مشاكل زوجية...
مشكلتي بدأت أول لما فكرت أتزوج واخترت أكتر من واحدة فيها المواصفات اللي نفسي فيها مع العلم أني أعمل بالخارج فأنا مصري أعمل بالخليج ولكن كل اللي اخترتهم والدي ما كان يوافق عليهم لاعتقاده أني ما بعرف أختار لحد ما نزلت أجازة في مرة وكنت معجب بزميلة صديق لي تعمل في الحاسبات وظيفتين يومياً ومع دراسات انبهرت بها وبشخصيتها بعد أول مقابلة واتعلقت بها
ولكن أبي قال لازم تشوف أكثر من واحدة لأن أسرتها من منطقة شعبية جداً فجابلي واحدة عن طريقه والدها دكتور (زوجتي الآن) وقالي لازم تشوف وتختار بنت الدكتور وافقت أجلس معها ولكن هنا عيوب كثيرة فيها أولها أنها تركت شغلها لأنها جلست بعد دوامها بنصف ساعة وقالت لي أن شغلي 8 ساعات وقعدوني أكتر فرفضت أحسستها مش هتريحني من وأنا جالس معها رجعت لوالدي وأخبرته بالعيوب وبدأ بالعراك معي إزاي تسيب دي وتتجوز دي وخاصمني والدي
فاعتقدت أن الحل هو رضا الوالدين ولازم أرضي والدي وخطبتها دون أي اقتناع بها وسافرت وكانت علاقتي بها مجرد مكالمات وحصلت مشاكل بينا وأنا مستريحتلهاش ومرضتش أكمل وقولت لأبي عوضهم بمبلغ وخليها تبعد عني دي إنسانة غير طبيعية ولكن أبي قالي حرام دي بنت طيبة وحتتغير بعد الجواز
تزوجت وفي أول ثلاثة أسابيع حدث أكتر من 10 مشاكل بينا من ضمنها مثالين نازل أشوف واحد صاحبي جاي أجازة يوم واحد بس فوعدته بمقابلته في الليل فقولت لزوجتي أنا حنزل بالليل فرفضت وحصلت مشكلة بينا وراحت قعدت لأهلها وحصل صلح ومثال ثاني بحب القراءة فجاءت معي معرض الكتاب فشافتني وأنا بشتري كتب قالت لي كفاية كتابين اثنين قولتها واحد بس وخلاص قالت لي لا كفاية كدة وروحني حالاً وطبعاً كانت مشكلة بينا
وبعد مقربت أجازتي تنتهي حصل مشكلة بينا بس مقدرتش أستحملها اتصلت بأهلها وجم البيت وطبعا هي حكت لهم حاجات غير اللي بتحصل قلت لهم هي قدامكم أهو وحصل أكتر من 10 مشاكل لو أنا في مرة واحدة بس غلط أحكموا علي بعد ما كانت نظراتهم كلها ضدي كلها شهدوا أن هي اللي غلطانة وإن أنا حر إني أشتري زي ما أنا عاوز كتب وكل المشاكل هي اللي غلط
سافرت وأنا زعلان إن ده نصيبي غير متفاهمين إحساسي أنها مبتحبنيش خالص مع أني بمثل عليها إني بحبها جداً ولا أحسن ممثل لكن من جوايا لدي العقلية اللي أنا كنت نفسي أتجوزها ولا في أي مشاعر خالص
تعقدت المشكلة بعد ما عرفت أنها حامل والآن عندنا طفل عمره شهور وقدرت أجيبهم معي في شغلي واقتربت منها أكتر وكل ما أقرب أشعر بالندم الشديد فصورة عدم اختيار مواصفاتي وعدم الصمود أمام أبي مابتتشالش من قدامي عايش بشخصيتين شخصية معها إن حياتنا جميلة ومن جوايا ببكي والله العظيم كأن روحي بتبكي فمن ناحية بحب أريحها وخلاص بمعنى أنا لو نزلت مع صحابي لو مرة واحدة بتقلب البيت زعل ونكد لأني نزلت وسبتها ساعة واحدة وأنا خلاص قولت على إيه أنا ولا حشوف حد زيارتها تخلص وخلاص مش حجبها ثاني لو
في مرة حاولت أتناقش معها مبنوصلش لنتيجة هي اعتقادها الكامل أنها هي الصح لدرجة أني من غير ما أحكي لأختها الكبيرة قالتلي نصيبك يا محمد دي عقليتها كدة من أسبوعين نزلنا مع أسرة زميلي فزميلي عايش براحته نزول وخروج واحنا مروحين بتقولي دي لو مراته أول يوم أما قالها أنا نازل مع صاحبه إديتو بالشبشب مكنش عمل فيها كده مردتش عليها وفهمت هي بتفكر إزاي طبعاً
حياتي من جواية بقت صعبة حاسس إن قرار جواز أخدته في دقايق يغير كل عمري كدة وبقيت ناقم وحاسس بظلم والجانب المظلم في الدنيا دماغي مش عاوز يقتنع بفكرة إن ده ابتلاء لا ده ضعف مني أنا لو قوي ومصمم على رأيي بالعقل والقوة من الأول ماكنش حصل في حياتي كدة الأفكار اتمكنت من دماغي لحد من فترة قريبة عملت الفواحش مع أني مش عاوز أعملها وبعدين أرجع لربنا وبعدين أبعد عن الصلاة
حاسس إن ربطتي بها ولأني عمري محطلقها عشان حلم طفل ميموتش ذنبه إيه بأن أب اختار غلط تايه وتعبان وحاسس بالهزيمة من كل النواحي الدينية والدنيوية وطبعاً هي متعرفش أي حاجة خالص
دي مشكلتي ومحتاج نصيحتكم
12/8/2018
رد المستشار
صديقي
للأسف فقد سمحت للآخرين بالتدخل في اختيارك وتسرعت في الاختيار...زوجتك من النوع الطفولي المتحكم أو النرجسي وهذا يدل على عدم نضج في نواح عديدة مع تقدير ذاتي سيء سراً... هذا يعني أن لديها الكثير من المخاوف سراً أيضاً...لا تحاول مناقشتها فهذا لن يجدي لأنها سوف تحول كل شيء ضدك أو تلعب دور الضحية أو تستخدم الوقاحة أو التضليل.
المهم الآن هو أن تبحث عن طريق متدرجة رويداً رويداً لكي تحصل على موافقتها باستشارة معالج أسري أو متخصص في العلاقات الأسرية أو الزوجية... من المهم أن تبحث معها على التوافق والمودة والرحمة والحياة الهادئة.
إن لم تنجح في هذا فالطلاق سوف يحدث إن عاجلاً أو آجلاً..سواء كان رسمياً أو صامتاً كأن تعيش معها وكأنكما متشاركان في المسكن فقط.
الأطفال لا يتأثرون بالضرورة سلباً من الطلاق .. على العكس، في كثير من الأحيان يكون الزواج التعس سبباً أكبر في مشاكل الأطفال النفسية من الطلاق.
أنصحك أيضا بمراجعة معالج نفساني لكي تناقش هذه التفاصيل و تصل إلى الطريق الفعالة لحل المشكلة
وفقك الله وإيانا لما فيه الخير والصواب