الطبيب: أهلا بيك اتفضل ريَّح ممكن أعرف اسمك إيه؟
المريض: أنا (فكَّار بن المتوتر) وعشان كده أنا جايِّ يا بيه
الطبيب: طب إحكيلي طيب قوللي مالك وبتشتكي من إيه؟
المريض: فكرة عنيدة ومستلماني طول الليل زنَّة على وداني
بتجــــــيب فكــــــــري وتـوديـه.
الطبيب: والفكرة من جوه دماغك ولا كلام مسموع في ودانك؟
المريض: جوه دماغي هاتفرق إيه؟
الطبيب: أيوه هاتفرق لكن كمِّل لما الفكرة بتيجي ترَزِّل..
بيكون الموضوع عن إيه؟
المريض: عن أحداث عادية بتحصل بس غريبة بعد ما تحصل
بقعد اعيش فيها وبتخيل وبعيد الموضوع م الأول
وارسم صورة لكل ما فيه
وافتكر الكلمة اللي اتقالت مين كان قالها ومين كان ساكت
والإتنين كانوا قاصدين إيه؟
واستغرب من نفسي وحالي واحلف إني ما هاشغل بالي
ارجع أفكر وبيحلالي إني أطير من فكرة لفكرة
وأنا بستغرب م اللي أنا فيه
الطبيب: مانتاش عارف إن الفكرة تافهة وما لهاش ريحة اللازمة؟
المريض: أيوه أنا عارف بس الفكرة قادرة عليا وهاعمل إيه؟؟
الطبيب: حاول يابني ماتفكرشي
المريض: ياما حاولت لقيت ماقدرشي دا الموضوع مش سهل يا بيه
دا ساعات تيجي الفكرة ياسيدي تحكم لازم أغسل إيدي
أغسلها وبعدين ألاقيها وسخة وأرجع أغسل فيها
وأنا مش عارف إيه كان بيها ولا بغسلها أساسًا ليه
الطبيب: فعلاً حيرة والله معاك دا الوسواس شغال وياك
المريض: أيوه أنا عارف إيه مشكلتي والوسواس القهري حكايتي
بس أنا جاي علشان تشرحلي الوسواس ده جاي من إيه؟
واما الواحد ييجي يفكر مش مفروض على فكره يسيطر
واللي يحبه يفكر فيه واللي يشوفه مابيلزمشي
بره دماغه كده يرميه
الطبيب: ده المفروض والعادي يا ريِّس بس الواحد لما يوسوس
بيكون فكره مش بإيديه
المريض: يعني إرادتي ضعيفة يا بيه؟
الطبيب: مش بالظبط. الموضوع أكبر لما الفكرة بتيجي تنقَّر
بالوسواس من جوه دماغك وتخليك طول ليلك تسهر؟
تقدر يابني تقول مش هاسهر أو في الحاجة الهايفة تفكر؟
المريض: لأ مش بقدر!
الطبيب: عارف ليه؟
المريض: قوللي يا بيه
الطبيب: علشان لما الفكرة بتيجي مش بتكون جايه لوحديها
لا بيكون وياها توتر دا اللي يخليك تسمع ليها
المريض: وان ما سمعتش؟
الطبيب: إن ما سمعتش يبقى ياويلك والقلق اتصاحب على ليلك
المريض: يعني الموضوع أصله توتر ولا حكايتي أصلها إيه؟
الطبيب: الموضوع له أصل وراثي أدى لنقص (السّيريتونن)
وده هرمون في المخ أساسي
المريض: يعني المخ كمان اتلخبط والتفكير مش ممكن يظبط؟
الطبيب: لأ ممكن
المريض: طب قوللي بإيه؟
الطبيب: أيوه اسمع
المريض: رسيني يا بيه
الطبيب: في الأول يلزمنا علاج نظبط بيه (السيريتونن)
والناقص في المخ يزيد
المريض: طب بعدين؟
الطبيب: بعدين يجي دورك إنك تبدأ عهد جديد
وانك تنوي بصدق وجد.. وتحط لوسواسك حد
وإرادتك عاوزنها حديد
المريض: طب مانا عايز حد يقوللي
الطبيب: أنا راح أقولك عاللي يفيد
لما الفكرة بتيجي توسوس جوه دماغك إهدى وركز
واعمل حاجه من الاتنين
ياتحاول تشتيت تركيزها يا تعادل محتوى تأثيرها
المريض: طب قوللي معنى الحاجتين!!!!
الطبيب: بالنسبة لتشتيت الفكرة يعني ماتديلهاش الفرصة
وتحاول تتهرب منها تيجي شمال خش انت يمين
وتغير دايما من وضعك لو جاتلك ع النايم فكره
قوم قاعد واهرب من فكرك
وان كان الوسواس متعود يستفرد بيك وانته لوحدك
أوعاك تستسلم للوحده توه وسواسك في الزحمة
وانسى في وسط الناس مشكلتك
المريض: طب إيه المقصود بمعادلة محتوى تأثير الوسواس؟
الطبيب: يعني اللي الوسواس هيقولو هتروح عامله عكس عكاس
هيقولك وسواسك اسمع قلبك دقاته بقت أسرع
ما يكونش قلبك تعبان؟؟؟؟؟؟!!
قوله أنا قلبي ماهوش تعبان
وان كانت دقاته سريعة اكمني علطول قلقان
المريض: واما الوسواس يجي يقوللي إيدك وسخة أجري اغسلها؟
الطبيب: قول له أنا إيدي نضيفة وحلوة واما تكون وسخة أنا هاغسلها
المريض: طب والقلق اللي بيقتلني لما الفكرة تزن في ودني؟
الطبيب: الفكرة بتزن شوية بس هاتزهق بعد شوية
وعشان كده مطلوب تستحمل في القلق اللي أكيد راح يحصل
واعرف إنه ماهوش هايطول هايروح قلقك بعد شوية
وبقولك أوعاك تطاوعها ولا تسمع بالمرَّة كلامها
وتملِّي تقصد تخالفها وتعارض بعزيمة قوية
واما الفكرة تحس بإنك لا بتتوتر ولا عاد هامَّك
راح تزهق وتسيبك هيَّه
المريض: وبكده هتعالج يا طبيب؟
الطبيب: أيوه بأمر الله ها تطيب وحياتك راح تبقى هنيه
المريض: متشكر خالص واستأذن
الطبيب: اتفضل وأشوفك أحسن
لما تجيني المرة الجايـهْ
واقرأ أيضا:
زمن الغابة/ نغومة بنتي/ حكاية عاشق/ الغربة / إلى مدمن!!!/ إلى مريض الهوس/ إلى مكتئب/ إلى مكتئب !/ إلى مريض الفصام/ إلى مريض الوسواس
تعليقات الأعضاء