يا عيني ع الدكاترة....

 الأطباء...... هؤلاء الفئة من البشر التي أعتبرها... من المساكين ذوي الاحتياجات الخاصة...{والكلام على الأغلبية اللي بيشتغلوا في الوحدات والمستشفيات العامة بس.... مش الأقلية من البهوات... أصحاب العيادات....} عشان نكون كلنا على نور......ولنبدأ القصة من أولها.....
 
 أولى قواعد الطب في العالم أنك ماتهينش العيان بتاعك وماتتنرفزش عليه مهما حصل.... لكن اللي حط القاعدة دي يظهر معملش حساب وجود المريض المصري المريض المصري مريض من نوع خاص....... لمض لأقصى درجه........ عنده اعتقاد دائم أن الدكتور هايضحك عليه وعشان كده لازمن يكون مفتح علشان يفقس الدكتور.............. مثلا.......... لو سألته عن أي حاجه هايقولك عندي، عندك صداع يا حاج......؟؟؟ أيوه.... أومال صداع شديد.
 
 رجلك بتوجعك......؟؟؟؟ أيوه هو ده...... فيه وجع ف ضهرك.....؟؟؟؟؟ أيوه ضهري بيتحش بسكينه يا بيه، بطنك فيها مغص....؟؟؟؟... مش قادر عليه يا بيه......... 
 ولو قلت له أنت حامل هايقول لك..... أيوه يابيه...... ولو مش مصدقين أنا هاحكيلكم.... 
 
 مره كنت مدير نوبتجي المستشفى بالليل..... يعني قلت أمر ع الاستقبال لأن كل شكاوى المرضى بتكون من أطباء الاستقبال بالمستشفى وبسؤالي لمجموعة شباب الأطباء الجالسين في الاستقبال سمعت منهم ما جعلني أستلقي على قفاي من الضحك....... الدكتور حسن.......... طبيب مقيم طوارئ دفعه 2003...... يا باشا....... إحنا جالنا مريض مجروح وبعد ما عملنا له الغرز المطلوبة، سألني...... ممكن آكل بطيخ يا دكتور.....؟؟
 
 وواحد جاي ومعاه نص بلدهم تقريباااا ويشتكي من مغص جامد جداااااا مش عارف أنام..... خلاص أنا بموت يا دكتور....... سألته المغص بدأ عندك الساعة كام.....؟؟
 قال لي بمنتهى البرود من 3 شهور...... وواحد جاي ورجله فيها كسر مضاعف....... ومستغرب إزاي مش قادر يمشي عليها.....؟؟؟؟ وواحد يا باشا جاي الساعة أربعة الفجر..... راجل كبير وشكله محترم...... سألته....مالك يا حاج....؟؟؟؟؟
 
 فقال..... أبدا كنت رايح أصلي الفجر.... لقيتكم فاتحين..... قلت آجي أقيس الضغط...... وواحدة ست محترمة عندها التهاب وصديد في صباع رجلها.... ولما جيت آخذ النبض والضغط..... رفضت تماما..... باعتبار أن الصباع باين قدامي أهوه يبقى أكتر من كده.... قلة أدب
 
 وواحد يا باشا عنده 72 سنه وجاي الساعة 2 الصبح... بيشتكي إن الحبوب مش جابية معاه نتيجة...{الفياجرا طبعا...}، وواحدة جاية بعد نص الليل وشايلة ابنها معاها.... ماله يا ست........؟؟؟؟؟؟ مش راضى يرضع ولا ينام..........، كشفت عليه..... سليم من جميع النواحي......... 
 الولد كويس يا ست.... بقولك مش راضى يرضع ولا ينام يا دكتور
 حاضر ....... هارضعهولك..... وأنيمه.............
 
 والله يا باشا...... مره واحد ومراته جايين هنا غرفة الطوارئ..... واخد بالك يا باشا.....غرفة الطوارئ....... بيشتكوا إنهم متجوزين من 3 شهور ولسه محصلش حمل............. رحمتك يااااااارب
 وآخرة المواخر يا باشا...... واحدة جت مغمى عليها وبعد ما فوقناها وعملنا لها اللازم كتبت لها على خروج قالت لي...... مش ممكن يا دكتور أستنى هنا يومين كمان....؟؟؟؟
 سألتها ليه يا أبله......؟؟
 قالت أصل أخت جوزي في البيت وعايزه أستنى لحد ما تسافر......
 
 أنا راضي ذمتك يا باشا......... اللي بتشوفه ده مقابل200 جنيه ف الشهر........ من حقي أتنرفز ولا لأ......؟؟؟؟؟؟؟؟
 
 وإذا تركنا الطبيب البشري والتقينا بأحد أطباء الأسنان.........، دكتور السنان غير أي دكتور تاني يعني لازم تتوفر فيه صفات معينه أولا مهم أن مناخيره تكون مزوده بشفطات..... وعنده قدرة على تحمل الروائح الكريهة ولازم جهازه التنفسي يكون عنده حماية ضد الغازات السامة الصادرة من فم بعض المرضى لأن البق بيختلف من بني آدم للتاني، قال لى أحد أطباء الأسنان الشبان بالمستشفى.....
 
 والله يا دكتور أنا بجيب معطر لرائحة الفم على حسابي كل يوم عيادة عشان المرضى..... وإلا مش هاعرف أشتغل... وبسؤال طبيب شاب آخر جاوب جواب غريب جدااااااا قال شوف يا باشا....... أنا لما بيجيلى عيان ريحة بقه زي البكابورت ع الصبح بقوم واخد نفس عمييييييييق زي ما أكون هاغطس في البحر وبقول في سري توكلت على الله وأشتغل.......ومطلعش النفس إلا لما أخلص.
 
 وبسؤال إحدى الدكتورات.... قالت.... لا.... أنا بستخدم الماسك على مناخيري على طول أنا ذنبي إيه واحد فاطر بأتنين كيلو بصل وجاي العيادة الخارجية ع الصبح عشان أكشف على سنانه، أنا عارفه...... كلية التجارة كان عيبها إيه....؟؟؟؟؟
 
 وحسن الختام..... عندما التقيت بالزملاء الأطباء البيطريين.......... فاكرين رشدي أباظة في فيلم...... آه من حوا....... كان نموذج رائع للطبيب البيطري صاحب القلب الكبير العطوف على الحيوانات، دلوقتي معظم الأطباء البيطريين بيشتغلوا في شركات الأدوية وسابوا التخصص الأصلي ابتاعهم...... وبالبحث في الوحدة البيطرية في المنصورة وجدت ضالتي المنشودة... دكتور أشرف....... طبيب بيطري في الوحدة.... وعنده عيادة للحيوانات الأليفة.... ابتاعة ولآد الذوات، ولما سألته عن حاله..... قال.....
 
 الحقيقة أن أصحاب الحيوانات هوما اللي بيشكوا.... وهوما مش فاهمين أساسا الحيوان فيه إيه... مره جت لي واحدة بتعيط ومنهارة جداااا ومعاها الكلب ابتاعها، سألتها حضرتك بتعيطي ليه....؟؟؟؟
 
 قالت لى أن الكلب ابتاعها عنده حاله غريبة جداااااا كل ما يشوف مرآته....{الكلبه...} يسيبها ويمشي أو يدور وشه الناحية الثانية....فجابياه أكشف عليه وأعرف هو بيعمل كده ليه..؟؟ كشفت عليه.... لقيته سليم...... فقلت لها... الكلب سليم يا مدام.. قالت لى خلاص أسأله هوه بيعمل كده ليه..... أنا ماليش دعوه مش انت دكتور... ودي عيادة خاصة.......؟؟..{ إرحمني..}.
 
 واحده تانيه...... جابيه لي القطة ابتاعتها... وبتشتكي إن ضوافرها بتتقطم وعايزه حاجة تقويها......؟؟؟؟؟؟؟..{ إرحمني..}
 
 وواحد تاني كان هايشلني والله يا دكتور.... جايب لي الكلب ابتاعه وبيشتكي إنه ماعدش بيشوف كويس..... كشفت ع الكلب وكتبت له قطرة ومرهم وبعد أسبوع لقيت صاحبنا جاي ومعاه الكلب وبيشتكي إن الكلب لسه ما بيشوفش كويس ومصر أني أعمل له نضارة.....؟؟؟؟؟؟..{ إرحمني..}
 
 وبنت فافي أوي جايبه السلحفاة ابتاعتها.... بتشتكي أنها يتمشي بالراحة أوي..............{إرحمني..}
 
 وواحدة مره جابية الكلب ابتاعها وملبساه بلوفر ولما سألتها إيه ده يا مدام..؟؟
 ردت...... أصل كوكي.....أخد شوور..... وطلع على طول ع الجنينه وكان الجو برد ومن ساعتها وهوهوته...... مبحوحة...........{ إرحمني....}..
 
 ما رأيك يا عزيزي قارىء المدونات....... هل تحب الانضمام لعائلة الأطباء.. أم عائلة النابت شو أرحم.........
 05/07/2006
 
واقرأ أيضاً:
حتشبسوت... قفلوا عليك يا حلوه تابوت / حدث في يوم شم النسيم......