الأمل الضائع....!

الأمل الضائع....!
 كان عندي أمل...، ضاع يوم الأربعاء لما كنت ماشية بالشارع...
 دورت عليه كتير... بس يمكن في واحد أخذه فورًا!...
 
 حطيت إعلان بالوسيلة والدليل وووو..: إذا واحد شاف أمل بالشارع يرجعه لصاحبته وله مكافأة مجزية...
 بس الظاهر يلي أخذه يا إمّا ما بتصل الجرايد لعنده.. يا إمّا ضوّع ضميره بالشارع هو التاني وما رجعوا له ياه!
 
 قلت لنفسي: أنزل السوق أشتري أمل جديد، بس يا خسارة! ما عادوا استوردوا ولا أمل بعد ما غلي الدهب ورخص الدولار!!!
 سألت عن أمل مستعمل، قال ممكن يدبروا لي واحد...، بس غالبًا بيجي مهتري وتعبان من كتر الضغط عليه هالأيام...!
 ونصحوني أحسن شي أنزل على سوق الحرميّة بركي بلاقي الأمل الضايع نفسه!
 
 الصراحة...أنا ضاق خلقي وتعبت من الفتل وخاصة ما في معي أمل.
 وقلت لحالي: يعني أنا شو بدي بالأمل؟ يعني بس مشان يتعبني بالفتل؟...
 أحسن شي راح أرجع بيتي ونام... ولما يلي أخذ الأمل الضايع بيرجعوا له ضميره بيجي وحده وبيرجعلي أملي وأنا مرتاحة...
 بكرة أنا بنزل بدوِّر على الضمائر الضايعة أسهل...
 أكيد بلاقي كتييييييير.......!!!!!!!
 
*********
 
 كتبتها أول عام: 2007م ولهلّأ يلي سرقلي أملي ما رجّع لي ياه!!!
 
 
 شرح المفردات:
 دورت عليه: بحثت عنه.
 حطيت إعلان: وضعت إعلانًا.
 سوق الحرمية: مكان يتجمع فيه الناس يبيعون فيه الأغراض القديمة، وأيضًا تباع فيه الأشياء المسروقة، فكل من سرق له شيء يذهب إلى ذلك السوق حيث يمكن أن يجد ما سرق منه يباع في ذلك السوق.
 ضاق خلقي: مللت.
 الفتل: تكرار الذهاب والمجيء بحثًا عن شيء ما.
 قلت لحالي: قلت في نفسي.
 شو بدي: ماذا أريد مِن؟
 مشان: من أجل.
 راح أرجع: سأرجع.
 ولهلّأ: إلى الآن.
 
*********
 
 ومن أعياه لفظ أو عبارة فليرسل إلينا نوافه بالشرح الكافي والوافي...!!!
 
واقرأ أيضاً:
زوجة جاري الثانية...!! / مِنْ وَحْيِ المُنَاقَشَة...!