مين هيطيب الجرح

 وببعتلك يا نور عيني كلام مغسول
 من الدمع اللي فـ عيوني
 من القهر اللي جوايا ....
 أنا حاسس يا نور عيني بظلم كبير
 لكن بعذر
 فبكتبلك لكن حقيقة بغلفها أنا بكتب
 كده لنفسي ....
 ومش سامعه ومش بتحسي بالجرح اللي جوايا
 وأنا مكسور
 وبرجع حايش الدمعة وانا مقهور
 وانا معذور وانا مذعور
 ومين حاسس ومن شايف
 دا حتى دمعتي البنور ما بتلألأش غير لما أكون في سريري 
 والأوضة فضا مهجور ....
 وتسألني حيطان البيت على أسمك فأرد وأقولها هي
 هي الحلم اللي متحوش وأنا حاسس
 أهي جايه .. أهه قدامي بسماية
 دا هي طلة أمل فيا .. وهي ضحكاية فوق خدي
 وهي شمعة أمل يضوي
 ساعة ما تضلم الدنيا كده فوشي 
 هي الحلم اللي مش قادر أحكي عليه
 هي الجرح اللي مجروحه .... ومش عارف أطيب منه....
 ..........
 وضاعت ضحكتك يابني
 وضاعت منك البسمة
 وضاعت منك الفرحة
 لمين قاعد لمين ممموجود
 ونص القلب أحبابك واهم جرحوك
 والنص التاني من قلبك
 أكيد أنت
 لكن أنت عايش بيهم
 وهم خلاص خلاص نسيوك
 مدام راضي بعيشتك ديه فاستحمل
 وما تفكرش في الدنيا
 
 وما فكرش في الدنيا
 ... والله
 وجالك يوم ...
 كلام الناس يقطع فيك كما السكاكين
 تحس بقلبك المليان بقى مسكين
 وعشت ياواد لحد ما شوفت أعز احبابنا
 بيبيعك ولا ببلاش
 وعشت يا واد ولسه الجرح مالي الجرح كل الجرح
 وحتى الحزن ما ينساش يطبطب كل يوم
 على قلبك علشان يحزن
 ومين هيطيب الجرح 
 إذا كان السبب هو طبيبك الجراح.
 
 شعر ابن عوف
 
 واقرأ أيضاً:
هل غاثك الأحباب بعد هجيرة / يمكن مش وسواس قهري / ملاك طاهر / مجداف كعود كبريت / حق الصحبة / تخمين