تغاريب

مبقتش بتعرف تبني البيت الرملي

مبقتش بتعرف تلعب طاوله معايا

ولا تيجي تاخدني من الشغل الضهر

ونخرج ناكل كشري

وبعد ما نخرج

نجري نسابق عربيات الرش في عز الصيف

كنت حنين قوي على قلبي

كنت تخاف على صورتي الساكنه في جيب البدله

ليوم تتكرمش

فبقيت بتسيبها في بيتنا

وبقيت تنسى تقولي بحبك

.......

-2-

يشغلني عياط البنت وهي بتصرخ :

- بابا

يتوغوش قلبي

أفكر أسمع صوتك في التليفون

اتفاجىء لحظه بأني نسيت النمره

.......

-3-

مليت من فيلم دعاء الكروان

فاكره لما سمعناه اول مره

وبكيتلك يومها وضميتني

غنيتلي

لو كنت يوم انساك
نفسي اشوف الفيلم معاك تاني

.....

-4-

- الواد بيحب

- بيحب؟ أهو ده اللي كان ناقص

ياااااااااااه

فاكر أول مره تقولي بحبك؟

اول مره بنسمع شاديه

اول مره تجيلي الجامعه

.....

-5-

- وحشتنى خروجه الكشري

- مشغول

- طب تيجي نروح البحر؟

- ده احنا ف عز البرد !!

كنا بنبي البيت الرملي جنب البحر في عز البرد

كنا بنجري ونروي كعوبنا بلون الميه في عز البرد

....

-6-

لسايا بكتب شعر

ولسه بنقش الاحلام على بابي

ولسه حروفك الاولى اللي سكناني بتعشقني

ولساك بتحب منير زي مانت

بس مخدتش بالي ابدا ابدا

انك انت كمان

لسه بتسمع شاديه

لأ وكمان لسه بتقرا جاهين
!!!!!!!!!!!

شعر : سمر إمام

 

واقرأ أيضاً:
منتاش ولي / زغرودة