احذر.. الهواء فيه سم قاتل..!!

كنا في زيارة لإحدى زميلاتنا في العمل..
 
 وكعادة جلساتنا التي لا تخلو من الكلام عن الصحة والمرض إلا نادرا..
 
 كان الحديث عن الصحة والشباب إلي صحتهم بقت في النازل، وإن جيل زمان غير جيل دلوقتي.. وإن زمان كان فيه خير وبركة أما دلوقتي.. امتعضت الوجوه وعلت الأصوات: تؤتؤتؤ.. يالطييييف..
 
 زمان الناس صحتها كانت حديد ودلوقتي.. الحديد صدى!
 
 الواحد مش عارف يروح فين أو يأكل إيه.. كل حاجة بقت ملوثة حتى البطيخ..
 
 فتذكرت جملة كنت قد قرأتها في أحد الصحف: (مصر هي البلد الوحيد الذي تمنع فيه الأمهات أولادها من أكل الفاكهة وشرب اللبن)..
 
 فعلا.. مرة يقال: بلاش خيار.. الخيار فيه سم قاتل..
 
 وفي سنة أخرى.. لالالا الطماطم مضروبة، ماااشي بلاش طماطم!!
 
 ودلوقتي.. احذر.. بلاش بطيخ.. أصله برضه "فيه سم قاتل"!!
 
 نظرت حولي وفكرت فيما نأكل ونشرب.. المياه ملوثة وبنحطلها فلاتر، والطعام مليء بالكيماويات والمبيدات..
 
 وحتى الهواء..
 
 وهنا انتقل الحديث لزميلة سافرت إلى تركيا وتحدثت عن نقاء الهواء هناك، وأنهم فوق الجبل تنفسوا –ربما لأول مرة- هواء نقيا- وأدركت الفرق بين الهواء فوق الجبل وتحته، وبين تحت الجبل وهنا!!!
 
 ضحكت على موضوع الحديث الدائر بيننا وقلت: ناقص في مرة يقولولنا: احذر.. الهواء فيه سم قاتل.. لا تتنفس!!
 
واقرأ أيضا:
إذا عرف السبب..! / صورة..وصورة