(13)
هلوسة
أشعر بمعظم أنواع الهلوسات التي يشعر بها المرضى الذهانيين، فأرى وأسمع وأشم أشياءً لا يحسها إلا أنا وأصدقائي من هؤلاء المرضى، فأرى أمامي في الغرفة أشخاصاً مرعوبة ومرعبة في ذات الوقت، يتخبطون من هول الارتباك. أسمعهم يسبونني لا لشيء سوى أني واحد من ضمن أربعين مليون. يتوعدون لي وكأنني قتلت عزيزاً لهم. أشم فيهم رائحة الغدر والعرق الممزوج بالرعب. لا أعرف ماذا أفعل هل أهرب من الغرفة وأجري على غير هدى، أم أهاجمهم وليكن ما يكون فلست أنا الأشد رعباً بل هم الأشد.
(14)
درويش
الراجل البرادعي ده مالوش في شغلانة الرياسة دي شكله طيب ودرويش. تشوفه ماشي تحس إنه واحد مننا، مش عليه هيبه كده زي الناس المحترمة اللي بيحكمونا، الإفترا إيه بينط من عنيهم نط. الراجل من دروشته بيقول إنه مش بيحب الحرام وإنه شبعان والمنصب مش حيضيف له أي ميزة، ورافض جواز المال والسلطة. طيب عايز إيه يا عم ما تسيب المنصب للي عايزه وبيدور عليه وما تبقاش قطّاع أرزاق... آه هو أحنا كده يا مصريين نسيب الدنيا كلها ونبص في لقمة المصري اللي زيّنا؛ ما هو واخد على حركات المصريين مع بعض في الغربة.
(15)
عاد لينتقم
يدعي السيد البرادعي أنه أخيراً تخلص من أعباء المنصب الدولي الذي كان يمنعه من الحديث في الشئون الخاصة بمصر. أما الآن وقد تخلص من أعباء هذا المنصب فإنه سيتكلم ولن يسكت. المصيبة إنه رافض تقديم أوراق إنشاء حزب علشان هو بيحترم نفسه. الله الله الله طب ليه الغلط، مصيبة لو إن الأحزاب الثانية احترموا نفسهم وسمعوا كلامه. يا ربي الحكومة تلاقيها منين ولاّ منين. ملعوبة يا كابتن... الحقيقة أنت كده سببت إحراج جامد قوي بس بصراحة مش عارف لمين فيهم. بيقول كمان إنه مش هو اللي حيغير... إحنا اللي حنغير طيب ازاي؟ يكنش نقدر وإحنا مش عارفين إننا نقدر؟! مصيبة لنكون نقدر واحنا مش عارفين؟ كده البرادعي بيحرجنا إحنا كمان، الراجل ده شكله جاي ينتقم؟ بيقول إن كل حاجة سياسة يعني إيه مش فاهم؟ يعني اللي يرمي نفسه قدام المترو يبقى بيشتغل سياسة؟ مصيبة كمان ليكون الوضع المزري اللي عليه الرجالة الأيام دي برضه سياسة؟ في ليلة سقوط بغداد الستات لبست أفرول مُمَوْه، طيب دلوقت يلبسوا إيه "ماسك"؟ كده حتقلب مع الرجالة بقرفة ويبقى دخلنا في عجز كلي!!
(16)
قالوا له
قالوا له إن الموضوع صعب ومش سهل زي ما بيحاول يوهمنا. قالوا له إننا حاجة كدة "نظام باروكراتي معقد". الحقيقة أنا مش عارف لا الكلمة الأولى ولا الثانية ما خدتهمش في المدرسة، إنما التالته عارفها ومدام قال معقد يبقى الراجل صح وبيتكلم على مصر. بس الكدب خيبة أنا الحقيقة سمعت كلمة "نظام" في فيلم ثقافي، كنت شفته في السر، والواد في الفيلم قال "المشكلة في النظام يا بهايم". ساعتها برضه مفهمتش يقصد إيه بس بهايم سمعتها في المدرسة كتير فعرفت إنه بيتكلم علينا.
(17)
استك منه فيه
عم البرادعي بيوهمنا انه مواطن وعارف حقوقه، وح يجتمع بالناس مطرح ما هو عايز، إيه يا با حرام عليك طب انت لابس شراب استك منه فيه، إنما إحنا حنيجي لك حافيين. يعني عسكري أمن مركزي واحد يقف على أول الطريق الصحراوي حنجري كلنا لغاية لما نوصل مرسى مطروح. وبعدين انت واثق قوي كده من الاستك؟! ياراجل حرام عليك بلاش سذاجة انت فاكر نفسك مين ح يعملوا لك تحقيق دولي يعني؟!! المصالح بتتصالح يا عم البرادعي. أنا خايف عليك صدقني، يجي بعدين عيل صايع ابن حرام يعملها والتاني يروح هوب طخه ويخلّص عليه؛ قال يعني بيتعامل مع الأرهابي علشان ينقذك ويبقى خلاص يا معلم عملية نضيفة مية في المية، وسلم لي على الحريري.
(18)
عايز حقي
عم البرادعي عمّال يبيع علينا كلام مش فاهم منه ولا حاجة، قال ايه مصر وقعت على معاهدة تتناقض مع المادة 76 في الدستور وبالتالي لازم المادة دي تتغير، بالذمة ده اسمه كلام عايز... تفهمني إن الحكومة بصمجية وبصمت على حاجة من غير ما تقراها، ولاّ الحكومة الرشيدة بتاعتنا تبع كله في المواني يابا ومحدش واخد باله، كله حبر على ورق يعني. عايز تقولي إن ممكن سيادتي مثلاً مثلاً أرفع قضية على الحكومة واكسبها... يا حلاوة يا أولاد.
(19)
اجمل حاجة
اجمل حاجة أكيد حنكسبها من ترشيح البرادعي للرئاسة، أن الرئيس مبارك حيضطر لدخول المعركة الانتخابية بإعتباره الوحيد اللي ممكن ينافس البرادعي، لأن لو أي حد تاني فكر يدخل الانتخابات لازم حيسقط أو تقوم ثورة في البلد. وأغلب الظن ان حتحصل صفقة مع البرادعي يعني ينسحب أمام الريس على وعد إن المادة 76 تتغير، وهو اللي قال يغيروا المادة ومش مهم أكون رئيس. ولما ينسحب أبقى قابلني، يحصل مماطلة عملاً بالحدوتة اللي بتقول يا أنا مت يا الملك مات يا الحمار مات وساعتها أنا واثق ان محدش ح يعيش غير الحمار.
(20)
أنا مش معاهم
بصي يا حكومة أنا مش معاهم، الناس دي نيتها وحشة وعمّاله تقول كلام غلط وابصم بالعشرة على كده. قال إيه بيقولوا خروج آمن. قلة أدب؛ وقال خمسة مليون قال!!! ده في اليوم الواحد أصغر عيل فيك يا حكومة بيعمل خمسة مليون... قال خمسة مليون قال. أوعوا تصدقوهم دول بيغرغروا بيكم وعايزينكم تخرجوا وبعدين هب يقفشوكم واحد ورا التاني وبالقانون. انتم ناسيين المعاهدة بتاعة مكافحة الفساد اللي بصمتوا عليها، ولاّ انتوا عملتوا حساب اليوم ده ومرضيتوش تبصموا. أنا قلت اللّي عندي وخلصت ضميري قدام ربنا. وبعدين مين قال إن عندنا حد بيخاف علشان تدوْروا على خروج آمن. الرجاله عمرها ما تخاف ونروح بعيد ليه الله يرحمه تشاوشيسكو عمره ما خاف. الأبطال أبطال رغم أنف الحاقدين. في النهاية أنا واثق في الحكومة فرداً فرداً، وفي أداء الحكومة وبقول بمنتهى الثقة لحكومتنا الرشيدة " ولا يهمك..أ رمي ورا ضهرك". ومفيش مانع لو ضغط أي واحد فيكم ارتفع من كلام الحاقدين إنه يسافر على نفقتنا ومن جيبنا الخاص علشان ضغطه ينزل ومش مهم لو ضغطنا احنا يرتفع.
ويتبع:>>>>>>>>>>>>:: حكاوي القهاوي (5)
تعليقات الأعضاء