|
حاجة وتلاتين! ::
الكاتب: ولاء الشملول
نشرت على الموقع بتاريخ: 01/12/2007
 أمبارح كان عمري 20
لا 30
لا 33 ونص
الصراحة مش فاكرة
ولا بمعني أصح ما بقتش أعد خلاص، زهقت...
التورتة ما بقاش فيها مكان لشموع يا ناااس...... أقولكم؟
يا ريت يكون قراء الموضوع من البنات فقط عشان أتكلم كده براحتي... وأتبحبح!
كل سنة وأنا طيبة وسعيدة ومنتعشة خلاص عيد ميلادي جه
عيد ميلادي الكام؟
الحاجة وتلاتين! وماحدش يسألني ويقول (الحاجة) دية يعني كام...
حاجة وتلاتين وخلاص...
حاجة وتلاتين شمعة في عين العدوين
يعني الشباب والروشنة
يعني النضج والمسئولية
يعني المرح والانطلاق
يعني أجمل سن وأحلى الأوقات
وسمعني أحلى سلام للحاجة وتلاتين شمعة يا جدع
تم تراارااا تم تم....
وإيييييييييييه
نعود لمرجوعنا الأساسي وهو إحساسي وأنا عندي حاجة وتلاتيييييييييين سنة
وأنا الحمد لله
الحمد لله كمان مرة
لسة متفائلة
ولسة برضه بدور على السعادة
أديني بدور أهو...أهو..
لكن بإحساس مختلف شوية المرة دي
لأني حتى هذه اللحظة لم أتزوج!
ولم أخلع ولا أُطلق ولا أترمل ولا أي حاجة خالص
ودخلت حزب العوانس إياه باقتدار
وبعدين بقى؟
أنا اتفقت معاكم إني اتبحبح ...خلاص بقى سيبونييييييي
والحقيقة وفى الواقع
يا سادة يا إكرام
أنا مش زعلانة..!!
ومش متأنثرة ولا أي حاجة خااااالص
نوهاااائييييي
واللي يلمح –بس يلمح– إني متأنثرة أدب صوابعي العشرة في عينييييييه...
آه...أمال إيه؟
سايبة هي ولا سايبة؟
ولا يمكن سايبة؟ (قابضة عمولة محترمة من شركة حلاوة رشيدي الميزان)
وفي الحقيقة برضه خبرة العونسة دي خبرة مميزة ومفيدة وآخر حلاااااااوة
يعني برضه إحساس الواحدة وهي عانس كده إحساس مختلف...
يا سلاااااااام
بنكهة الليمون
وكله فيتامين سي
أهو ينفع عشان البرد وكده
يعني قصدي إنه إحساس جديد
بيخليني أحس بحوالي 11 مليون شاب وشابة تعدوا سن 35 ولم يتزوجوا
تقولي بقى بطالة
تقولي غلاء أسعار وارتفاع تكلفة الزواج بالتالي
تقولي الرجالة انضربت "لا مؤاخذة يعني"
تقولي الشباب مقضيها إنترنت وفضائيات وعرفي
تقولي ضاع الإحساس
ماتت الإنسانية
الشباب خايف من المسئولية
المهم...
إن النتيجة واحدة
ما حدش بيتجوز في البلد دي يا جماعة
يعني إيه؟
يعني معدلات الانحراف الجنسي تزيد
والعلاقات غير الشرعية تزيد
وظهور أنواع شتى من الزواج إلا طبعا الزواج الرسمي بتاع أمي وأمك ده.
يعني مافيش جيل جديد يجدد دماء مصر المحروسة
يعني انخفاض إنتاجية
يعني اكتئاب وانطواء
وعصبية وتوتر
وحط من هنا للصبح مصايب سودة
بس برضه
برضه عشان تبقوا عارفين
اللي تجوزوا... ربنا نتعهم يعني كده ونالوا الشرف السامي
5 % منهم بس اللي سعداء
مش قصر ديل والله العظيم
ما تفهمونيش غلط
دا كلام باحث إعلامي قد الدنيا
أرجع تاني وأقولك:
إن ما تحسبوش يا بنات إن الجواز راحة
وما تزعلوش يا بنات إن قلنا بصراحة
إن الجواز عمره عمره ما كان راحة
ومهما نتعب نقول
تعب الحبيب راحة
عارفين
لأ عارفين دي اللي في الأغنية...
إنما عارفين برضه؟
الرضا بالمقسوم عبادة يا غوايش (عبارة تكررت كثيراً في مسلسل غوايش المعروض من سنوات).
واللي انكتب ع الجبين لازم تشوفه العين
إنما أقول إيه لأمي وخالتي وطنطي
كلهم كده بربطة المعلم عمالين يزنوا...
يا بنتي...
العمر بيجري...
يا بنتي هتخلفي إمتى...
أقول لها: يا ماما...الجواز دا رزق
والرزق دا بتاع ربنا
وكله بأوانه
وبعدين أديني طول عمري الأولى الحمد لله
حتى في دي
أول عانس في العيلة
بالذمة مش تميز برضه ولا أنا غلطانة؟
تمصمص شفايفها وتقول لي: ربنا يكرمك يا بنتي إنتي واللي زيك..
قلت لها يا ماما طيب ننزل إعلان في الصحف ولا على الإنترنت مثلاً (من باب إن اريحها برضة).
أم برضه يا جماعة وعايزة تفرح ببنتها ...قالت لي لأ
وبعدين لو نظرنا للموضوع من جهة أخرى
جهة العروسة العانس
تلاقي الواحدة من دول زي الفل
مالها زميلتي اللي جنبي في المكتب أهي بقت 34 سنة وماشية في الـ35 وبرضه زي حالاتي...
عيبها إيه يعني؟
هه؟
ولا البنت صاحبتي الدكتورة المتدينة الجميلة ....بالله عليكم...
دي تعنس ليييييييييييه
توصل لحد 38 سنة من غير جواز...ليه؟
أنا أهو...
وحشة؟؟ لا أبداً الحمد لله حلوة ، أه مش ملكة جمال (وماحدش يجيب لي سيرة نانسي ولا هيفا) لكن ربنا خلقني جميلة.
مبهدلة؟ لا برضه بعرف ألبس الحمد لله...
يعني مش أشيك بنت في "الحبانية" وضواحيها...
بس بلبس كوييييس
جاهلة؟ إطلاقاً دا أنا خريجة جامعة وعال العال.
بنت شوارعية؟ لا والله متربية وبنت ناس محترمة وأخلاق وذوق ذوق ذوق الصراحة.
عطلانة؟ نوهائي دا أنا بشتغل وبقبض، ومرتبي مكفي وكويس واللي بيفضل منه بسدد بيه ديون مصر! وبكتب في عشرينات أهو وزي الفل.
دمي تقيل؟ خاااالص دا أنا حتى البنت المرحة اللي بتهيص القعدة وتحلي الجو وتروق اللي معاها وتفرفشهم...
أمال إيه الموضوع؟
في إييه؟؟؟
انزل الشارع اخطف راجل وأروح أتجوزه
وأجري على أمي وأبويا اصرخ فيهم : عريس يا أماااااااي.... عرييييس
عريييييس يااا أمااااي عريييييييس
طوخه يا بوي بس ما تعوروش ؟
إيه العمل طيب؟
مطلوب عريس على وجه السرعة
ولا دا كمان نستورده من الصين؟!
ولا أقولكم نعمله download "تحميل" من الإنترنت أهو أسرع وأرخص
دلونا يا أهل الحل والربط
دلونا على الحل يا ناس..
(أليس منكم رجل رشيد؟)
واقرأ أيضا:
عندما سُئِلْت: هل أنتِ مجنونة؟ / يوميات ولاء: الطريق إلى أوربا 3 / يوميات ولاء: الطريق إلى أوربا 3 / على اسم مصر...يقدر الأمن يفعل ما شاء! / اعترافات أنثى: فارس أحلامي / يوميات ولاء: عن (رجل وامرأة)...سألوني3 / ماذا فعل الإعلام بالمرأة؟ / يوميات ولاء: تساؤلات مؤلمة / يوميات ولاء حكايتي مع الكتابة (2) / يوميات ولاء في عيد ميلادي ...أنا متفائلة / المصالحة مع النفس / اعترافات أنثى: وأنا ...مسترجلة! / اعترافات أنثى: متهمة بــ..الرومانسية! / عندما تقول المرأة :"والنبي أنا عتريس..!" / يوميات ولاء: لو كنت كفيفة / ليسوا وحدهم أصحاب الديك البلاستيك! / لسه جوانا شيء يعشق الحياة! / يوميات ولاء: اسمه أحمد! / يوميات ولاء: الخدعة الكبرى / مؤتمر الشباب وبناء المستقبل / يوميات ولاء: لماذا أنا مكتئبة؟ / يوميات ولاء: تسليع المرأة... تاني؟ / يوميات ولاء: المدونون ما لهم وما عليهم / في عيد ميلادي..ورحلة البحث عن السعادة / يوميات ولاء: صديقتي نهال / يوميات ولاء: تساؤلات مع العام الجديد / يوميات ولاء: الإيميل وسنينه / إلى فتاة معذبة: كوني فاعلة / مذكراتي عن اليوجا / رسالتي إلى أبي / يوميات ولاء: لحظات إنسانية / يوميات ولاء: يا رب / يوميات ولاء: موضة أم / يوميات ولاء: باكره مصر؟ / سينما أونطة... هاتوا فلوسنا!
|
الكاتب: ولاء الشملول
نشرت على الموقع بتاريخ: 01/12/2007
|
|
