غطان الحزن موالي
ونار الحب مهما تشب تحلى لي
وأنا اللي على الطريق ماشي
مع الماشيين
ما قلت في يوم وأنا مالي
** **
طويت العمر باجري
بسابق فوق جبين الضلمة فجري
وبعد العمر دا كله
لقيت نفسي
بدور تايه ف عنواني
وأنا أديت الهوى عمري
خدوا مني وما أداني
** **
بنادي عنيك ياحلوة
يا نهر الشوق
يا خطوة لفوق
يا ياسمينة ف جناين شوك
بنادي عنيك تلحقني
تجيني تشد رجلي
تحط أديك في أديا
وتفتح للنهار قلبي
تخش الشمس لعنيّ
أشوف بكره
أغنيله غناويا
وأخلي الفرح جوايا .
حواليا
وأشيل الخوف
وابتديلك يا هوايا
العمر من تاني
** **
غطان الـحزن موالي
ونار الحب مهما تشب تحلى لي
وأنا اللي ع الطريق ماشي
مع الماشيين
ما قلت في يوم وأنا مالي
** ** **
واقرأ أيضا:
معراج التحول والأبدية / لو / قصيدة هاربة من الميدان / خواطر ليلة أرق / ترنيمة سكران بحبك / جرح / من مخطوطات ملك قديم / قراءة في صحيفة الآتي / اخترت لي الموت / الفانوس العفريت ـ الحلم / يا... ... ... ... / هــــو
تعليقات الأعضاء