب.. المهم إن ظلماوي آن الآوان إنه لازم يخسر. بس تقول لمين ياخسارة مش فاهمين ولاّ مش عايزين!! الخلاصة يا إخواني رغم إن فريق رفضاوي يزيدوا في الملعب عن الحداشر بميه، ورغم إن فريق ظلماوي في الحقيقة هم الأقلية، أنا بأقولكم للأسف ظلماوي هو اللي راح يكسب.. مش بذكائهم لأ والله بغبائكم يا ولدي. علشان كده وبصفتي مشجع رياضي قديم بأقول لظلماوي مبروك عليكم الدوري من تاني. بس لي عندكم طلب بجملة المصاريف وبعترة فلوس النادي شمالل ويمين إشتروا علشان خاطري سباطة موز، وأعطوا لكل نفر من رفضاوي موزة... يا أكلها يا شالها لوقت عوزة.
(46)
هارد لك
هارد لك يا كابتن، بعد اللعب هناك مع الكبار جاي هنا مع الكسر تلعب. هناك فيه ملعب، أما هنا بالكتير خرابة تنفع للزبالة مقلب. هناك فيه شورت وفانلة وجزمة، أما هنا حفاة عراة ما لهم لزمة. هناك بتلعب.. ممكن تكسب وممكن تخسر، أما هنا يا تخسر يا تخسر. خدها مني نصيحة ياكابتن أنا برضه مش غريب. إحنا محتاجين كوتش.. فاهمني كوتش. يعلمهم يعني إيه كلمة فريق... يعلمهم إزاي يبنوا الفريق.. يعلمهم إن الفريق مش كله مركز، لأ دا فيه بدل المركز مركز ومركز ومراكز، وإنه بدل الفريق لازم يكون عندهم عشرين فريق. يعلمهم إنه من حق كل فريق يكون له لون يحبه.. يعلمهم إزاي اللاعيب يفكر ويخطط وياخد مكان صح في وقت صح علشان فريقه يكسب. وإزاي يجري من غير كورة لأجل زميله يقدر يحرز. أخيراً بأقولك معلش.. هارد لك يا كابتن كان نفسي والله تكسب.
(47)
أنا مش معاهم أنا معاك
بدل ما نفكر يا حبيبتي في المستحيل، تعالي علشان خاطري نفكر في الممكن، بكره ح نبكي على اللي فاتنا وكان ممكن. بتقولي دي بنت قطة.. أنا معاك. وده ابن قطة.. أنا معاك. كل اللي في بالي وبالك ولاد ستين قطة.. أنا والله العظيم معاك. بتقولي كرزاي.. أنا برضه معاك، بس بذمتك قولي لي مين أرحم كرازاي ولاّ خرازاي؟!! علشان خاطري مفيش داعي للرعونة يا حبيبتي والعنترية؛ مش وقتها يا بنت عمي. تعالي نفكر مرة واحدة وخليك ذكية.. مرة واحدة إستخدمي كيد النسا يا ولية، ولما نِخْلَص من قط واحد، بعدها يحلها الحلاّل "يا واش يا واش". يارب تفهميني يا حبيبتي وتعرفي أد إيه بحبك.. بمزاجي وغصب عني وأكتر من المحتمل والممكن بحبك.. بكره ح يدخلوني القبر لأجل إني بحبك، بس أقول لك.. ولا يهمك؛ غصب عنهم يا بنت الذين ح أموت وأنا لسه بحبك.
واقرأ أيضاً:
تعليقات الأعضاء