من عسر المزاج إلى الاكتئاب !

بعد السلام ..


بتشكركم عالموقع اللطيف.. وباتمنى تردون علي بأقرب وقت ممكن، أنا من وأنا صغيرة بابا كان يحكي إني مميزة.. وفعلا كنت من الطلاب المثاليين بالمدرسة ومن الأوائل دائما خصوصي بالمواد العلمية والإنجلش وكنت أنافس ويهمني كتير الموضوع وبحصة الفن والتعبير يحكو أني مميزة بشكل.. حتى أني كتبت عدة قصص قصيرة عربي وإنجلش وأنا لسة صغيرة.. بس مع الوقت فقدت اهتمامي بالموضوع مو فقدت قدرتي بس بطلت حتى أجرب بعد ما صرت جامعية.. إحنا عيلة تنقلت كتير بسبب شغل والدي وتعرفت على كتير ناس وكنت اجتماعية جدا بس من عمر معين يمكن صف ثامن فقدت هالصفة وصرت انطوائية نوعا ما بالمدرسة الجديدة لهجتهم مختلفة وعاداتهم كمان.. ما طولنا ورجعنا لوطنا فلسطين علاقتي بالأقرباء كانت ممتازة مع أني ما عشت معهم كتير لكن الناس الغرباء كنت أتعامل معهم بصعوبة وزميلاتي بالصف كذلك عدا اللي هو ببلش وبحاول يتقرب لي وبحس إعجابه أو حبه إلي أتعامل معه بسهولة تامة والباقي أتجنبه..

وضليت هيك بالجامعة وحتى بعد زواجي مع عيلة زوجي كانوا ولساتهم غرباء بالنسبة إلي.. ما بحب أتطلع بعيون اللي بحكي معي وكمان شيء فقدت الاهتمام بمعظم الأشياء يعني بحاول أدور أنه شو بحب بالحياة مو ملاقية مع أنه ما في شيء سلبي بحياتي واقعيا لكني مو سعيدة أنا حدا بحب علم النفس وبعتقد عندي قدرات معينة على فهم الناس بدون ما يحكو من حركاتهم وصوتهم بحب أني مميزة لكن بنفس الوقت بشعر أني مو ذكية كتير بمواضيع ناس بعتبروها تافهة وسهلة.. يعني عكس الناس.. زوجي بضل يحكيلي بعيط عأتفه الأسباب يمكن أنا هيك فعلا بس بكون جد حزينة وبحاجة إني أعيط يعني ما بمثل..

وخلال دراستي الجامعية كانت علاماتي سيئة جدا وتخرجت بصعوبة مقارنة بعلاماتي المدرسية.. في عندي عادات معينة باتمنى أتركها ومو قادرة بعملها سرا وما بقدر أحكيها.. ال IQ تبعي مرتفع نسبيا.. بدور عشغل مشان أحس أني منجزة شيء بالحياة غير إن عندي ابن عمرو ٣ سنوات تقريبا..

وفي كمان إني بحب أفهم الأشياء اللي بخبيها اللي قدامي وبقدر غالبا يمكن بحب أتباهى إني بعرف هيك شغلات عالأقل..
طولت عليكم
19/10/2018