السلام عليكم ورحمة الله وبركاته
شباب الجنة...
نفسي أتكلم معاكم كتير وأعلق علي حاجات كنيرة من كلامكم فربنا المستعان كده ونبدأ بمجموعة خواطر سريعة عن بعض الكلمات التي دونتها في دفتر الذكريات لرمضان 1426
الخاطرة الأولى..
من برنامج خواطر شاب لأحمد الشقيري...
أول يوم في رمضان تحدث عن السعادة... فقال كلام جميل منه
** إذا قل ما تفرح به... قل ما تحزن عليه
** و أعلم أن السعادة في هذه الدنيا... تأتى بإخراج الدنيا من قلبك
** هدفنا في هذه الحياة ليس السعادة ولكن تحقيق السلام الداخلي ..والذي يحول المحن لمنح مثل ابن تيمية الذى عند سجنه قال: "ماذا يفعل أعدائي بى فأنا جنتي في صدري.. فإن سجنوني فسجني خلوة وإن نفوني فنفيي سياحة وإن قتلوني فقتلي شهادة... فما يصنع أعدائي بي"
كلام ابن تيمية ده من أحب الكلام إلى قلبي.... وإن شاء الله لي كلام كثير مع ابن تيمية في الجنة عن الموضوع ده.... وحيحضر المناقشة دي ابن القيم... وابن الجوزي... علشان أعرفهم من بعض لأني بتلخبط دايما بينهم من شدة تقارب أسلوبهم....
بس تعالوا ندردش شوية في موضوع السعادة... لأنه مهم جدا..... ولأننا بنفضل طول عمرنا بنجري وراء هدف كبير أسمه السعادة..... فلما تسال واحد أنت ليه بتعصي؟؟ يقولك علشان ابقي سعيد... ولما تسال واحد ليه بتطيع ربنا... يقولك علشان أبقي سعيد... فهدفنا العام الذى نسعى وراءه هو السعادة...
بس يا ترى بنجري وراء هدفنا و احنا عارفينه كويس ولا بنجري وراء الكلمة فقط دون أن ندرك مواصفات السعادة التى نبحث عنها....
عارفين ده زي ايه؟؟؟ زي مثلا لما يبقي عندك حلم أنك تشترى تسجيل جديد نازل السوق.... وتفضل مدة طويلة حارم نفسك من حاجات كتير علشان تشتري التسجيل ده... و اول ما تجمع الفلوس تنزل السوق وأنت في قمة السعادة لأن حلمك قرب يتحقق..... وتدخل المحل... يا ترى شكلك ايه وأنت رايح... عارف شكل الجهاز كويس وعارف سعره وعارف ماركته ومصنوع فين... ولا مجرد سمعت عن جهاز تسجيل جديد نزل السوق فرحت تشتريه من غير حتى ما تعرف هو كويس ولا لا؟؟؟
طيب لو متعلق أوى بالجهاز ده ونفسك تشتريه بجد..أكيد حتبقى عارف كل حاجة عنه لدرجة انه حتكون عارف الألوان اللي نازله منه وعدد السماعات وووووو...
واول ما تدخل المحل.. تسال البائع عندك الجهاز الفلاني؟؟... يقولك أيوة... تسأله ممكن أشوفه؟؟ فيديك الجهاز وتقعد تقلب فيه وبعدين تلاقي مكتوب عليه made in china فتقوله.... ده صيني!! يقولك أيوة... تقوله بس أنا عاوز الياباني.. يقول لك:ليه الصيني كويس وأرخص... ترد عليه بس الياباني أقوي.. يقولك بس تمنه أغلى.. تقوله عارف أنه أغلى لأنه مصنوع باتقان أكتر ...ولأنه بيتحمل أكتر..
أهو السعادة بالنسبة لينا كده... إحنا طول عمرنا بنحوش علشان نشتريها... مرة ندفع فلوس ومرة ندفع جزء من عمرنا ومرة ندفع حاجة من ممتلكاتنا... كل ده علشان نشتري السعادة..
بس يا ترى عارفين ماركة السعادة اللي بندور عليها؟؟؟ ولا حينضحك علينا لما ننزل نشترى ويدونا ماركة غير اللي عايزنها...
طيب نصيحة.... قبل ما تنزل وتلف اعرف أن كل السعادة الموجودة في الدنيا هنا ماركتها..made in Donia.... دى ماركة كويسة ورخيصة... بس الحقيقة أنها مش أحسن ماركة يعني حتتعبك لأنها كل شوية حتحتاج صيانة وتجديد ده غير أن عمرها محدود وكده كده حتحتاج تشتري واحدة جديدة كمان شوية....
لكن في ماركة تانية للسعادة مكتوب عليها... made in gana ... الماركة دي خطيرة... أولا مش محتاجة صيانة... ولا بتبوظ أبدا ولا يحدث لها أي أعطال... و كمان إمكانياتها أكتر بكتير من السعادة بتاعة الدنيا.... بس فيها مشكلة واحدة بس..
إنها أغلى.. وإنك حتستحمل شوية لحد ما تحصل عليها....
يا ترى حنختار إيه؟؟ نستني ولا نشترى وخلاص؟؟؟
طبعا الأمر مش محتاج مناقشة.. أنا حلمى واضح وهدفي واضح...ايه يعني لما اتعب شوية كمان وأجيب الأغلى... ايه يعني استحمل شوية كمان بس يوم ما أحصل علي السعادة احصل عليها إلى الأبد....
أمال إيه اللي نقدر نشتريه هنا في الدنيا؟؟
و لا مطلوب مننا إننا نعيش في حالة كآبة و حزن؟؟
أبدا مش مطلوب مننا نعيش في حزن دائم.... ولكن المطلوب أن هدفنا المرحلي في الدنيا إننا نوصل لحالة من سلام الداخلي... نبقي متصالحين مع أنفسنا زي كده ابن تيمية... عارفين ايه المعايير اللي عايشين عليها... فلما نتعرض لمحنة.. عالطول تفكيرنا يبقي زى تفكير ابن تيمية.. أنها منحة وفرصة إننا نكسب المزيد علشان نحوش بسرعة مهر سعادتنا الحقيقية....
طولت عليكم في هذه الخاطرة..
طيب نتابع فيما بعد
أحبكم في الله
ويتبع >>>>>: شباب الجنة :خواطر رمضانية(2)
اقرأ أيضا:
اعترافاتي الشخصية:اوصفولي الحب / على باب الله: رنتان للعشق / في فقه العشق/ الحب هو الأهم دائما يا عزيزي/ معاني جديدة للحب / يوميات رحاب: طلبت ايدك من أبيك / اللعنة المشتهاة: المحب أعمى مشاركة2
تعليقات الأعضاء