أنا قربت أتجنن ومش عارف إيه اللي عمال بيجرى في دماغي
السلام عليكم ورحمة الله وبركاته إخواني أنا آسف لأني هاطول عليكم بس الموضوع تاعبني أنا من خمس أو ست شهور جالي شيء زي وسواس قهري حاد, مع العلم أن أبويا وأمي عندهم وسواس قهري المهم أنا نفسي أبقى إنسان مهم لكن أمي وكل الناس اللي حواليا بيتريقوا علي زائد إنهم بيعظموا من أي حد يعمل أي حاجة حتى لو كانت تافهة, ولو في المجال اللي أنا عايزه وبيتريقوا علي طبعاً السؤال هو فين أبوك أبويا الحمد لله ربنا يطول في عمره عايش لكنه مسافر وهو الوحيد اللي بيشجعني
المهم ركزت في اللي أنا عايزه اللي هما الموسيقى والمنطق وكنت ممتاز في المنطق وتحليل معاني الكلام وسبب تسمية الأشياء وتفسير دوافع الناس حتى أن أساتذة المنطق والفلسفة قالولي أني سابق سني وده بسطني, أما في الموسيقى أنا ما كنتش بعرف أعزف لكني درست النوتة كويس وبقيت أسمع الصوت اللي في دماغي وأدونه وكانت بتطلع جميلة أوي, وأنا مش بقول كده علشان أنا اللي عملها لكن هي دي كانت الحقيقية.
المهم جالي اكتئاب ٣ مرات السنة اللي فاتت ومرتين السنة دي وجالى السنة اللي فاتت أرق وبعد كده جالي نوع غريب من الأفكار أن زمايلي بيسمعوا أفكاري ويضحكوا عليها وبعد كده اقتنعت أن الكلام ده مش حقيقي, وبعد كده جالي في دماغي إحساس غريب إني لو بصيت لحد مهما كان ناجح أو فاشل إني هأسحب أسوأ ما عنده وأديله أحسن ما عندي, وبعد كده كنت بردد عبارات كتيرة في دماغي لمدة تلات مرات أنا هاسترجعها منه فأحس أني استرجعت موهبتي الموسيقية مثلاً منه
المهم بقى في حتة الإحساس دي كنت بحس بحاجة زي الهالة في دماغي لما بتبقى عندي ببقى أذكى مما يتصور أحد ويبقى واسع الخيال, لأني كنت بكتب قصص بوليسية على أفكار حلوة وجديدة من عشرة لعشرين صفحة, المهم ولما تروح أحس بالغباء وهي دي الحاجة اللي كانت بتروح وتيجى, لما كنت ببص لحد عايش حياة فاشلة أو من الناس اللي بتتريق علي, المهم كنت ماشي في يوم من الأيام وبعد كده كنت بألف مقطوعة في دماغي فلقيت عيل صغير هو مش صغير أوي بالنسبة أنا في تانية وهو يجي في سادسة ابتدائي المهم سمعته بيصفر مش عارف إيه فجأة اللي حاسيتوا في دماغي إحساس إنها قفلت ومش عارفة تفكر, وإن موهبة الموسيقى راحت للولد ده المهم علشان أكذب نفسي حاولت أخلص المقطوعة مافيش العجيب إني لما بتخيل أني استرجعت منه بحس بالحالة دي تاني حوالين دماغي من برة ومن جوة وأبقى تمام, فضلت على كده ستة شهور لحد ماجه يوم لقيت واحد صاحبي هو طيب بس حكالي إن واحد تاني شتم علي وقال إني فاشل وحاجات كتير
المهم نمت وصحيت الصبح مش حاسس بالحالة دي ومقتنع إن كل حاجة في دماغي راحت عنده مع العلم أنه بيشاركني في هواياتي وكده هيقول إنه كان على حق وأنا فعلاً فاشل وأمي هتقول علي إني فاشل والناس دي كلها هيبقى عندها الحق المهم إن الوسواس أو الخوف الزايد راح, ولكن لسة في حاجة من بواقي الهالة دي بتتحرك في دماغي والغريب إن لو حد هرش في دماغه أو لمس نفسه في أي حتة في جسمه وخاصة في عقله بحس بالهالة دي بتلمس نفس الحتة اللي لمسها عنده, بس في جسمي أنا غير إني لو تخيلت مثلا شكل مثلث أحس بهالة على شكل مثلث بتتحرك في دماغي وأحياناً في جسمي, المهم أنها مش ثابتة في جسمي عمالة تطلع وتدخل من دماغي حسب تخيلي ليها أو لوحدها.
يعني أحياناً أتخيل أني طلعتها من جزء من دماغي إحساس أنها بتطلع منه وأحياناً أحس أنها بتتحرك في دماغي من غير سبب والنهائي إني بقيت عنيف وعصبي كل الأعراض دي فضلت تحصلي لمدة ستة شهور, ولسة التحول ده بتاع صاحبي اللي شتمني من يومين والمشكلة المرتدة إني حاسس إنها راحت ومش عارف أرجعها وبقت ذاكرتى ضعيفة جداً جداً جداً وبقيت أحس من ساعة لما بقتش عارف أرجعها إن دماغى فاضية, بمعنى إني حاسس بفراغ جو جمجمتي وأحيانا أحس إن مفيش فراغ, بس استيعابي للأمور ضعف وبقيت بلخبط كتير في الكلام أو أقف في حروف وأبدلها مع بعض غير أن مواهبي في تدوين الموسيقى والتخيل راحت وكان بيجيلي أفكار انتحارية بس دلوقتي هديت شوية.
أنا مش عارف الكلام اللي بيحصل ده حقيقي تبع قانون الجذب المشهور لأني فقدت بالهالة خالص لما قلت إني هأتمنى أنها تختفي وصحيت من النوم لقيتها مش عندي وأول حاجة سمعتها في دماغي أنها راحت لصاحبي اللي شتمني, الغريب جداً جداً جداً جداً جداً واللي مش هيصدقه حد اليوم اللي صحيت مش حاسس بيها لاقيته أعز صحابي بيحكيلي عنها جاتله لما صحي الصبح في نفس اليوم, بس هي راحت من عنده الغريب نفس الأعراض نفس كل حاجة لأني كنت بحكيله عنها ومكانش مصدق أنا مش عارف هو كان حصله كده علشان الموضوع كان دخل دماغه اللاوعي فمشي بعدها بيوم الحمد لله هو دلوقت راحت من عنده بعدها بيوم بالضبط الحمد لله يارب راحت من عنده أنا مش عايز حد يحس بيها أو يجربها لأنها بتعذب الواحد في النهاية أحب أذكر أن أخويا الوسطاني كان شكالي مرة أنه بيحس إن الناس بتقرأ أفكاره وتضحك عليها.
المهم إني الفترة الأخيرة دي بحس إن دماغي بتنمل كتير وفى نمل بيمشي في دماغي والتنميل في الدماغ كلها مع وخز وحرقان بعد كده الفص الشمال بقى كله بينمل وبعد كده ماحصلش تنميل تاني جسمي بس اللي بينمل حاجة أخيرة وأنا آسف جداً على الإطالة أنا لما بتيجي في دماغي فكرة إن الموهبة في شيء راحت بحس إنها مش موجودة في دماغي ومهما عملت مابعرفش أشتغل بفاعليتها لكني ماكنتش أعرف حاجة عن الموسيقى وبحس إني سبت كل اهتمامات وضعف في الإرادة أنا كنت عنيد أوي دلوقت مش عايز أعمل حاجة وشخصيتي عمالة تتغير وميال للإجرام وذاكرتي بقيت ضعيفة جداً جداً جداً حتى فالأحداث اللي حاصلة من لحظة وبقيت أحس بالغباء ووقوف العقل بسرعة, ولي معتقدات غريبة زي أني نايم ومن عالم تاني وهصحى من النوم وأنا مش حقيقي وأنا عشت كذا مرة عشت قبل كده بس أحياناً أسخفها وأحياناً أقتنع بيها,
وأنا أقسم بالله آسف جداً جداً جداً جداً جداً جداً جداً على إزعاج وتضييع وقت حضراتكم بس أرجوكم تساعدوني
وشكراً لحضراتكم
23/12/2016
رد المستشار
السلام عليكم
للسائل الكريم نقول إن عمليتي التفكير والإدراك عند الإنسان من اعقد العمليات الوظيفية في الكون، وهي أعقد بكثير من العمليات الوظيفية الأخرى كالهضم مثلاً، وهي كغيرها من العمليات الحيوية قد يعتريها الخلل والإفراط أو التفريط، ومن ظواهر هذه الخلل إلحاح بعض الأفكار غير المنطقية على ذهن الإنسان رغم عدم صمودها أمام التحليل والنقد المنطقي.
وأحيانا يكون الإنسان مدركا لطبيعة هذه الأفكار غير المنطقية ويحاول أن يقاومها ولكنه يجد صعوبة في ذلك، وهذا ما يسمى الوسواس Obsession، وفي أحيان أخرى يستسلم الإنسان لهذه الأفكار غير المنطقية ويؤمن بها، وهنا تتحول إلى ما يسمى بالوهامات أو الضلالات Delusions، وقد يصحب تلك الوهامات بعض الإدراكات غير السليمة، كأن يرى الإنسان أشياء أو يسمعها أو يحسها وهي غير حقيقة وهذه تسمى الهلاوس Hallucinations، وبذلك يكون الاضطراب الذي يصيب هذا الإنسان هو ما يسمى بالاضطراب الذهاني Psychotic Disorder.
ومن الأفكار الشهيرة في الاضطرابات الذهانية فكرة سحب الأفكار Thought Withdrawal أو زرعها Thought Implantation أو إذاعتها Thought Broadcasting، وهي مجموعة من الضلالات تجعل الإنسان يحس بأنه ليس له سيطرة كاملة على أفكاره Delusions of Control، وأنه بإمكان الآخرين زرع الأفكار في ذهنه أو سحبها أو الاستيلاء عليها، وكذلك القدرات والمواهب، وهذا قريب جداً مما يحدث لك، وبالتالي فإننا نخشى أن ما يصيبك قد بدأ يدخل تحت تعريف الذهان، ويجب أن نعلم أن هذه الاضطرابات تكون ناتجة عن اختلال بالتوازن الكيميائي بالمخ، وبالتالي فإن من الوارد جداً أن يحتاج المريض لعلاج دوائي يعيد هذا التوازن المفقود، وبالجملة فإن المسألة جدية وخطيرة وتستلزم اللجوء لمتخصص بالطب النفسي في أسرع وقت ممكن للبدء في العلاج الدوائي والنفسي المناسب لحالتك، والله المستعان
ولمعرفة المزيد حول الاضطرابات الذهانية، يمكنك مطالعة الروابط التالية:
بث الأفكار أو إذاعة الأفكار عرض ذهاني!
وهامات منظمة
مرض الفصام
الوهامات والهلاوس والوساوس والقهورات
وسواس يعذب أختي: وساوس أم هلاوس؟