انطواء، خجل، خوف، شخصية ضعيفة، عدم القدرة على الحديث
السلام عليكم ورحمة الله وبركاته .
الحقيقة أنا مش عارف أحدد بالضبط مشكلتي انطواء ولا خجل ولا خوف ولا شخصية ضعيفة ولا عدم القدرة على الحديث ولا إيه بالضبط، أنا مولود في أسرة متوسطة أو أحسن من متوسطة وأبي طول عمره شخصية منطوية وأمي كمان منطوية ممكن أقل من أبي بس طريقة حياته هي إللي بتجبرها إنها متخطلتش بالناس كتير وأنا كمان من وأنا طفل صغير أبويا كان بيمنعني إني أنزل ألعب في الشارع والكلام ده نهائي، أصحابي قليلين جدا مفيش غير صحاب المدرسة وفي وقت المدرسة بس وقتها كنت خجول جدا مبتكلمش مع حد غير كام واحد من صحابي وقرايبي لما أشوفهم كل فين وفين بس أنا طول عمري بحب الناس وبحب الخروج والهزار بس مكنش قدامي فرصة لكده لحد ما جت أختي وأنا عندي تقريبا ١٠ سنين أختي عندها نفس مشاكلي تقريبا وأكتر شوية عشان هي بنت فبقيت مش بقعد مع حد غيرها والكام صاحب إللي عندي
وبعدين لما كان عندي ١٣ سنة مبقتش بتكسف أكلم مع حد لكن فضلت مشكلة واحدة إني بقيت بتكسف أتكلم مع البنات ومفيش أي علاقات معاهم مع أني كان نفسي أكون علاقات كتير زي أي حد في السن ده وكنت مهتم بشكلي جدا عشان كنت فاكر إن ده إللي هيخليهم يحبوني لكن طبعا من غير فائدة دخلت الثانوية العامة وشخصيتي اختلفت تماما وأنا بقيت بحاول أكون صايع وتقريبا نجحت وبهدلت أعلى معاي في الأيام دي لأنهم كانوا لسه برضه مش عايزين ينزلوني من البيت غير المدرسة والدروس فبقيت بزوغ من المدرسة لكن كنت مهتم أروح الدروس ولما عرف إني بزوغ بقيت بنزل من البيت مرة بالخناق ومرة بتسحب وأجري وابتديت أشرب سجائر وبعدين حشيش وبعدين خمرة وكنت طول النهار،
تقريبا في الشارع مع صحابي إللي كانوا كتير وقتها منهم واحد عنده فرن بلدي وده كان أنتيمي وكان فاضل عندي مشكلة واحدة إني مش عارف أروح أتعرف علي بنت إنما وكان ممكن واحد صاحبي يعرفني علي بنت بس ببقى وأقعد مكسوف جدا ومش بتكلم ولما دخلت الكلية كنت بعمل كل حاجة بس مش معايا فلوس عشان أبويا مش موافق أبدا إني أشتغل وكان قدامي شغلانة الفرن اشتغلت كام يوم لحد ما عرف إني بنزل ٦ الصبح وأكيد مش بروح الكلية ومبقتش عارف أروح الشغل تاني وبالنسبة لعلاقتي بالجنس التاني بقيت بعرف أهزر وأضحك وكانوا صحابي إنما مكنش في قصة حب ولا خطوبة رغم أن ليا صحاب خطبوا في الكلية وبقيت تقريبا مش بتكسف خالص ولا من راجل ولا بنت وطول اليوم في الشارع لحد ما خلصت كلية رحت اشتغلت في الفرن وحبيت بنت هناك بس مكنش ينفع أبدا أرتبط بها وكل علاقاتي بأي بنت اتقطعت ومفيش غير دي وكان شغل متعب جدا ومكسبه قليل
وحصل لي حادثة إن ناس عرب كانوا فاكرني من طرف واحد بيعاكس مرات العرباوي ده وأنا أصلا ولا أعرفهم ورفعوا عليّ طبنجة وأنا ساعتها مكنتش خايف أنا اتضربت واتثبت وكنت هموت واتلحقت في آخر لحظة وبعد ما الموضوع خاص خالص بدأت أعيط وده طبع في من زمان بعد أي خناقة سواء ضربت أو اتضربت بعد ما الموضوع يخلص بعيط وما حدش حد يشوفني وأنا بعيط لحد ما في يوم وأنا راجع من الشغل خبطتني عربية واتعورت في دماغي ورحت المستشفي وكنت خايف جدا من منظر الدم إللي نازل في دماغي وبرضه عيطت بعد ما سابوني نايم ومحدش شايفني لحد ما أمي جت وبعدها أبويا والجرح اتخبط وطلعت يوميها بالليل كان سني ٢٢ سنة ومن ساعتها مرحتش الشغل تاني وأبويا بقى بيديني فلوس ومعاملته اتغيرت للأحسن كتير وصاحبي أنتيمي كل ما يشوفني يقول لي إيه مش ناوي ترجع الشغل فاتخنقت منه وقاطعته خالص هو وكل أصحابنا ومش برد على تليفوناته
وفضلت مقضيها مش بعمل حاجة غير ألعب جميز وأقعد على النت وأتفرج علي أفلام إباحية بس من بعد العملية بطلت كل أنواع المخدرات حتى البرشام إللي بدأت أسرية وأنا في الفرن وبعد سنة اشتغلت في سايبر جنب البيت واتعرفت على شلة جديدة وبعد سنة كمان رجعت تاني أشرب حشيش ومش عارف أبطل لحد دلوقتي وبشرب خمرة كل فين وفين وفضلت في السيبر بتعامل مع الناس عادي بس كل الناس بتقولي إنت هادي كده ليه بس.
أنا دلوقتي عندي ٢٧ سنة ولسه زي ما أنا ما اتعرفتش غير على بنت واحدة ومطولتش معاها وسبتها بس اكتشفت أن أنا مش بتكسف أقول بحبك ولا حاجة ودلوقتي السيبر فقل بقاله سنة ونصف وأنا عاطل اشتغلت شغلانة كدة واتخانقت مع صاحب المكان عشان طريقة كلامه وحشة وبرضه رجعت البيت عيطت فأنا دلوقتي عاطل مش بعمل حاجة غير شرب المخدرات والأفلام الإباحية والاستمناء وبحب أتفرج علي أنواع أفلام غريب أو شاذ إلى حد ما لكن أنا في الحقيقة ولا شاذ ولا حاجة وحاسس إني هفضل كدة طول عمري لما يقف مع حد مش بعرف افتح موضوع ولما يفتح هو بيكون ردي مختصر بحس أن الناس بتتخنق مني معرفش آخد وأدي في الكلام حتى مع أبويا وأمي وبيتهألي مبقتش بتكسف خالص دلوقتي أحيانا بكسف من أبويا لحد دلوقتي مش عارف إيه الحل في الكلام القليل إللي مخليني كمان شخصيتي ضعيفة مش بعرف أمشي كلمتي مش عارف أنا ممكن أتجوز إزاي وأكون علاقات بالناس إزاي أنا لو حد قاعد جنبي ساعة مش هتكلم غير قليل جدا مع إني مش بكسف ومش حابب أكون منطوي بس مثلا الكلام إللي أنا بكتبه لك ده أنت لو قاعد قدامي مش هعرف أقوله لك
ياريت لو في أي علاج نفسي أو شخصي أو دوائي....
شكرا جدا
2/1/2018
رد المستشار
أيها السائل الكريم، نشكر لك ثقتك في الموقع وأرجو أن نفيدك.
رغم أنك كتبت كثيرا وذكرت أمورا مهمة عن علاقات ومواقف كاشفة في حياتك إلا أن حالات كحالتك تحتاج إلى جلسات أكثر وأكثر، مبدئيا أنت بحاجة لتحديد أولوياتك كما يلي:
أولا: مشكلة المخدرات.
ثانيا: مشكلة العمل والأهداف المستقبلية فيما يخص العمل والإنفاق.
ثالثا: الاستشارات فيما يخص التعامل مع الآخرين والعلاقات مع الجنس الآخر.
إن إدمانك للمخدرات ما هو إلا انعكاس لمجموعة من التفاعلات الشخصية مع ظروفك والبيئة المحيطة بك، لن أتطرق إلى مشاهدة الأفلام الإباحية والاستمناء رغم اعتقادي بأنهما ربما تجاوزا أي حد مسموح به وذلك لأنك لم تعطنا ما يكفي من معلومات عن مدى انغماسك فيهما، أنت بحاجة لمراجعة الطبيب النفسي للتخلص من مشكلة المخدرات بشرط وجود الدافعية لديك.
فيما يخص العمل، فهمت أنك لا تعمل حاليا، ما هي خطتك للعمل في المستقبل، وكيف يمكن استغلال دراستك الجامعية (بكالوريوس تجارة) في فتح مجالات عمل أمامك.
بخصوص العلاقات وهو ما شعرت بأنه شغلك الشاغل في هذه الاستشارة، يبدو لي أن الأمور غير مرتبة في عقلك، إن العلاقة الناجحة ليست المقدرة على قول لفظة "أحبك" ولا يكفي أن تكون صاحب توجه جنسي "غير مثلي" لإنجاح علاقة مع امرأة.
هناك أزمة ثقة بالنفس واضحة في كلامك وخلل في العلاقات الشخصية منذ فترة طويلة، وعندما حاولت مداواة ذلك عبر الخروج من النمط المنطوي لحياتك الأسرية، كنت على طرف النقيض بما أضر بك ضررا شديدا، اعلم بأن العلاقة مع الطرف الآخر لن تنجح إلا إذا كنت مستعدا لإنجاحها ولديك مقومات ذلك أقصد المقومات الشخصية في المقام الأول من ثقة بالنفس ورغبة في التواصل الإنساني والاكتمال مع الآخر وبالآخر والإحساس الداخلي بالإنجاز والقدرة على العطاء.
سوف تستفيد من الجلسات النفسية أيضا والأسرية إن أمكن.
وفقك الله وتابعنا بأخبارك.