يوميات مجنونة صايمة (5): كرة القدم

يوميات مجنونة صايمة (4):النقاب
 
طول عمري بحب الكورة لدرجة إن ماما كانت بتغير إزاز الصالون كل يومين مرة!
ولدرجة كمان إنها قررت إنها تبقى مش زي بقيت الأمهات وتشتركلي في فريق كرة قدم!محدش يستغرب أصل أنا جامدة قوي وطبعا اشتركت في أول فريق كرة بنات في مصر وعملت عمايل مهببة ورقّصت تلت أربع البنات المهافيف اللي معايا وكنت بأنزل أصلا علشان أكسرهم عشان يبطلوا دلع وصويت طول الماتش وكل واحدة تشدلي شعر التانية لما تتاخد منها الكورة!
 
 لكن للأسف كبرت ومعدش نافع موضوع الكورة ده، واضطريت أعتزل الملاعب بدري جدا وكان يوم ولا يوم اعتزال الخطيب... آه أومال وفضلت أقول أنا كمان شكرا ألف شكر ألف ألف شكر زي ما كان بيقول ماتش اعتزاله.
  
 يااااه إيه ده الشباب اللي بيلعبوا دول يا ربييييي
 عاللعب العار يا بني باصي يا أناني أعوذ بالله الواد ده لازم يطلع بره الملعب أنا نازلالهم هه
 - أيوة يا كابتن معلش الشاب ده مش عارف يلعب ولازم يطلع بره ليخسّر فريقه
 - نعم ممممش فاهمانتي إيه بالضبط؟
 - إيه إنت إيه دي؟ أنا بني آدمة إيه مش واخد بالك
 - آه بني آدمة في الشكل لكن التصرف مافتكرش
 - ليه عاوزني أشوف الغلط وأسكت
 - يا رب ارحمني أنا قلت أم اليوم ده مش معدي على خير في إيه يا ماما عاوزة تتعاكسي ولا حاجة؟ إنت مش حاسة إنك بنت؟ 
 - إيه ده إنت هتلبخ ولا إيه أرجوك لو سمحت أنا أصلا زميلة
 - بفففففف يا مثبت العقل في الرأس يا ربببببببب أرجوك إيه وزفت إيه واحدة بنت تنزل لشباب بيلعبوا كورة في ملعب وتقولهم طلعوا الواد ده بره مابيعرفش يلعب أفهمها إزاي أنا دي؟ 
 إنت لسه طالعة طازة من السرايا الصفرة
 - هيهيه خفيف قوي... آه لسه طالعه لما لقيتك طلعت إنت كمان
 - ما تنزلي تلعبي معانا أحسن...
 - آه ممكن ليه لاء وهوريك هعقدوكوا وأبهدلكوا إزاي أنا حطني وينج يمين أو ديفينس يمين
 - اللهم طولك يا روح يا بنتي ما تخلينيش أفقد أعصابي إنت أهلك فين؟ 
 - يا نونة يا نونة قومي يلا علشان تساعديني في الفطار
 - إيه ده إخص معقولة كان حلم يا خسارة وكم من حلم لن يكتمل!!!! 
 ويتبع >>>>: يوميات مجنونة صايمة (6): الودود
 واقرأ أيضًا: 
 تاراباتاتوووو / من أنت؟