مرسم بينده وانا بلكونتي مقفولهْ
خايف أخشه تقولشي من امنا الغولهْ !
ينده و روحي بضجيج القلب مشغولهْ !
بيقول لي إرسمْ . . .
ده الشمس طلـّـهْ
ده الرسم شافي
من كل علّـهْ . . . !
مرسم يعشم قلبي بباليتـّــه (*). . .
و لوحة طفلهْ . . .
من غير بافِـتـّــهْ . . . !
مرسم صغير . . .
بيحاول انه يغيـّـر . . .
بيحول الدنيا لطيارة عيال . . . و يطيـَّـر . . . !
بيقول لي أهلا و سهلا . . . تابع المشوار . . .
و انا رافض ابدأ معاه - من خوفي - أي حوار !
***
يا مرسم الغربة قول لي : ليه أزورك ليه ؟
وما فيش موديل جذاب يحرك البُـرْتِـريـه ! !
أرسم وكل توالي إسود . . . !
والورق إسود . . .
وكل الواني مركوبه بلون اسود . . . !
ما فيش درجات انــوّع بيها في الإسود . . . !
اللون بقى إعتامه كاملْ . . . !
ما فيش ابيض . . .
ما فيش اصفر . . .
ما فيش احمر . . .
ما فيش اخضر . . .
كإن حرام عليّ اللونْ . . . !
انا الذي بتّ في الأوضه على غمومي
أنا الذي لا رفض . . . أو راضي بهمومي
انا الذي ما في يوم انتفض ! ! !
انا الذي طعم الرضا جوه بقه حمض ! ! !
أنا اللي طالع سلالم . . .
أنا اللي نازل سلالم . . .
رقص ع السلالم . . .
رقصت لكن بعيد عن أيـُّـهــا مرقص
مخلص ليوم فرحتي ولدمعتي أخلص
بنطق بكل اللغات والناس تقول اخرس ! ! !
سمعت عن ناس بترقص (فالس) في الشارع
لكن ما عمري لقيت التانجو في الجامع !
سمعت عن ناس بترقص شرقي بلطافه
وعمري ما شفت ديسكو مبني في قرافه !
يا مرسمي . . . عايز ارسم أيه ؟
قلبي سرير والحزن مكفي عليه !
الدنيا واسعه ولكن عندي انا ضيقه . . .
تبقى الفراشه قصادي . . .
وارسم المشنقهْ . . . ! ! !
* الباليتـّـه : هي قطعة الخشب المسطحة التي يحملها الرسام ، ويستخدمها في مزج الألوان .
واقرأ أيضاً:
رِسالة ٌ فـي فـنـُون ِ الـضـّـرْبِ...! / عَـلــــى الـمَـكـْـشـُــــوفِ / قـطــــرة نـــــدى / وجـبـة...!!!
تعليقات الأعضاء