إلى مريض الفصام

يا خساره على الإنسان
لو ينسى انـه إنـسان
يتصرف من غير عقلْ
ويعيش همجي ومختلْ
ويقولوا دا صابُه جنانْ
يا خساره على الإنسانْ

***
هربان م الدنيا الحقيقيّة
واختار الدنيا الوهميّة
اللي بناها من خيالاته
واللي بيحرسها بضلالاته
وهلاوس سمع وبصرية
من كتر ضغوط الإحباطْ
انفصمت فيه الشخصيّة
واستغنى عــن العالم كلُّه
مش فارقَهْ معاهْ اللي حاصل له
مش فارقهْ فرَح ولا أحزانْ
ما خلاص، اتمسح الوجدانْ
يا خساره خساره على الإنسان

***
أنا عارف إنك يا ما حزنت
وقاسيت م الدنيا ويا ما فشلت
واتسدت كـــلّ الطرقاتْ
وف وسط طريق العجز وقفت
واما حسبتْ الحِسَــــاباتْ
وبكل الحسابات إنت خسرتْ
ولاقيت نفسك وسط الصمتْ
انت ونفسك والأحـــزانْ
مسجــون بين أربع جدرانْ
يا خساره خساره على الإنسانْ

***
وفضلت في نفسك مسجونْ
ولاقيت في السجن سعادة
ما لاقيتها في كل الكونْ
على كيفك ماشي حياتكْ
مِتْوَنِّــسْ بين ضلالاتكْ
حاسِــسْ بالمجد ف ذاتك
وان انت عظيــم الشانْ
ويقولوا، مــاعادشى يهمكْ
لو قالوا دا صــابُه جنان
يـا خساره علــى الإنسان

***
لو كنتْ صبرتْ شويَّه
وسايرتْ عِنَادِ الدنيا
كان ممكن تِحْلَى معاكْ
وتْنُولْ م الدنيا مناكْ
ولا صابْ النَّفْس أذيَّة
ولا عشتْ بليدِ الوجدانْ
مسجونْ بين أربعْ جُدرانْ
يا خساره خساره على الانسانْ

***
والخوفْ أنا شايفُه ماليكْ
والشَّـكْ باين في عنيكْ
على طول ماانتاش مِآمِنْ
للناس اللِّي حــواليك
مستني الغـــدرِ يصيْبَك
من أقرب واحد لـِــيْكْ
مِـــشْ يِمْكِـنْ إن الخوفْ
هــو اللي بيلعبْ بِــيْكْ
مــا تجربْ تسألْ نفـسَك
طـبْ ليْه الــناسْ تِأذِيْـك؟
هــا تلاقى طبيعــة خوفَك
مُعظَمْــها وسَـاوس فِـيكْ

***
وعـشان بالناس شاغل بالكْ
جالـك وسـواس إن الناس
عَـمَّالَه تتصَـنَّتْ على حالك
وبتِتّـبِعْ خَــطَاويْـكْ
مال الناس بيك، بيهم مالك
طب هـيَّ الـناس فضيالك؟
لاجْـل تراقِـبْ حـركاتك
أو تمــشى ورا مَعَالِـيْكْ

***
والصوت اللي انت مطاوعُه
وأنا شَــايفُه بيُأمُر فيـكْ
بحاجــات إنتَ بتعمِلْـها
وتقول ان انت سامِعْــها
وحْـــي ومِتْنَزِلْ لِـيْكْ
مـا تجَرّب تِهْـرَب مِنْـها
وتقَفِّلْ علــى مَداخِلْـها
ومــادَام كلّ ما تعملـها
مــا بتسـلمشي وتتـهانْ
ويقولوا دا صــابُه جِـنَانْ
يـــا خساره على الإنسانْ

واقرأ أيضا:
 زمن الغابة/ نغومة بنتي/ حكاية عاشق/ الغربة/ إلى مدمن!!!/ إلى مريض الهوس/ إلى مريض الوسواس/ إلى مريض الانشقاق