ياااااه الجزء الخامس.. والله لم أكن أتخيل أن تصل الأجزاء لخمسة.. بس خير أهو كله عشان الناس تشتري.. ونكسب فلووووس.. أمال.. لازم نأكل عيش...!!
هذه المرة الموضوع بدأ يتجه اتجاهات جديدة.. تابعوا معي..!
إنه اليوم المشهود.. يوم خطير.. ومقلق.. قال إيه العميد د.قهري يعمل سيمينار لفكرتي في الكشك.. يا إخوانا.. يا خلق ياهوووه.. عوزه أقولكم حاجة مهمة أوي إن ما فيش مجلس قسم أصلاً في الكشك وإن كل ذا كلام فاضي وحيترمي في الزبالة في الآخر.., كل ذي حركات عشان يقرفني.. ما أنا لازم أستحمل بقى مش قلت يخبط رأسه في الحيط يبقى أنا يتحرق دمي.. ويوم السيمينار يا حضرات.. سألت سكرتيرة العميد على الموعد.. فوجئت إنه أجله الأسبوع القادم.. حاجة تقرف.. ما فيش أي اكتراث (يعنى إيه اكتراث دي؟) بالإنسان ولا احترام ليه أبدًا.. يأجل من غير ما يقول للناس.. ما علينا.. المهم أنا انبسطت جدًا لأن اليوم اللي كان محدد كان عيد ميلادي وأنا قلت يوم مش مناسب.. كويس..
وجاء اليوم.. إن إن آن..(دي موسيقى تصويرية!)..
المفاجأة الأولى: حضور (د.تحت أمرك يا فندم) المناقشة.. ودا رئيس قسم البتنجان
المفاجأة الثانية: حضور د."سلفني ثلاثة جنيه" من جامعة ثانية خالص المناقشة.. خلوا بالكم حيقول آراء جهنمية..
وحضور دكاترة قسم البتنجان كله.. "زملاء الدكتور قهري العميد".. وبدأت المناقشة.. وانبهر الحضور الحقيقة ولقيت الناس بتوع قسم البتنجان برقوا لدرجة إن عينيهم كانت حتطلع بره مكانها!!.. طبعًا مش فاهمين حاجة.. وإيش فاهمهم هم في البطيخ..؟؟ دول ناس بتنجان.. أحسن عشان يحرموا يتحرشوا في اللي مالهومش فيه..
-د.فلتة: أنت ذكرت في الدراسات السابقة تايوان.. كان لازم تذكري تجربة بلاد تركب الأفيال كمان لأنهم عملوا حاجة جميلة..و..و.. (المهم يا جماعة إن الدراسات السابقة ذي ما لهاش علاقة مباشرة بالموضوع، وما ينفعش أجيب تجارب دول ثانية في زراعة البطيخ بدون داع لأن تايوان ذكرت داخل دراسة أجنبية في البحث وخلاص.. كلام تقيل معليش)
أنا طبعًا بلعتها وسكت قلت معليش بجملة التخلف العقلي.. هي يعني جاءت على ذي؟؟
دخل د.سلفني ثلاثة جنيه في الموضوع مع إن تخصصه غير التخصص اللي فيه الموضوع بس معليش دا حبيبنا برضه..., لازم يرمي جردله.. ولا اسمها إيه ذي يدلي بدلوه..
-.د.سلفني ثلاثة جنيه: أنا ملاحظ إنك أخذتي أنواع بطيخ كثيرة أوي في رسالتك.. أمال الباحثين اللي بعدك يعملوا إيه.. مش حيلاقوا بطيخ يدرسوه.. يا نور يؤسفني إني أقولك إن عندك أنانية علمية..!!
يا نهار أسود ومهبب أنا عندي أنانية علمية..؟؟ أنت قاعد في السوق وبتقول مش حيلاقوا حاجة يدرسوها؟؟؟ بس في أساس علمي بيقول إن لو الباحث أخد مجال جديد لازم يأخذ كل أنواع البطيخ الموجودة ويسد الفراغ الموجود لأنه ما حدش سبقه له..! أنت متخلف.. ولا عندك شادر بطيخ خصوصي.., خائف أدرسه واكتشف إنه أقرع..؟؟ أكيد شكلك مش مريحني.. طلعوا الراجل ذا من هنا.. شيلوه...!
رديت وقلت: يا دكتور ذي مسالة يحددها مجلس الكلية الأم التي أسجل بها الموضوع.. فبهت المتخلف عقليًا على الفور.. لأني أفحمته وكأني بقوله بالذوق ذا مش شغلك.. ذي أولوية يحددها احتياج خريطة البحث العلمي في الكلية الأم.. وبطلوا بقى شغل التلت ورقات بتا عكوا ذا..
المهم.. خرجت من السيمينار بأقل الخسائر الممكنة.. فقد حدثت المعجزة التي لم أتوقعها والتي أشعر بسببها أن الله بنفسه يحميني من الشر.. إن العميد .د قهري لم يحضر السيمينار...!! هيـــــــــــــه
***
بعد أيام من السيمينار استدعاني العميد.., في مكتبه دار الحوار التالي:
-يعنى يا نور ما قلتيش إيه التعديلات وإيه اللي حصل ولا عملتي تقرير؟ -فاكر نفسه مدير الأمن المركزي ومغرم بالتقارير- بكل تناكة يمكن تخيلها..
-تعديلات إيه يا دكتور قهري؟
-تعديلات الموضوع؟ مش لازم تعرضيه على القسم الأول .. ثم..
قاطعته بكل حدة وصرامة: وما دخل القسم هنا.. القسم هنا ليس جهة تسجيل ولا اختصاص.. ثم أشحت بيدي وأكملت: ثم أين هو مجلس القسم..؟؟ هو فين مجلس القسم دا أصلاً؟؟ ثم إنك تعلم جيدًا أن هذه التعديلات غير ملزمة لي.. أنا أتحرك في ضوء ما أرى وما يراه المشرف الجديد.. وقد أخبرتك أني غيرت المشرف.. يعني أعمل إيه ثاني.. غيري المشرف.. حاضر.. غيري الموضوع حاضر.. أعمل إيه ثاني؟؟ مش فاهمة أعمل إيه ثاني؟؟
احتقن وجهه بشدة وبقى لون الطماطم المفعصة خاصة وإني أعتبر قد أهنته أمام وكيل الكشك.. والثاني ذا طبعًا مذهول أزاي أنا بكلمه كده..
المهم إن العميد اتلخبط وما كانش عارف يرد.. لأني فعلاً طلعت اللي في قلبي كله.. ما خلتش حاجة في نفسي إلا ما قلتها.., طلعت من عندي كأني فتحت عكا والفرحة حتنط من عيني.. وطلعت فضحت الدنيا عند زمايلي.. وطبعًا هم مشفقين عليا من المصير المهبب اللي ينتظرني.. وكان لديهم الحق.. فقد تلا هذا أيام أسود من قرن الخروب.. أسود من الليل البهيم.. كما قال الشاعر..
***
يا ترى ماذا فعل العميد مع نور بعد الحديث الحاد الذي دار بينهما؟؟ هل يمكن لنور أن تكمل عملها تحت كل هذه الضغوط؟؟ هذا ما ستعرفونه في الجزء السادس والأخيــــر.. تابعوني..
نوووووووووووور
ويتبع:>>>>>>>>>>>>:: من مذكرات شابة مجنووووونة.. الجزء الأخير
واقرأ أيضاً
زينة المرأة ليست للإغراء مشاركة5/ من مذكرات شابة مجنووووونة.. الجزء الأخير/ في مربع ضيق..!/ مذكرات شابة مجنونة(5)/ مذكرات شابة مجنونة(4)/ القدس... نزور؟ ولا ما نزورش؟/ حينما توصلنا الفلسفة إلى العبث!/ في الماراااثون!
تعليقات الأعضاء