حكاوي القهاوي (12)
(50)
لعبة بوكر
زمان لو أخسر البوكر ينْعِم عليّ مولانا بالباشوية. دلوقت لو أخسر ينْعِم عليّ بمدينة هدية، وعليها قرض بالدولار كام مليون؛ وفوقهم لمجلس النواب عضوية. طلعت كسبان؛ نزلت كسبان. الله عليك يا بلد طول عمرك وسية، فيك الخسارة مكسب؛ أما السجن حنْيّة.
(51)
عز جمالك
"عز جمالك فين من غير ذليل يهواه" يا سلام يا ست الله؛ كأنك عايشة لسه معانا!! يكونش يا ست ده سبب الذل اللي إحنا عايشين فيه؟!! عايزنّا أذلة يمكن نهوى جماله. أرفع إيدي وأدعي ربنا من غلبي؛ يا رب العن جماله وعز أيامه يا ربي.
(52)
قصة شعار
- "الشرطة في خدمة الشعب" شعار قديم قوي، شوف حاجة تليق بالمرحلة دي يا سيد.
- أحلام سيادتك أوامر يا فندم؛ ممكن نقول "الشرطة في خدمة القانون"
- ماشي يا سيد بس الشعب راح فين؟
- تمام سيادتك يا فندم يبقى نخلّيه "الشرطة والشعب في خدمة القانون"
- مرحلياً زي بعضه، بس أنا عايز حاجه تعبّر عن روح المستقبل.
- يا سلام يا فندم كلك بُعد نظر؛ يبقى لازم الشعار يكون "الشرطة والدستور والشعب في خدمة سيادتك".
- عجباني دماغك يا سيد.
- دماغي مقلمة لأفكار سعادتك؛ دا احنا كلنا أدوات.
(53)
زفة وطار
نصبوا الزفة ودقوا الطار، قوطة للست ولنا الخيار. نام يا مولانا عليك الأمان، صرفوا المشايخ كل الجان. قولوا معايا الله حي.. الله حي.. مجلس بلدنا مالو زي.
(54)
غبي وأغبى منه
الجماعات الإسلامية بسم الله ما شاء الله واخدة شهادة الأيزو في الغباء. إخونّا المسيحيين ما يتخيّروش عنهم؛ بدأوا الغباء بقناة، ودلوقت قال إيه بيضربوا الحديد وهو ساخن. والحكومة لقتها فرصة لكارت الطوارئ تلمّعه. لكن بالأساس يا صاحبي؛ إنْ الحكومة لما تحب تلهينا تجيب اللي فيها فينا، وسلم لي على الإرهاب.
(55)
طبيخ بيتي
أنا أعرف قنبلة ذكية تمشي لوحدها، وأيشي ينفجر بالريموت كنترول، ممكن كمان أصدق إنْ قنبلة على رنة موبايل تنفجر، يعني الراجل يكون في قندهار يرن على موبايل في قندعار، وفجرني شكراً على أحلى نغمة أطبطب... أدلع. إنما عندنا بنحب الطبيخ البيتي، وقنابلنا برضه يا عم بيتي؛ يعني قنابل بالفتة والمسامير. نحمد الرب إنْ قنابلنا لسه بيتي، وربنا يديمها علينا نعمة ويحفظها من الزوال.
(56)
مطلوب على وجه السرعة
إذا كانت قنبلة قدام بيت ربنا حيغور فيها محافظ ولاَ وزير. يا أخوانا شوفوا لنا عنوان يمكن اللي في بالي يطير.
(57)
مجرد سؤال
كل ما الكيل يفيض ونقول خلاص جه الخلاص... حيتوب علينا ربنا والحكومة تغور عننا، تحصل مصيبة تلمنا. نركع ونسجد.. ندعي في عمرها يطوّل لنا. نسّونا بماتش الجزاير كل اللي انعمل وراح فينا ينعمل، وحلفنا برأس أبونا وباللّي ماتوا وفاتونا؛ ما هم ماشيين؛ وعلى قلوبنا ليفضلوا قاعدين. القنبلة آخر مصيبة يا صاحبي طبت علينا كلنا، ورفعنا الأيادي ربنا يطوّل عمرها لأجل كمان وكمان ما تذلنا. بس السؤال هو ربنا بيحب الحكومة؟!! ولا غضبان علينا وإحنا اللي نستاهل ذلنا؟
(58)
ساحل النعاج
وقد صرح سيادته قائلاً "اللي حصل في الجزائر وتونس لا ممكن يا بقر يحصل أبداً عندنا". وسيادته طبعا يقصد إننا لا سمح الله مش حنقول لأ زي ما قالوا، ولا عمرنا حنخرج زي ما خرجوا ولا ممكن أبداً حنولع في نفسنا زي ما عملوها التوانسه. وقد نسي سيادته التنويه أيضاً إلى أن سيادته مش زي ساحل العاج. معاك حق سيادتك؛ وربنا يديم المعروف سيادتك؛ ومبروك عليك شعبك المهاود المُستأنس ابن الكلب سيادتك. ما هو أصل سيادتك الشعوب زي المعادن أنواع. في الجزائر شعب رافض الحرامي سيادتك. وفي تونس شعب الحرق والقتل بكرامة أهون عليه من عيشة الظالم سيادتك. وفي ساحل العاج شعب حر رافع سلاحه حالف ليسقط المستبد سيادتك. وعندك ساحل النعاج سيادتك، شعبها ما يهش ولا ينش ويقدس بوس النعل سيادتك. كلمة أخيرة بعد إذن سيادتك؛ ملعون أبو النعاج على أبو ساحلهم سيادتك.
(59)
مش حيموت
الأسطى طلعت مات!! الكل لابس أسود.. عويل وبكاء. قالوا لي قُوم فز واجب برضه العزاء. قلت زغرودة يا خلق كفاية غباء. هجموا عليّ ولاد الكلب من كل نحو وصوب. يا باشا أنا قصدي إنْ الجنة مثواه، لطشني لطشة ابن الذين وقال قديمة.. جنة إيه يا ابن الحمار، دا احنا وانت واثقين إن مثواه النار. مَيّل عليّ وقال راجل من البكا محروق؛ افرح ما تفرح.. أرقص ولاّ ما ترقصش.. سلوْ بلدنا يا ابني، اللي يخلف ما بيموتش.
ويتبع:>>>>>>>>>>>>:: حكاوي القهاوي (14)
واقرأ أيضاً:
هيلن كيلر معجزة لن تتكرر / ولمَ لا؟/ حكاوي القهاوي
تعليقات الأعضاء