حكاوي القهاوي (67)

حكاوي القهاوي (66)
(311)
أغنية التحرير

عايزيني أقول "تمام يا أفندم" عايزيني أبقى "محلك سر".. عايزيني أعمل "للخلف در". آسف، أنا الشعب، وبأمر الشعب بأقول "للأمام أنظر".. "للأمام سر".

(312)
سحر الميدان

الشيخ مظهر شاهين شيخ مسجد عمر مكرم نموذج للمسلم الأزهري الوسطي، الوطني الجميل. واضح إن الجلوس ف الميدان له مفعول السحر عليه. شوفوا عصام شرف أحواله إتلخبطت لما ساب الميدان ومبقاش يقعد فيه مع الثوار، رغم إن سليم العوا إدى له كتف قانوني وقال دول مرتين تلاتة اللي جه فيهم الميدان. ياريت الوزراء وأعضاء المجلس العسكري ينفرض عليهم فرض زيارة الميدان كل يوم جمعة والجلوس في خيمة من خيم الثوار، ياكلوا من أكلهم ويشربوا شاي من اللي بيشربوه، ويتنفسوا هوا الثورة اللي في الميدان، يمكن ربنا يفتح عليهم ودمهم يبقي زي دم الثوار.

(313)
ميدان روكسي

عندنا ميدان التحرير للثوار، وعندنا ميدان مصطفى محمود لأبناء مبارك المخلوع، وميدان ماسبيرو للمسيحيين، ودلوقت إنضم ميدان روكسي للقائمة وبقى لبتوع المجلس العسكري، وسموا نفسهم الأغلبية الصامته، يعني سكتوا دهراً ونطقوا كفراً. يارب يتوب علينا من كترة الأسماء، ونتجمع كلنا في ميادين التحرير.

(314)
وزن الإخوان

أتصور إن الإخوان المسلمين والسلفيين كان نفسهم أولاً وحتى رابعاً وخامساً وسادساً أن يثبتوا للمجلس العسكري بأن لهم وزن وثقل في الشارع المصري، ثم يثبتوا في سابعاً وحتى عاشراً؛ للناخب المصري نفس الشيء. الإخوان دخلوا الميدان يوم تمانية يوليو وخرجوا منه بسرعة عند المغرب وطالبوا الثوار يسمعوا كلامهم لأنهم طبعاً أصحاب الوزن الثقيل، وبكده تبقى الرسالة وصلت للمجلس العسكري وللجميع.

الإخوان خرجوا والميدان فضل على حاله لغاية الجمعة اللي بعدها. أكيد إنهم إعتكفوا في المساجد ودعوا الله عز وجل أن يرسل طيراً أبابيل على ولاد الذين اللي في التحرير. المشكلة الأصعب أن بعض قيادتهم المحترمين نزلوا الميادين ورفضوا قرارهم (إلحق خيانة). من الرجال المحترمين دول القيادي الأخواني الدكتور الهلباوي. لما المذيعة سألته إن العدد في التحرير مش كتير، رد وقال "العدد لا يهم في صدق القضية، نحن لا نحكم على الميدان بالعدد ولكن نحكم على الميدان بالمطالب الثورية، فليس بالضرورة أن العدد ينم عن الحق وعن روح الثورة، هذا العدد يكفي ليعبر عن الشرفاء؛ رغم تراجع قوى كبيرة عن الحضور". الله يفتح عليك يا محترم، ربنا يستر ومكتب الإرشاد مايجتمعش بكره ويقرروا فصلك، ولاّ يقولوا كنا موجودين والدليل الدكتور الهلباوي.

(315)
خطوط حمرا

بناءً على تصريح الشيخ صفوت حجازي؛ فإنه لا توجد خطوط حمرا لعصام شرف ومن حقه يغير أي وزير ويعمل كل اللي هو عايزه. معنى كده إنه إذا لم يغير عصام شرف وزير الخارجية عرابي سوزان، وإذا لم يقيل أي وزير أو جاب أي وزير محسوب ع النظام القديم، يبقى حلال اللي يعمله الشعب فيه، والأفضل له يمشي أحسن. بس المشكلة إن الدكتور معتز قال لأ مالهوش في التفاصيل. يعني إيه أنا مش فاهم، طب مايخلصونا من العوأ ده ويعملوا وصف وظيفي للمجلس العسكري ولعصام شرف علشان نعرف صلاحيات كل واحد منهم إيه والموضوع مايفضلش عايم كده ويضيع دم الشعب المصري بين قبيلة شرف وقبيلة طنطاوي.

(316)
على مسئوليته

قال الدكتور معتز، الغرب ح يقول علينا إيه لو غيرنا وزير له علاقة بالخارج وهو لسه ماسك الوزارة من يومين؟ طبعاً يقصد السيد وزير الخارجية، لامؤاخذه يا دوك، هم قالوا خلاص علينا من يوم ما قعد ع الكرسي، لكن لو غيّرناه  حيقولوا الناس دي محترمة وعندهم شجاعة الإعتراف بالخطاء وشجاعة التغيير، ساعتها ح يعرفوا إن مصر بجد إتغيرت وإن فيها قامت ثورة.

(317)
المبادئ الحاكمة

البرادعي هو أول واحد إتكلم عن المبادئ الحاكمة للدستور وكان ذلك في برنامج العاشرة مساءً،كحل لأزمة الدستور أولاً؛ وضرب مثالاً بألمانيا وقال المبادئ الواحد والعشرين الأولى في الدستور الألماني حاكمة ولا يجوز تعديلها وأن المادة الواحد وعشرين تقول بأنه لا يحوز تعديل المواد السابقة، وقتها خرج الكارهون له وهاجموه. الآن المبادئ الحاكمة خرجت للنور وطلع الراجل صح. ياجماعة إسمعوا للبرادعي يرحمكم الله. الجميل في البرادعي ويورينا أد إيه هو محترم، إنه ماقعدش يقول دي فكرتي. لو حد غيره كان ملى الدنيا صراخ.

(318)
تفجيرات أنابيب الغاز

رجاء من الثوار اللي فجّروا أنابيب الغاز المتجهة لإسرائيل، أن يكفوا عن هذا العمل التخريبي علشان إسرائيل ستتضرر وضررها يهمنا كلنا. كفاية أربعة تفجيرات، مش عايزين تفجير خامس وسادس وسابع وثامن لغاية الرسالة ما توصل للمجلس العسكري ويضطر لوقف تصدير الغاز لإسرائيل.

(319)
جمعة الغاز

نحي المجلس العسكري على تأكيده المستمر على احترام أحكام القضاء، ومن هذا المنطلق نهيب بالمجلس الموقر أن يحترم أحكام القضاء المتعلقة بوقف تصدير الغاز لإسرائيل. ولاّ المجلس مستني لما الثوار يعملوا جمعة الغاز.

(320)
الداخلية

ماجرى في قسم شرطة السويس من تعذيب الثوار المضربين عن الطعام، وضربهم بدون رحمه من أمناء الشرطة والمخبرين الموجودون بالقسم، دليل على أن هناك دولة أخرى للبلطجة داخل وزارة الداخلية، دولة لها قانونها الخاص والتي لا يعنيها وزير الداخلية ولا أفكاره الإصلاحية. هؤلاء يحكمهم قانون المصلحة الخاصة التي تضررت من الثورة، زي كتير من الضباط، هؤلاء لن يقبلوا بالتوقف عن ممارسة البلطجة والعنف وفرض الإتاوات على الشعب. لهذا يجب أن تكون هناك وقفة حاسمة معهم من جانب الشعب ومن جانب الوزير إذا كان الوزير يريد بالفعل إصلاحاً وتطهيراً للداخلية وإلاّ كأنك يابوزيد ماغزيت.

السادة الضباط عملوا من قسم شرطة المنشية قهوة وقعدوا يلعبوا "بصرة"، الكومي قعد في الشعب يقش، إشي يضرب.. إشي يعذب، ما الشعب عنده مجرد ورق كوتشينة وفيهم بيقش. الثورة قامت، قال الكومي اللعب سخن وللرؤس ح أقش. الشعب إتهمه بقتله للثوار، والأسياد قالوا له بس تعالى؛ تحقيق بسيط ويعدي، الباشا رجع للقسم من تاني متشال على أكتاف رجالته البلطجية اللي بيهتفوا بإسمه، رافع راسه لفوق وبيقول للثوار "طظ". الداخلية تمت جميلها وإدته الترقية ونقلوه من قهوة المنشية لقهوة الكهربا، برضه مش بعيدة عن تخصص الباشا، ياما كهرب المساكين. السؤال دلوقت هو ياترى الكومي صبح قلقان لتكون بجد قامت ثورة، والدنيا تتطربق على دماغة، ويقلب الكومي في لحظة ويبقى شايب أو بنت؟

ويتبع >>>>>>>>: حكاوي القهاوي (68)
واقرأ أيضاً:
المرشحون للرئاسة بين الكاريزما والضمير2/ قنا: البحث عن.. جملة مفيدة/ أهم من الاستفتاء، وأخطر من ثورة مضادة/ حكاوي القهاوي