|
| 
|
وسواس في بدايات العلاج : خلف جدران الزواج م16
وبعدين الحل إيه
عزيزي د وائل أهلا بك ومرحبا. وبعدين يا طبيب أعمل إيه حالتي تسوء مرة تلو المرة وساعات أحس أني كويس أو بقيت شبه كويس معرفش.
خلصت جرعة الفافرين الأولى والنتيجة معرفش متقلب دكتور وائل أنا أعمل حاجات غريبة وأعراض جديدة عايز أعيش حياتي كويس مش عارف بقاوم نفسي، أعمل الحاجة وبهين وبشتم نفسي أنا أعملها كأني رقيب عليها هو اضطراب الوسواس ممكن يؤدي للجنون؟ أكيد آه جاوبني ده أهم سؤال ممكن أجنن بسبب الطين ده؟
دماغي بتشرد بعيد عني خالص عارف أنا أكتب لك الرسالة الساعة ٣ عصرا يوم ٢٧ /٦ ومقضي يوم صعب في شغلي هجنن عمال أشتم شغلي الحديد والمواسير وهاجنن شغال وعمال أعمل حاجات غير راضي عنها أقعد أبص للحاجة أكثر من مرة وبقيت أعمل حاجة عصبية تشنجية غريبة، خاصة أعملها لما أقدم على أي حاجة أعملها أقعد أبص لها وأعمل حركة عصبية معينة صعب توضيحها تروح بعد ثواني معرفش بعملها ليه وغيرها وغيرها.
يا دكتور أرجوك ركز معايا حاسس أني غير مدرك لبعض الأشياء أو كأني بعملها أو أشوفها لأول مرة وأسأل نفسي بفكر كده ليه وأقعد أبص لخطواتي وأنا ماشي وأركز معاها لدرجة أن سيارة كادت تدهسني مرة
وحالة صداع تجيني لما ذهني ينشغل بذا والشرود في شيء صداع في منتصف الرأس كأن دماغي غير راضية على أفعالي. شغلي وأنا أعمله كأني أعمله لأول مرة أو لسه بتعرف عليه أنا فني معدات وشغلي كله حديد ومواسير وبركب صحن الدش والله بعد ما أركبه ومش عارف أعمله إزاي طب الإشارة بتيجي إزاي وتخش إزاي مع حركات عصبية لدرجة أن زوجتي والمقربين لمحوا علي وغيرها وغيرها
صعوبة في ممارسة الحياة اليومية كثير حتى صعوبة في كتابة الرسالة وإزاي بتوصل يوووووووه. قرأت في أعراض الذهان لقيت ده من أعراضه وأعراض ألزهايمر من أعراضه وأعراض الوسواس الهباب القهري من أعراضه.
أنا عندي إيه؟ وأتوجه أروح لمين أعمل أشعات معينة على المخ أشوف عندي إيه الوسواس مالوش صورة أشعة بس أكيد الباقي ليه ذهان ألزهايمر؟؟ خائف خائف لأكون مصاب بحاجة من دول هروح من أولادي ومالهمش حد غيري ودخل ليهم غيري خائف الأعراض تزيد ودماغي تروح في ألزهايمر أو ذهان ساعتها أعمل إيه أعيش إزاي أجوع وأتشرد أنا وأسرتي وأخسر دنيتي وآخرتي؟
أعمل إيه أروح فين أروح لمستشفى عام ثاني وأشوف الذي شفته ولا آخذ أقراص فافرين جرعة كمان وأزيد الجرعة ولا كلامي بين لك شيئا؟؟ أروح لطبيب مخ وأعصاب وأعمل صور أشعة على المخ أنا معي كارت تأمين صحي لجميع مستشفيات مصر الخاصة كمان مع شركة إكسا وجهني أروح كشف به هناك مخ وأعصاب وأطلب صورة أشعة للمخ تبين يكون فيه أعراض ألزهايمر؟؟ بداية جنون؟؟؟؟
سامحني على الشرح التفصيلي ذا آسف أقسمت عليك بالله وحجك لبيته تقول لي أعمل إيه؟ وجهني معي كارت صحي لمستشفيات كويسة قل لي أعمل إيه؟؟ جايز كلامي مش عقلاني وفيه قلة عقل هاجنن يا دكتور أرجوك تاني أعمل إيه حالتي المثلية الأولى كانت أهون عليّ من ده أستغفر الله العظيم.
ثاني أعمل إيه أروح أكشف إيه مخ وأعصاب وأقول له إيه عندي وسواس ولا ذهان ألزهايمر ما هي ذي أعراض موجودة؟ انهرني زي ما أنت عايز على افتكاساتي وحواراتي بس قل لي أعمل إيه؟؟ أرجوك اقرأ الرسالة باهتمام، وسامحني أرجوك وحياة من حجيت بيته تسامحني.
شكرا
وآسف للإطالة
27/6/2019
رد المستشار
الأخ الفاضل "طارق" أهلا وسهلا بك على موقعك مجانين وشكرا على ثقتك، وحسن متابعتك مع خدمة الاستشارات بالموقع.
لا يوجد أي علاقة بين ما تعاني منه ومرض ألزهايمر ببساطة لأن ألزهايمر لا يحدث قبل سن 65 سنة أعطاك الله العمر وحرمك المرض يا "طارق"... وأما عفريت طبيب مخ وأعصاب الذي يبدو أنه عليك فلا داعي له لأن حالتك وما تعاني منه هو اضطراب طبنفسي صافي ومصفى!! اسمه وسواس قهري تحتاج فقط للصبر على العلاج لتجد التحسن فيه بإذن الله.
يمكنك الآن أن ترفع جرعة الفلوفوكسامين إلى 150 مجم يوميا بعد العشاء ونسأل الله أن يعجل شفائك.
ومرة أخرى أهلا وسهلا بك دائما على موقع مجانين فتابعنا بالتطورات .
ويتبع >>>>>>: وسواس في بدايات العلاج : خلف جدران الزواج م18
تعليقات الأعضاء