كان واحد من الناس مشاركة1

كان واحد من الناس مشاركة
أرسل محمد حسن حسن (23 سنة، طالب بكلية الهندسة، مصر) يقول:
كان واحد من الناس  
السلام عليكم؛
المشكلة أختي أنه كان واحد من الناس ما كنوش اتنين أو تلاتة أو أربعة؟؟
يمكن لو كانوا أكتر كانوا توحدوا وساعدوه ولكن أمة فقدت أهم ميراث لديها وهو الأخوة وميثاقها وأن أي مسلم في أي مكان هو أخ لك أو أخت لك وجب عليك الدفاع عنه وكفايته أصبحنا نعيش فرادى وإني لأتعجب.
  
أنت تهدي القصة إلى أولي الأمر؟ طيب خليهم فاسدين الناس معندهاش اللي تساعد بيه راجل زي ده؟؟
  
أختي والله إن القلب ليدمي لمثل هذه الحالات وأجدك تقولين ما أنا بدعي لهم في كل صلاة؟؟ وبشارك في أعمال خيرية سؤال هل تواضعنا نحن وذهبنا إلى بيوتهم مرة في العمر لا والله نتكبر ونقول كفاية بنودي لهم الزكاة من على الباب والصدقات ومش ناقصة ضياع وقت؟؟؟
لكن لما يضيع قدام المسلسلات الهايفة والجرايد الفاضية عند كل المسلمين، ما فيش مشكلة؛
  
لما يكون المسلسلات اللي كانوا بدعوى زمان إنها لمعالجة قضايا المجتمع تصل للسفه بشكل مبالغ فيه وهيافة (ويتربى في عزه) لدرجة الواحد اعتزل فيها التليفزيون وأصبح على الإذاعة فقط وهما قناتين الحلوين برضه منهم إذاعة القرءان الكريم.
  
لما يكون السفه وصل بينا لأن واحد مش لاقي يأكل وكل المسلسلات بتتكلم عن الصعايده سنة 50 لأني بصراحة أنا شبه صعيدي وعندنا في بلدنا ما فيش الهجص اللي بيجي انتهى من عشرين سنة وتلاقي كل المسلسلات واحد غني وعنده فلوس زي الرز (ولو أنه غلي اليومين دول)، وبعدين ياحبة عيني لما تنتقديه يقولك فئة موجودة في المجتمع؟؟
  
وواحد واتنين وتلاتة ومليون من الناس دول مش من 90 % من المجتمع برضه؟؟
وتلاقي الأخ أو الأخت لازقة في شاشة التلفزيون ومنتظرة الحدث القادم وما فيش في جيبهم اتنين جنيه طيب هي الشيك أبو متين ألف جنيه راح فين ومين سرقه ويمصمصوا شفايفهم يا حبة عيني وطبعا الشباب اللي زي الورد في عمرنا ما عدنهوش غيرطيريقين إما ياخد المثل الأعلى ويشتغل حرامي ويبقي عنده شيء وشويات ورشاوي؟؟
وإما يتوكل على الله ويعيش يومه وده غالبا يعني هو السائد أو يأخذ الطريق الثاني فيعمل إيه، يقوم مكتئب ومنتحر؟؟ السؤال الأول أين المجتمع؟؟ ألم يلاحظ المجتمع من سنة 52 أنه في ضياع؟؟ ألن يقف لحظة وبدل ما ينزل دعاءه على الظالمين وللمظلومين يطلب مطعمه أولا؟؟
  
الدعاوي وحدها لا تكفي فسألي له الرحمة لكن مش كل مرة هيقابلك موقف تكتبي وتفرغي الشحنة ودعوتين كمان ويبقى تمت إيزا يقولك ادعي لأهل العراق ماشي ادعيلهم ولكن خدي خطوة جد ما نبقاش ماسكين منتجات أمريكا وبندعي عليهم ما نبقاش بنأكل كلاب مطبوخة في ماكدونالدز وندعي عليهم ما نبقاش بنرمي الأكل في الزبالة في رمضان ونتسائل، هو الفقراء بينتحروا ليه؟؟
  
والله إن شاء الله لو شاء الله لي بأن أمتلك أموال فسأجري بيها أولا تغيير جذري في مساعدة المجتمع على التخلص من عاداته السيئة والفردية وبعدين أبقى أدور على الغلابة لأن المشكلة من الأغنياء اللي قافلين عليهم بيتوهم مش الفقراء اللي قافلين بيوتهم أنت اشتريت المصري اليوم بجنيه.
  
عارفة على طابونة العيش بيحصل كام خناقة وكام رشوة علشان يجيب بنصف جنيه فقط عيش؟
شفتي إن الموضوع موضوع ثقافة ودين واجتهاد مش فقر وغنى، الست تقلك ما بخبز وكانت أيام ما يعلم بيها إلا اللي خالقها وأقولها يا حاجة أنت واحدة من المجتمع المفروض منتجة وبدام ربنا كرمكم وفتحوا قدامكم ابقي اخبزي رغيفين فينو في البيت بلاش البلدي بدل ما تحولوا المجتمع لاستهلاك يبقوا نفس الوقت تأكلوا حق الفقير اللي الدعم معمول ليه فنجد الأغنياء يتهافتون على الأفران والمصالح بنفوذهم ومعارفهم وفي الأخر السلع المدعمة في صفيحة القمامة 3/4 منها أو في أكل الطيور ولا عجب، وصدق من قال فعلا في عصرنا الحالي البعد عن الله والفردية والبعد عن الدين.
  
لا تتعجب فيمن هلك كيف هلك ولكن تعجب من من نجا كيف نجا؟؟!!!!!
تركت لك الإجابة، وعلى فكرة بما أنك مناضلة ضد الجبروت الأمريكي إحنا مش محتاجين مناضلين ضده أو معه إحنا محتاجين أن نكون مناضلين لأجل الأقصى والإسلام ضد أي عدوان كان يدعي ملتنا وأحييك على اختيار اسمك، ولكن أمريكا ليست مشكلة المشكلة الفكر الصهيوني والأفكار السوداء وقراءتها واستنباطها والتعامل عليها مش نبقى عارفين النوايا السودة ونروح نعمل سلام؟؟ عموما بارك الله فيك وجعلك من محررات الأقصى.
 
إن شاء الله وإيانا سلام
 وأرجو الرد ولا تنسينا من دعائك وآسف للإطالة
 سلام
  26/9/2007
  
 ردا على المهندس محمد حسن حسن، السلام عليكم ورحمة الله وبركاته؛
 أشكرك كثيرا على مشاركتك القيمة وأعتذر على التأخر في الرد فيبدو أن لدي مشكلة في الإيميل الخاص بي وقد رددت في نفس يوم وصول رسالتك ولكن لم يتم الإرسال على ما يبدو أكرر اعتذاري أما بخصوص موضوع (واحد من الناس) فأنا أتفق معك أن معظمنا يقف موقف المتفرج ويكتفي بالدعاء أو بالكتابة مثلي وهذا موقف سلبي لا تتصور أنني أرضى عن أدائي أو أنني أجد أن هذا كافي ولكن أحاول وهذه هي البداية وأرجو من الله أن يوفقنا جميعا إلى ما يحبه ويرضاه.
   
وأجد أن رأيك في أننا يجب أن نتحول من مجتمع استهلاكي إلى مجتمع منتج أمر جدير بالتطبيق حقا فنحن نملك ثروة بشرية قادرة على تحقيق المعجزات لو تمت إدارتها بشكل جيد مع التركيز على الصناعات الصغيرة وخاصة اليدوية وشغل الإبرة أما عن اسمي فقد جعلته في البداية (عاجزة في زمن الجبروت الأمريكي) وها أنا ذا أحاول التخلص من عجزي والبدء بمجاهدة نفسي قبل أي شيء ولذلك جعلته (مناضلة رغم الجبروت الأمريكي) وأقصد أنني مجاهدة رغم أي شيء حتى وإن كان هذا الشيء هو الجبروت الأمريكي أكرر شكري لك وأسعدتني مشاركتك القيمة، والسلام عليكم ورحمة الله وبركاته.
ويتبع >>>>: كان واحد من الناس مشاركة2 
واقرأ أيضًا: 
تحقيق اللاشيء / مناضلة وعزت القمحاوي......والبرئ / خيط الحكاية