لما كنت... حرامية

 بفتح صندوقي الكبير لقتني شايلة فيه حاجات عمري ما كنت محتاجاها بجد، ورك الفرخة الكبير اللي أخدته من ورا ماما عشان مكانتش عاوزة تديني الورك الكبير، وبسكوتة بربع جنيه إدته الأبلة لصاحبتي اللي كانت بتغش في الامتحان عشان هي شاطرة، وفكرة الواحد عاوز يعمل مشروع قصاد فكرتي اللي خدها مني وكتبها باسمه، وجونتي أخضر قديم مالوش فردة كان نفسي يبقى عندي بس بابا كان دايما يقول ده دلع مالوش لازمة فخدته من عند عمتو بس نسيت إنه لازم يبقى الفردتين!، ضحكت وقلت لنفسي ليه الهبل ده كله؟
 
 ولقيت سيل من الذكريات مش عارفة احتفظت بيه ازاي وليه؟ شفت بابا لما كان بيحط معلقة عاجباه في شنطة ماما واحنا خارجين من المطعم، وشفت ولاد خالة صاحبتي وهما بينطوا من فوق ماكنة المترو من غير تذاكر، وشفت رجل أعمال كرشو منفوخ من الفلوس وهو بيمضي على عقد شرا أرض في أهم حتة في بلدي بمبلغ ما يقدرش يشتري كيلو خيار، وشفت الممرضة اللي فتحت علبة الدوا وكتبت تمنه كله على مريض وهي عارفة انه مش هياخد منه غير حبيتين بس والباقي لجارتها اللي بتقعد بعيالها على ما تيجي مالشغل، وشفت الاغنيا وهما بيحطووا ملايين الدولارات في يخوت وسايبين شباب معنسين -ينفع تتقال عالشباب- وبنات متعقدين مش لاقين لقمة مش جوازة، وشفت الدولة وهي بتاخد فلوس على النضافة وأكوام الزبالة بقت سكن لناسها عايشين فيه ومن كترها وتنوعها بقت بتدفي في الشتا القارص ومكان ياكلوا منه بالمرة؛
 
 وشفت بتوع البرمجة العصبية وهما بيعملوا الفسيخ شربات وبيخلوا الناس تزحف وراهم، وشفت دكتور الجامعة وهو بيضغط على تلاميذه عشان يعملوا بحث يخليه أستاذ دكتور ويكتب عليه اسمه، وشفت الشطرنج اللي على النت وهو واكل دماغ رجالة بشنبات، وشفت شيخ في دار تحفيظ بياخد فلوس على التحفيظ مع إن فيه رجل خير متبرع بتمن التحفيظ للدار!، وشفت رجل دين بياخد فلوس عشان يطلع الصك، وشفت واحد بياخد فلوس كتير من ناس مهابيل في قوضة ضلمة عشان بيقول كلمة غريبة اسمها عفركوش ابن برتاكوش!؛
 
 وشفت الخدامة لما كانت بتحط صباع الروج في صدرها، وشفت البنت اللي كانت بتلهف الواد بتاع صحبتها، وشفت الواد اللي كل أحلى أكلة كفتة وكباب من اللعب مع أصحابه بالكوتشينة!، وشفت المدرس إللي يقعد ربع ساعة في الحصة، لكن صحيت من الذكريات على ريحة غاز رهيبة طالعة من المطبخ جريت ودخلت المطبخ لقيت ابني بياخد الورك الكبير بتاع الفرخة من ورايا ولقتني بقوله والله العظيم ما عايزاه أنا بس كنت عاوزة أعرف السبب!، وخرجت وأنا حزينة بفكر وآخر كلمة قلتها للولاد قبل ما أخرج اقفلوا البلكونة كويس وأنا مش موجودة لحسن يدخل عندنا حرامي.
 
 واقرأ أيضاً:
 لما كنت / لما كنت...... مأذون