عندي أكثر من مشكلة آخرهم حد قال لي أنت مجنون
يمكن دي أول مرة أنا ممكن أحكي فيها مشكلة بتفاصيلها أو جزء من حياتي الشخصية للعامة ودا بطبيعتي أنا مبحبش حد برا أهلي يعرف حاجة عني بس أنا مطمئن هنا أني ممكن ألاقي حل لحكايتي اللي سأعرضها عليكم دلوقت
أنا مهندس لسه متخرج متخصص في مجال الحاسبات تحديدا أمن المعلومات دي طبيعتي .. شغلتي .. أن محدش يوصل لأسراري .. أو مش بسهولة أقولها لحد ممكن تقولوا أن كدا أعطي أهمية لنفسي .. لكن دي مش المشكلة .. المشكلة في اللي بعيشه في حياتي أنا تقريبا حياتي شبه وحيد .. بحب أفضل منعزل عن الناس محدش فاهم تفكيري مش عايش تفاصيلي .. سواء برا البيت أو جوا البيت
أغلب علاقاتي العاطفية تقريبا متدمرة من بداية مراهقتي وإلى الآن اعذروني في مشكلتي الأولى أني لازم أحط دباجة قبل ما أدخل في الموضوع ودي لوحدها مش عارف لها حل
الموضوع باختصار بدأ معي في يوم كنت في قعدة لشيخ من اللي يعرفوا ربنا ويمكن أنا شهدت له على أكثر من حادث حصل وأقصد هنا شيخ من اللي يفكوا الأعمال
ودا تقريبا كانت أول مرة أقابله فيها إلا أنه قال لي بالنص "أنت عندك جنان نفسي" يمكن في البداية محطتش في دماغي اللي حصل دا لكن بعد ما بدأت أفكر لاقيت أن فعلا كان عنده حق وخصوصا بعد ما بدأت أراقب تصرفاتي أو اللي الناس بدأت تلاحظه علي بعدها
أنا طول الوقت بكلم نفسي .. عايش في أحلام اليقظة .. بفضل عايش في خيالي أني أنا النجم وأن مفيش حد زيي .. أحاول أهرب من الموضوع دا بالمشي الكثير أنا أمشي حوالي ساعتين كل يوم لأكثر من 4 كيلو متر رايح جاي عايش فيهم مع خيالي والهاند فري في وداني لأكثر من حوالي 7 سنين
أغلب أوقاتي بحس أن ماليش لازمة في أي مكان أروحه لأن أغلب الوقت الناس تبقى شيفاني ساكت .. الأسود اللي بقى طول الوقت لوني المفضل في كل حاجة بكره الضحك والهزار اللي ممكن يخليني في لحظة موضع سخرية خصوصا أن أغلب الوقت يظهر علي الغرور ودا أغلب الناس شيفاني به مع أنه أنا مش شايف نفسي كدا "أحيانا"
مبعرفش أرد في أغلب النقاشات والمجادلات ولو خسرت أو اتحطيت في موضع سخرية بكون في حالة غضب وبشتم بألفاظ تجرح مشاعر اللي قدامي قبل ما تكون بذيئة وبتأذي أقرب الأشخاص ليا "أبويا أمي أخواتي وأحيانا أصحاب المقربين اللي خسرتهم فعلا" ضعيف .. بحس بضعفي أغلب الوقت .. كاره نفسي .. شكلي .. شخصيتي .. أخسر قبل ما بكسب
أنا تعبت من حاجات كثيرة كنت ناسيها أو فاكر أني نسيتها بس مع أول موقف ألاقي نفسي أفتكر موقف قديم حصل كأني عايش في زمن يتكرر أو بقت حياتي ضيقة أوي علي لدرجة أنه مفيش جديد بقيت بحس أن الوقت مبيعديش
- أنا أبويا وأمي انفصلوا انفصال مؤقت مكانش بطلاق لفترة صعبة في حياتي وكان قبلها خناقات وفضايح كثيرة "ومش قصدي بفضايح هنا حاجة عيب" بس هما دلوقت الحمد لله مع بعض
- أنا عشت في مراهقتي أول قصة حب وأنا مبعرفش أتكلم مع بنت مع أن البنت اللي حبتها كانت في نفس الفصل ومقدرتش أقول لها لأني كنت ولد ملتزم وناجح
- انكسر قلبي مع أول فضيحة حصلت لي جوا الفصل بسبب واحد ارتبطت بيه لما خلاّ صاحبه يجر معي في الكلام لحد ما عرف أني بحبها وفضحني في الفصل كله
- اليوم اللي حاولت أني أتكلم فيه أمامها جه واحد وجادلني بالكلام ومعرفتش أرد عليه غير أني في الآخر بقيت زيه وقررت أني أشتم وزي ما تقول بالبلدي اتحفل علي
- حكاية مراهقتي دي استمرت معي من إعدادي لحد أولى ثانوي قبل ما ألاقي حياتي على النت وأحاول أكلم بنات أون لاين بدافع الحب أولاً ومرة منهم انقلب الحب لكلام جنسي
- أدمنت المواقع الإباحية بشكل مبالغ فيه وإلى الآن
- مفيش حاجة بعملها وألاقي أعصابي فلتت مني إلا لما ألاقي نفسي بأذي .. ومش لازم أؤذي جسدي لأني متأكد أني مش قادر أعمل كدا أؤذي بكلامي
- أنا جوايا تعب كثير .. ولوحدي .. مفيش حد قريب مني .. مفيش حد فاهمني .. نفس المشاكل ويمكن وقعت نفسي في مشاكل أكبر وحصلت بس أنا مش عارف أنا ليه بعمل كدا
أنا تعبت وتكلمت كثيرا وفضحت نفسي بس وارد يكون كلامي حتى لو فيه خسارة لأسراري بس يكون علاج لي
أنا طولت وكان فيه حاجات نفسي أقولها أكثر وأنا رغاي وبدخل في تفاصيل وبخرج من تفاصيل آسف للإطالة ويا ريت بجد ألاقي حل .. ولو فعلا طلعت حالة محتاجة لعلاج يا ريت لو أعرف
"بس مش هينفع في الوقت الحالي نهاااااااائي"
هو ينفع متأسفش ؟! أنا طول الوقت بتأسف حتى لو مكانش عذري .. بس دا مبيحصلش غير مع الغريب عني بس !!
يا ريت تجاوبوني لو سمحت
21/8/2017
رد المستشار
شكراً على استعمالك الموقع.
الملاحظة الأولى بعد قراءة استشارتك هو تشتت أفكارك وضعف تعبيرك العاطفي والفكري لمشاكلك خاصة وأنت خريج جامعي في طريقه إلى العمل. الاستشارة بحد ذاتها تعكس اضطرابك في التعامل مع الآخرين وتقييمك لماضيك وهروبك المتكرر من مواجهة تحديات الحياة.
ليست هناك بداية واضحة لظهور الأعراض وحصول تغيير في السلوك وليس من الصواب الحكم عليك بأنك مصاب باضطراب الشخصية. تتحدث عن قصة حب بكلمتين لا أكثر وعلاقات عبر الإنترنت بدافع الحب في إطار مرتبك يعكس اضطراب التفكير. لا تتحدث بوضوح عن مراحل الانتقال في التعليم وتأثيرها على تعاملك مع الآخرين.
ولكن ما يثير الريبة في استشارتك هو الإشارات الزورانية حول تعاملك مع الماضي والحاضر. تتحدث عن اللون الأسود الاكتئابي وهروبك من الواقع إلى الخيال وليس من الإنصاف القول بأنك لم تنضج عاطفيا واجتماعيا وفكريا. الإنصاف هو أنك تعاني من اضطراب نفسي جسيم وعليك أن تتوجه للحديث مع استشاري في الطب النفسي.
وفقك الله.