هي دي الديمقراطية الأمريكاني
اللي كتبولها وغنولها الأغاني
هي دي الحرية والعيشة الهنية
اللي وعدوكم بها أول وتاني؟
***
هي دي ديمقراطية بوش صديقكم
اللي بيهندس لكم خارطة طريقكم
ياما نفسي أقولها لكن هتضايقكم
جملة مكسوف إني أنطقها بلساني!
***
اللي عملوه وياأسراكم عاجبكم؟
سجن أبو غريب لو سألتوه هيجاوبكم
والحقايق واضحة خالص بس عيبكم
إنكم بتألهوا فلان الفلاني!
***
اغتصاب الماجدات، قهر النشامي
جيل بحاله جيّ كله من اليتامى
فوقوا وما تبقوش في حاناتهم ندامى
يحكي عنكم لو يعود الأصفهاني!
***
المساجد والمزارات دنسوها
والطبيعة نهبوا خيرها ولوثوها
والحضارة العبقرية دمروها
وانتو نازلين قزقزة لب وسوداني!
***
العراق عمره ما كان أبدًا تكية
أو وسية للعصابة الأمريكية
إزحفوا لو كان لكم فعلا قضية
واطردوا كلاب المارينز بلا تواني!
***
الوطن بينادي لبوا نداه جماعة
مش ناقصكم غير يا دوب حبة شجاعة
احفظوها ورددوها عن قناعة
الوطن هو اللي باقي وكله فاني!
***
واقرأ أيضاً:
إنفلونزا / رباعية كمبيوتر / رباعية التراب / خدعوك / كاس العالم
تعليقات الأعضاء