الدنيا خريف

عمِّنا بيقول (الدنيا ربيع)

وبيجزم إن (الجو بديع)

والأكتر من كدا إنه أمرنا
(نقَفِّل على كل المواضيع)

وباقول له يا عم صلاح ياكبير

اسمح لي أخالفك في التفكير

واستخدم جملتك المشهورة
الحلوة مع بعض التغيير

هي يادوب فكرة لتلميذ هاوي
وقالها لأستاذه (الحرِّيف) !

أصل ربيع الخواجات بيكون

منعش، أما ربيعنا فمجنون

زعابيب وتراب وكفاية عليه
إنه أوان لرياح الخماسين

ولهذا يا عم صلاح يا جاهين
اسمح لي أخالفك حبة وأقول

من غير ما ندخّل بينَّا عزول
الدنيا خريف والجو لطيف

وارتحنا خلاص من حر الصيف
والنسمة بتدخل م الشباك

من غير لا مراوح ولا تكييف
والشجر الناشف بكره تعود

أوراقه الخَضْرا ويبقى وريف
واكتر من كدا فواتير النور

مبقتش سبب في خراب الدور
ولا عايزين كِسوة شتا ولا صيف

ودا كله عشان (الدنيا خريف)!!