هل الطلاق أنفعُ لي أم ماذا أفعل؟

هل أتعذب وأتألم لأجل أولادي

عمري 32 سنة متزوجة من 11 سنة ومعي 3 أطفال تجوزت جواز صالونات مشكلتي مع زوجي بدأت من أول يوم جواز
لأني صدمت فيه لأنه مش بيصلي بانتظام زي ما كان مفهمني وعرفت أنه مديون ودي حاجة كان المفروض يصارحني بيها قبل الجوازعشنا مع بعض في مشاكل أكثر من راحة وسعادةكنا بنتخانق على أتفه الأسباب هو عايزني أمشي على كتالوجه وأنا مش بحب حد يمشيني على مزاجه

أنا عمري حتى ما حسيت إني شريكة في الحياة اللي أنا عايشاها عايز كل حاجة في البيت تمشي على مزاجه بيتحكم في التفاصيل ولما كنا عايشين في السعودية لما كنت أقوله حوش للزمن كان يقولي ملكيش دعوة أنت ليك أكلك وشربك وبس ضربني أكثر من مرة وفي كل مشاكلنا بيشتمني بأبشع الشتائم وأنا كنت برد عليه أوقات كثير لأني مكنتش بقدر أستحمل فكان بيشتم أهلي ويغلط فيهم

لما كانت بتحصل مشكلة بيني وبينه كان بيتصل على أبويا أو أمي علشان يشتكي مني ويهزأهم ويتكلم معاهم بأسلوب مش كويس هو كان بيشتم عليهم في خناقتنا لأنه شايف أنهم معرفوش يربوني وفي ناس كثير تدخلت في مشاكلنا وهو كان بيكذب ويقول علي كلام غير الحقيقة تماما تطلقنا مرتين وكنا نرجع لبعض ثاني يوم على طول

أنا اللي كنت بكلمه وأصالحه لأني كنت بحبه ومكنتش قادرة أعيش بعيد عنه رغم كل الإهانات والتجريح إنسان كذاب وكل وعوده كذابة وكان متفق مع بابا قبل الجواز أنه هيشتري شقة تمليك بعد سنتين من الجواز وبعد كده قالي أنا ماوعدتش حد بحاجة بينتقد كل الناس سواء يعرفهم أو لا ودائماً شايف نفسه أفضل من كل الناس يقعد ينتقد في أخواتي وأقاربي وفي أسلوب حياتهم ويقولي الناس دي عايشه حياتها غلط مع إن دي حاجة متخصهوش أصلاً

كان بيقارني بالستات ويقولي شوفي فلانه بتعمل إيه في بيتها ومع جوزها واعملي زيها وعرضت عليه في مرة أبيع ذهبي علشان أساعده في أزمة مادية وقالي بشرط هرجعهولك ثاني وبعد فترة طلبت منه الذهب رجع في كلامه وقالي أنا صارف عليك أكثر من تمن الذهب مكانش بيديني فلوس في إيدي مش لأنه بخيل

لكن هو عايز يفضل مسيطر علي لما أشتري لبس هو اللي يختاره لو احتجت حاجة للمطبخ يقولي لا ملهاش لازمة وميرضاش يجبهالي مع أنه مبذر وبيصرف في أتفه الأشياء والمرتب مش بيقعد معاه لنص الشهر والباقي بالسلف والدين أنا بعترف إني زمان مكانش عندي شخصية ومكنتش بعرف أخذ قرار فكنت بلجأ له على طول
عمره ما شاف في ميزة واحدة دائما يعد في عيوبي يغلط في ويهيني ويجرحني وبعد كده يقولي أنا مش غلطان اللي أنا قولتهولك هو الحقيقة

أنا معترفة إني مقصرة في شغل البيت ومسؤولية ولادي لأني أم غير نشيطة بس هو عارف كل ده من قبل الجواز وكنت بقوله أنا مابعرفش أطبخ كان بيقولي مش مهم مش لازم تتعلمي الطبخ أنا هطبخ بعد الجواز وكمان أنا مفتقدة للحنان فمش قادرة أديه لولادي وأوقات بتمنى أنهم يموتوا علشان يرتاحوا ويريحوني ولما كان بيجبلي لبس أو يخرجني كان بيعايرني أول ما نتخانق يقولي أنا جبتلك أنا فسحتك أنا معيشك أحسن من عيشة أهلك والحمد لله أنا أهلي مبسوطين ومن عيلة لكن هما مش مبذرين زيه

لو حكيتله مشكلة حصلت بيني وبين أختي أول ما نتخانق يقولي أختك بتكرهك وكل أهلك بيكرهوكي خناقاتنا كلها قدام العيال وبيسمعوا ويشوفوا كل حاجة أنا حتى بحس إنهم مش هيقدروا يكونوا أسرة بسبب الحياة اللي هما عايشنها

لما كنت بعتب عليه في وقت روقان وأقوله أنت ضربتني كان بيرد ويقولي أنت تستاهلي الضرب أنا مغلطتش فيك وهو أصلا اللي عامل مشاكل مع كل الناس أهله وقرايبه وحتى إخواته كمان بيقاطعهم لو قالهم حاجة ومسمعوش كلامه وفي الشارع لو حد زنق عليه بالعربية يتخانق فيه ويشتمه ولو رد عليه يضربه
رحنا عند دكتور نفسي وأخصائي اجتماعي لكن ما وصلناش لحل لأنه ماكنش صريح في كلامه عن مشاكلنا وحياتنا وكان بيطلع العيب علي

وفي نفس الوقت أنا قولت للدكتور أنه بيجي علي أوقات بكون فيها مخنوقة ومضايقة فكتبلي دواء للاكتئاب ومن ساعتها وهو بيقولي أنت مريضة نفسيا وقال للناس كمان إني مريضة نفسيا وبتعالج
ومن فترة بعد ما خلفت ابني التالت حصلت بينا مشكلة فهجرني أكتر من 4 شهور وكان بينام في أوضة ثانية وبعدها اكتشفت أنه بيكلم واحدة وفي بينهم كلام حب ووعد بالجواز ولما واجهته شتمني وشتم أهلي شتائم عمري ما سمعتها في حياتي

أخذت أولادي ورحت عند أهلي قعدت هناك 9 شهور ما بعتليش فيهم مليم لأني بعد ما مشيت هو طردوه من الشغل بسبب مشكلة
وكان بيستلف طبعاً علشان يشرب سجاير ويحط بنزين في العربية إنما أولادي أهلي بيصرفوا عليهم فمكانش شايل هم في الفترة دي أهله تدخلوا وحاولوا كثير يصلحوا بينا أنا وقتها مكنتش طايقة أسمع صوته ولا أشوفه ومش عايزة أرجعله وأهلي كمان مكنوش عايزني أرجعله لأنهم كانوا شايفين حياتي عاملة إزاي

المهم رجعت بعد وعود وهو كلمني أكثر من مرة ووعدني أنه هيعيشني حياة أفضل وأنا صدقته للأسف أو بمعنى أصح اضطريت أصدقه علشان أولادي كانوا عايزين يعيشوا مع أبوهم وكانوا ضاغطين علي جامد فرجعت
بقالي دلوقتي 5 شهور أول شهر منهم كان كويس وبعد كده اكتشفت أنه بيتفرج على أفلام جنس وواجهته وهو ما أنكرش ولا حاسس أنه بيعمل حاجة غلط

وحياتي دلوقتي زي الأول وأسوأ كمان نفس المشاكل ونفس الشتايم والإهانات والتجريح وتلقيح الكلام وهجرني من شهر تقريبا وقاعد في أوضة ثانية
حاليا أهلي متكفلين بجزء من مصاريف أولادي لو احتاجوا لبس أو أي حاجة لأن أبوهم ظروفه المادية صعبة وعليه ديون كثير

وموضوع الديون عمره ما هينتهي هو مديون من ساعة ما عرفته من 11 سنة الديون مش بتخلص وعمرها ما هتخلص
وفي مرة كان عنده عربية وباعها وصرف الفلوس في كلام فاضي وأنا كنت بتحايل عليه يحط الفلوس مقدم في شقة بس هو تقريبا كان وأخذها عند في أنا خلاص ما بقاش يفرق معي إذا كان يجيب شقة أو لا ولا حتى فارق معي إنه يكون معه فلوس ولا هو نفسه فارق معايا

أنا مش بثق فيه ومش بصدق أي كلمة يقولها وكمان مش بحس إنه راجل نزل من نظري بسبب تصرفاته
أنا كنت بحبه جداً ولما كان بيضربني كنت بسامحه وأرجع أكمل حياتي معه عادي بس خلاص مش قادرة أحبه ثاني أنا تعبت مش عايزة أعيش معه مش قادرة أسمع صوته يوم أجازته أسوأ يوم في الأسبوع لأنه قاعد معانا في البيت العيال بيحبوه جدا وأنا بكرهه جدا جدا

نفسي أتطلق منه بس للأسف مش هقدر أوفر لولادي بيت ولا هقدر أصرف عليهم ومش عايز أحمل أهلي مسؤوليتنا
وهما كمان مش عايزين يعيشوا بعيد عن أبوهم ممكن أعيش في بيت أهلي بس أولادي مش بيرتاحوا هناك
زمان لما كنت بفكر في الطلاق كنت بفتكر حاجات حلوة فيه تخليني أرجع عن قراري لكن دلوقتي مش لاقية فيه أي ميزة غير إنه بيحب ولاده

أنا حالياً بدأت أشتغل شغل خاص بي بالعافية طبعا لأنه كان رافض إني أشتغل تماماً وطبعاً دخلي مش هيكفي ولادي ولا هقدر أجبلهم شقة ولا هو هيوافق يخلينا نعيش في الشقة اللي إحنا فيها وهو يمشي هي شقة إيجار

تعبت قوي وبتعذب كل يوم نفسي أتطلق منه وأتجوز واحد غيره يحبني بجد ويحترمني مش قادرة أخذ قرار الطلاق ومش عارفة حتى هندم لو تطلقت أو أحس بالذنب علشان ولادي هل أطلب الطلاق وأسيب العيال مع أبوهم
ولا آخذهم يعيشوا معايا وخلاص ولا أصبر وأستحمل وأتعذب علشان ولادي يكونوا مبسوطين

أعمل إيه بجد تعبت من كثر التفكير ومش قادرة آخذ القرار
3/10/2018