(34)
لك الله يا مصر
أظن أن حكومتنا الرشيدة قد نجحت في عمل صفقات مشبوهة ليتحول بعض من مؤيدي البرادعي ليصيروا خصوما له. كما تحاول وفي نفس الاتجاه استخدام رموزا فنيه لتنفيذ حملة التشكيك والتشويه. عموماً إذا وجد المواطن المضحوك عليه من الحكومة والمعارضة أن العضو المعارض جالس في برنامج على شاشة التليفزيون منفوخا منفوشاً تعلو وجهه ابتسامة عريضة، فليعلم هذا المغفل وهو طبعا في هذه الحالة أنا وغيري من المشاهدين، إنْ أخينا في المعارضة قد قبض المعلوم ونال المرام واسترد كرامته. جتنا نيلة في حظنا الهباب ما لنا إلا الضرب على القفا.
(35)
مجرد إقتراح
أتفق تماماً مع وزارة الداخلية في أن المظاهرات اللي عمّالة تمشي في البلد بتعطّل المرور، وبعدين هي الداخلية ح تلاقيها من مين ولاّ مين، يعني كل حمار يعدي يوقف حال البلد، ناقصة كمان الأوباش دول. لهذا أتقدم بإقتراح يارب يلقى القبول عند المتظاهرين وبرضه الداخلية والخارجية وكل الجهات المعنية. أقترح إن المظاهرات تسيب الشوارع الرئيسية الكبيرة في حالها وتخليها في الشوارع التعبانة المتفرعة من الشوارع الكبيرة. أول فايدة طبعا راحة الحكومة ودي مش قليلة هو إحنا عايزين حاجة غير راحتهم. المتظاهرين برضة ح يستفيدوا لأن الأمن صعب يحط عربية في كل حارة وكمان عربياتهم كبيرة مش حتدخل، غير كده ح يجيبوا منين عساكر أمن مركزي تكفي الحواري دي كلها، خاصة إنهم بيحبوا يكون عددهم كبير ويخوّف، وبكده حيبقى صعب يمسكوا العيال بتوع المظاهرات. وكمان يا أولاد مفيش جراج تتفتشوا فيه ويقلّعوكوا هدومكم. غير كده بقى الحواري ماليانه طوب يا معلم. يعني إن شاء الله الكل ح يستريح، قولوا آمين.
(36)
إرهابي ولاّ شيوعي ولاّ الهوى رماك
الحكومة بتحب تصنف المعارضة علشان تعرف إزاي تتعامل معاها، وإزاي تخوف الناس منهم. يعني زمان مثلا كانت الحكومة تقول على الواد من دول إنه شيوعي يبقى اللي يحقق معاه لازم يركب دقن ويتكلم بقال الله وقال الرسول. وتقول للناس أوعوا تمشوا معاهم دول كفّار ووحشين. وبعد ما استريحت الحكومة والحمد لله من الشيوعية طلع لها الجماعات الاسلامية وهنا بقى اللي يحقق معاهم لازم يسب الدين، وتقول الحكومه للناس أوعوا الأرهاب، أوعوا الجماعة المحظورة، أوعوا الأمن القومي حيقع. دلوقت الحكومة بقت في ورطة علشان العيال بتوع 6 ابريل دول مالهومش ملة، ماشين من دماغهم ومالهومش كبير تعرف الحكومة تتكلم معاه، تساومه، تخوفه، تسجنه، تعمل معاه أي مصلحة علشان العيال دي تتلم. طب هي الحكومة ناقصة لخبطة، مش عيب كده يا واد أنت وهو منك له له له، مين قليل الأدب اللي مسلطكم على الحكومة، ترضى حد يعمل كده في أبوك ولاّ أمك. يصح برضه تخلوا الحكومة تجري وراكم زي اللي بيجري ورا عربيات الرش، أخس عليكم أخس. عموما يا حكومة أنا عملت اللّي عليّ وحذرتهم وقلت لهم لازم يشوفوا لهم كبير علشان تمسكوه، وكمان يشوفوا لهم يافطة سهلة يقفوا تحتها تعرفوا تفهموها، مش 6 زفت ابريل. اللهم إني قد بلغت اللهم فاشهد.
ويتبع:>>>>>>>>>>>>:: حكاوي القهاوي (10)
واقرأ أيضاً:
هيلن كيلر معجزة لن تتكرر / ولمَ لا؟/ حكاوي القهاوي
تعليقات الأعضاء