يبنتولد ينموت
واخترت لي الموت
هامشي على جراحي
واطفي قناديلي
هازرع غناوي
تطرح مواويلي
هابكي على أيامي
هاطلق لها جنوني
وأترجى دنيتنا
تبعد وما تجيني
وحدي هاتوه وحدي
والليل هايعرفني
ونجومه تحضني
ف عنيها ها تشيلني
الراحة في عنيك
راحت وسابتني
ضايع ولا بيدي
ضايع أنا مني
زنزانة يا عمري
ميت وأنا صاحي
اللحظة تخنقني
والعتمة مصباحي
يا بكره إيه جايب
دي الخطوة مقهورة
والموجه واخدانا
لجزيرة مهجورة
خايف أنا خايف
باجري وأنا واقف
والضي في عنيك
عاميني مش شايف
يا قلبي ما كفاية
شفنا وجربنا
ياللا بنا نرحل
للوحة تجمعنا
يا بكره وامبارح
شوك الألم طارح
حوالي .. جوايا
يأسي العدم طافح
يبنتولد يا نموت
واخترت لي الموت
يبنتولد ينموت
واخترت لي الموت
** ** **
واقرأ أيضا:
معراج التحول والأبدية / لو / قصيدة هاربة من الميدان / خواطر ليلة أرق / ترنيمة سكران بحبك / جرح / من مخطوطات ملك قديم / قراءة في صحيفة الآتي / الفانوس العفريت ـ الحلم / يا... ... ... ... / هــــو
تعليقات الأعضاء