السلام عليكم ورحمة الله وبركاته
أخي.. عاشق الجنة
كم أثرت فينا تلك الفضفضة الرائعة.... يا آلهي.... القلب يحمل الكثير من الآمال والآلام.... يا رب أعنا جميعا على ما ننال به أقصى درجات رضاك عنا.... واسمح لي أخي أن أكمل على منوالك بعض الفضفضة والتي تمتلأ قلوبنا جميعا....
لا يدرك الغاية القصوى ىسوى رجلٌ *** ثابت العزيمة ماضٍ حيث ينخرط
يا له من دين لو كان له رجال....إحساسك إنك معاك دواء البشرية الشافي لكل أمراضها.... والدواء معاك والتركيبة في ايديك في مصحفك.... نفسك تعلي صوتك وتنادي.... يا جماعة بالله عليكم حد يسمعني.... إلى أين تذهبون ؟؟؟ الحل معايا؟؟ اللي تعبان واللي مخنوق واللي عايز ينتحر واللي غرقان في وحل المعصية... واللي بيعانى من ضيق الفقر... واللي الأموال خنقاه بهمومها.... كل دول حلهم معانا... بس فعلا ياله من دين لو كان له رجال... لما تشوف واحد ملحد ...وتلاقي أخلاقه عالية يمكن مش موجودة فى كتير من المسلمين... وتلاقيه تايه في بلاد الله.... مش عارف هو رايح فين... تسأله عن دينه يقولك أنا كنت مسيحي.... ولكني أدركت أن هناك خطأ ما.... فاعتزلت الدين والديانات ويكفيني أن أدرك وجود الله في قلبي.... طيب ما تجرب الإسلام؟؟ تلاقيه عنده كمية من الشبهات والمغالطات عن دينك.... واعتقادات أفقدته الثقة في صحة أي دين..... وقتها بتقول.... يا ترى في كام واحد زي ده....ناس محتاجة بصيص من النور لتتبعه.... فعلا ... يا له من دين لو كان له رجال..
لا يدرك الغاية القصوى ىسوى رجلٌ *** ثابت العزيمة ماضٍ حيث ينخرط
كلا والله لا يخزيك الله أبدا.... كلمة قالتها السيدة خديجة لسيدنا محمد صلى الله عليه وسلم من ألف وربعمائة سنة وبالرغم من كده أكاد أسمع قوة نبرات أمي وهي ترددها وكأن صوت أمي لم ينته بل حمله الهواء لنسمع بين الحين والآخر أصدائه ولتظل تلك الكلمات تتردد في مسامعنا.... كلمة شالت بها امرأة - ولكنها ليست كأي امراة - هم رسالة شاقة قادمة عن كاهل زوجها.... مين فينا يعمل زي أمه ويقف جنب أخيه ويقوله لما يكون خايف... تقدم... أكمل الطريق.. كلا والله لا يخزيك الله ابدا... فين الأم اللي لما تشوف ابنها قلقان وخايف على مستقبله... تشجعه طالما أنت صاحب رسالة خلاص... كلا والله لا يخزيك الله أبدا....
لا يدرك الغاية القصوى ىسوى رجلٌ *** ثابت العزيمة ماضٍ حيث ينخرط
يا محمد استبشر أهل السماء بإسلام عمر... .فرحة بثها سيدنا جبريل للنبى ...فعمر رجل واسلامه مش مجرد إضافة فرد للمسلمين... لا إسلامه يعني أمة بحالها بتتبني... طيب واحنا ؟؟؟ مفيش فينا حد تستبشر السماء بتوبته ؟؟؟ مفيش فينا حد ياخد بيد أخيه وهو بيقول ياااه الشاب ده رائع حيبقي مكسب كبير للدين... فيجتهد و يا خد بايده ويدعو الله أن يتقبل عمله... ويوم ما يشوف أخوه ده ووجهة مضيء بنور الهداية وقتها يحس باستبشار السماء وفرحتها مش بأخوه بس.... لأ وبيه هو كمان.... يااااه تخيلوا كام واحد تعبان ويائس من حياته وهو عايش بعيد عن ربه... نفسه حد بس يدله علي الطريق وياخد بايده ...وقتها حتقام الأفراح بهذا النصر للأمة... النصر هنا مش مجرد اننا نفوز في معركة ونقتل كل الاعداء...... لا والله نصرنا الحقيقي لما ننقذ نفس من النار.... لما نخيب ظن أبليس في أحد الخلق وننتصر عليه وننتزع أخ لينا او أخت لينا منه.... هي دي الفرحة الحقيقية...... وهو ده النصر اللي بنحلم بيه....
لا يدرك الغاية القصوى ىسوى رجلٌ *** ثابت العزيمة ماضٍ حيث ينخرط
أنا لم اخلق لهذا... لما كان الأطفال ينادون على النبى صلى الله عليه وسلم ليلعب معهم وهو صبى... كان يقول: أنا لم أخلق لهذا... أنه وضوح الرؤية.... وضوح الهدف.... انا مخلوق لهدف معين... وعندي رسالة معينة.... ولى وقت معين لأدائها... فعلي أداء رسالتى.... أما غير ذلك.... فانا لم أخلق له.... لحظة من فضلك... قف واعرف من أين جئت ولم أتيت.... فأنت هنا لهدف ما.... فلا ترحل قبل أن تدركه... و مش معنى ده انك تحرم نفسك من كل المتع.... لا بس حتى وأنت بستمتع بوقتك... عارف أن ده جزء من رسالتك.... فتطلع الضحكة بنية ....وتخرج النكتة منك بنية.... لأنك عارف أنت مخلوق ليه.... مخلوق لكي تكون رسالة ربانية لكل من حولك.... تذكرهم بربك في جميع أحوالك....
لا يدرك الغاية القصوى ىسوى رجلٌ *** ثابت العزيمة ماضٍ حيث ينخرط
والله لن أترك مجلسا جلست فيه بالكفر إلا جلست فيه بالإيمان.... كلمات قالها سيدنا عمر بعد اسلامه... إنها لحظة التنوير ....اللحظة اللي بتشوف فيها أد ايه أنت كنت عايش في ظلام وضيق من العيش ثم انتقلت لنور الهداية وسعة العيش.... وقتها بتحس انك عايز النور ده يوصل لكل من يعيش في ظلام الجاهلية.... يالها من جمرة متقدة.... تقف أمامها الشهوات والذنوب لتخمدها.... ولكن الرجل الحق.... هو من يعرف طريقه.... زي ما سيدنا عمر عرف... واقسم إن كل مكان شاف معصية ليه.... لازم يبقي عامر بالايمان.... عرفتوا ليه استبشرت السماء باسلام عمر؟؟؟ لان اسلامه مش يعني واحد وأسلم.... لا معناه إن في أمة حتيجي من خلف الرجل ده وتمشي علي شريعة الله بسبب عزيمة وصبر وصدق هذا الرجل.....
لا يدرك الغاية القصوى ىسوى رجلٌ *** ثابت العزيمة ماضٍ حيث ينخرط
ها أنا......... كلمة تعني عند محمد إقبال إدراك الذات..... فهى ليست من باب الفخر ولا الترفع علي الغير..... ولكنها أدراك لعمق الرسالة الذي يدفع إلى الجهر بالصوت ليصل لأكبر عدد من الخلق حتى وإن خالف ذلك هوى النفس.. ففي وقت مثل هذا نحتاج لمن يقف وبقول بأعلى صوته..... أنا الفارس الصنديد الذى سيحمل مسئولية أداء أمانة هذه الرسالة فأبلغها لكل بيت أستطيع الوصول إليه علي وجه الأرض... ستقابلني المعوقات.... وستعترضنى نفسي والشيطان.... وستحاول الدنيا إغرائي ولكن هيهات أن يبعد حلمى عن ناظرى لحظة.... بعد أدركت حقيقة وجودي....
لا يدرك الغاية القصوى ىسوى رجلٌ *** ثابت العزيمة ماضٍ حيث ينخرط
أحبكم في الله
فلسطين في القلب
اقرأ أيضا:
تعليقات الأعضاء