الموت في ثوب الحياة م
الاكتئاب والقلق
السلام عليكم يا أستاذ وائل أبو هندي أولاً أنا أهنئ حضراتكم بحلول شهر رمضان الكريم وبشكركم على جهودكم
ثانياً أنا أرسلت هذه المشكلة مرتين وهذه الثالثة وفي الحقيقة لم أستجب للردود بمعنى أنني لما أستفد منها
أنا حالتي دلوقت بقت شبه مدمرة أو فعلاً مدمرة واللي تاعبني أكثر لا يوجد أحد من أهلي أو أصدقائي مقتنع بأني مريض نفسي بالاكتئاب بالرغم من أنني مرح وأعشق الضحك ولكن الحمد لله على كل شيء
ومن الجانب الآخر تقريبا فيه وسواس قهري أحس أن لما أجي مثلا أتوضأ للصلاة نفسي تقول لي أنت مغسلتش مثلا يدك جيدا أو ما أكملت الثلاث مرات لكي أعيد الوضوء من جديد ممكن أذهب لأطفي نار البوتاجاز وأشعر بأنني تركته مفتوحا يسرب الغاز وأنا أحب التنمية البشرية جدا جدا وأعشق الدكتور إبراهيم الفقي رحمه الله وأقرأ كتبه ولكن اكتئابي يسيطر علي ويجعلني غير قادر على الاستجابة أو الاستفادة ونفسي أكون خبير نفسي نفسي أتعلم نظريات علم النفس فأرجو منك يا دكتور بأن تكتب لي علاج دوائي بالعقاقير
أنا بقيت على طول بهم وغم وحزن ولو حد قال لي بعد أسبوع عندنا فرح أو مشوار سفر أو حاجة أو مناسبة أكون طول الأسبوع متضايق ومخنوق لحد ما يعدي معاد هذه المناسبة مثلا وبقلق جدا إلى فوق ما تتوقع من أي حاجة وفي أي حاجة وعلى أي حد
أنا على طول أشعر بحزن وضيق وهموم وذنب كبير بس مش عارف ليه يعني بشعر بالذنب من أقل الأشياء حتى لو شفت واحد فقير أو مريض وعلى طول بحس بالاكتئاب, لو أني نويت أني أعمل حاجات أو أجيب حاجة أو أروح في مكان بكون فرحان وعادةً ما أحس أني قربت أعملها أو أروح أو مستني حاجات أو فرصة من فترة وتقرب تيجي, أقول طب الحاجة دي لو حصلت إيه يعني أنت ليه فرحان كده هتعمل أيه يعني بها, وأنت تفرح ليه وأُصاب بكمية من الإحباط
والذنب بحس بيه كبير جدا رغم أني لا أرتكب شيء وطيب جداً وغلبان وذكي جدا
وفي أوقات بحس فيها أني عايز أكون لوحدي فيها وأقعد لوحدي وعلى طول أحب العزلة, ولو سافرت مثلا باجي لو هسافر ثاني وأتضايق وأفتكر كل الذي حصل السفرية الأولى وأقول ياه سيحصل زي ما حصل سواء كان حلو أو وحش وبتعقد على طول منها ولما أشتغل في أي وظيفة بتعقد منها بعديها بـ3 أيام على طول وأسيب أي شغلانة بتجيلي اكتئاب وأتعقد وأسيبها ودا مأثر على نفسيتي جامد وبحس أني مش هأعرف أعمل أي حاجة صعبة, وحاسس إني معنديش شخصية,
وخائف في المستقبل من حاجات كثيرة مثلا, وفاة شخص عزيز عليّ أو حد عزيز عليّ يمرض ولا حاجة وعلى طول قلقان من كل حاجة أقول أحسن يحصل كده ولا كده, لدرجة أني بقيت أدعي على نفسي بالموت وتركيزي وفهمي قلوا قوي وضعفوا حتى ذاكرتي.
والمؤثر الثاني عليّ فيه نسبة أني مريض وأنا زعلان على نفسي كل ما أفتكر أن سني صغير ومريض أزعل وأني مش هقدر أواجه الحياة وأكره أروح أماكن التسوق وكده وأكره أي مناسبة مهما كانت حتى لو كانت مناسبة شخصية لي وحاجة كويسة لي
حاسس من كثرة ما أني طيب جدا أن شخصيتي بقت ضعيفة بالرغم من أني محبوب من الجميع وأكره الحزن وبحب الضحك جدا بس حزين على طول مش عارف ليه بالرغم من أني الحمد لله مفيش مشاكل بيني وبين أهلي والمفروض في الحقيقة أني أكون سعيد وكمان أصحابي بدؤوا يبعدوا عني لأني مش بحب أروح في أماكن كثيرة أقول لأ بلاش وكده
وعدم اقتناع أهلي بحالتي تزودني أكثر رغم أني بحب الكتب والثقافة جدا
والاكتئاب كان ليه تأثير على ديني كنت متدين دلوقت الاكتئاب منعني من الصلاة أستغفر الله العظيم مش عارف مالي لأني 18 سنة وبصراحة مدمر والذي دمرني أكثر مفيش حد من أهلي مقتنع أني مريض نفسيا هذا يزود حالتي أكثر وأكثر
فياريت حل يفيدني وياريت لو فيه علاج بالدواء أو أي علاج مهما كان لأني بقيت من كثرة أني مش قادر بدعي على نفسي بالموت وأنا لما أرسل استشارتي مش بعرف هي بيتم الرد علي فين فياريت تجيلي رسالة على البريد الاكتروني بالرد
وياريت لو في أقرب وقت لأن حالتي صعبة ومش قادر فأرجو منك يا سيادة المستشار أن تكتب لي علاج بالعقاقير الدوائية لأن حالتي دخلت في الاكتئاب تقريبا الحاد مينفعش فيها علاج سلوكي ولم أستطيع الذهاب إلى طبيب نفسي لسببين أن لا أحد مقتنع بكلامي وبحالتي والآخر أنني لم أستطيع تحمل تكلفة الطبيب بالعلاج أنا خلاص أتمنى الموت وأخذت 6 أنواع من البرشام الخاطئ لأني زهقت ويئست من كل حاجة ومعنديش حتى أمل أني لو أخذت علاج هتعالج زهقت وبدعي على نفسي بالموت ياريت تكتب لي برنامج علاجي متكامل من العقاقير الدوائية رخيصة الثمن وأرجو أن ترسل لي الرد على الاستشارة على الايميل الخاص بي في أقرب وقت لأنني حاسس بأن خلاص نهايتي قربت ومش قااادر أستحمل أني أصبر ثانية
فأرسلوا لي الرد على الايميل لأنني لم أتمكن من أن أرى الرد لعدم معرفتي الكافية بالموقع
وشكرا جزيلا
13/6/2017
رد المستشار
اسمك "أشرف سليمان"، ولا "محمد صلاح"؟، وقرأت ردودنا السابقة ومستفدتش بيها، ولا مش لاقيها ولا عارف توصلها وعاوز الرد على إيميلك؟؟، ومش هتقدر تروح لدكتور عشان تكاليفه، ولا بتأخذ 6 أنواع دواء غلط؟؟، تضحك كثيرا جدا ولا حزين أوي من جواك؟
على فكرة.... تأرجح مشاعرك دي بتقول أنك محتاج تأخذ موقف واضح وجاد مع عائلتك على شان تروح لدكتور يساعدك صح؛ أن ممكن هنا حد يكتب لك على أدوية للاكتئاب والقلق اللي واضحين جدا عندك، لكن لما تقعد مع الدكتور ممكن يطلعوا مجرد عرض لاضطراب ثاني خالص مش هيعرفه إلا لما يقعد معاك؛ فمشكلتك اللي بعتها قبل كده اسمها "الموت في ثوب الحياة"، لو حابب تقرأها، ولو حابب تستفيد بجد خنصر من مصروفك وروح لدكتور يساعدك حتى لو من وراء أهلك وبعدها تروح تحط الروشتة أمامهم عشان يعرفوا أنك محتاااااااااج علاج، وأعملهم مناحة لحد ما تروح، ده لو عاوز تتخلص من اللي أنت فيه، ولو د. وائل أبو هندي حابب يكتب لك على أدوية تساعدك فسوف أسيب الموضوع ده لرؤيته.... خلي بالك من نفسك.