والله ما خلقت نفسي ولا حتى اخترت أبويا
ولا كنت قلت لأمي تورثني التعب
من يوم مـ جيت وعيني فيها مليون سؤال
وباسمع الإجابة أعجب مـ العجب
أنا مين؟ وابن مين؟ وجيت الدنيا ليه؟
وليه الدنيا قاسية؟ ولمين أنا بانتسب؟
قالوا لي إنك لقيط.. لقيينك فـِ الشوارع
ورجعوا خففوها بمجهول النسب
طب ليه فـ عيونكوا خوف منـّي وشفقة عليا؟
يا ناس دَانا الضحية وعمري ما كنت السبب
********
فـ يوم حبيت بنية ونسيت أنا مين معاها
وقلت الدنيا ضحكت هتنسيني الهموم
عاهدتني عـ المحبة وطرت فـ أحلام هواها
ونسيت الكون معاها ولا جاش فـ بالى يوم
إن الدنيا أما تدي لازم ترجع وتاخد
وأني محال راح أقدر أهرب من المقسوم
وفـ يوم كنا بنحكي سألتني عن حياتي
وقالت لي مهما كان أنا شايفه معاك هنايا
من غير أي تردد قلت لها عـ الحقيقة
لازم أبني حياتي عـ الصدق من البداية
سكتت كتير وسرحت مرضيتش اسألها تاني
قالت لي عايزة اروَّح لكن متجيش معايا
وعرفت وهي ماشية وشايفها من بعيد
إن حكايتنا خلصت ودي هي النهاية
رجعت أسئلتي تاني: طب ليه؟ وأنا ذنبي إيه؟
لكن من غير إجابة... ودي آخرة الخطايا
واقرأ أيضاً:
منـــديل ورق / المــوتُ عشــقا / سوف ألقاهُ / صراع الشوق والقلم / أأخي أنتْ؟! / سواكَ لمْ أعشقْ / أمُعلـِّمَ الأيـَّامْ / مجزرة في غزة والعرب بلا عزة؟؟ / مسابقة شعراء المجانين
تعليقات الأعضاء