(407)
بلا منصة
أبوس أيد كل واحد ف الميدان مفيش داعي تعملوا منصة، مش عايزين حد يركب ثاني ع المنصة ويعمل على الثوار زعيم. أبوس أيديكم حافظوا على الميدان نظيف من الزعماء والدجالين.
(408)
قنابل غاز
صرح أحد الأطباء من الميدان وقال إن قنابل الغاز المرة دي غير اللي كانت بتستخدم في 25 يناير. دلوقت الوسط بتاعها حمضي على عكس الأولي وسطها كان قلوي. الكلام ده معناه إنْ الخل ما ينفعش وعلى العكس سيزيد ويضاعف الالتهابات. لما كان الوسط قلوي كان الخل وهو حمضي بيتعادل معاها ويبطل مفعولها. دلوقت لازم نستخدم مادة قلويه بدل الخل علشان تعادل الوسط القلوي بتاع القنبلة وتبطل مفعولها. سألت صديقي عن مادة قلوية ورخيصة قال بيكربونات الصوديوم. المفروض الثوار يستخدموها لأنها قلوية وستعادل الوسط الحامضي للقنابل وتبطل تأثيرها إن شاء الله.
(409)
سبيل
في إحدى الجمع في التحرير قعدت على السور اللي جنب المنصة، أستريح م التعب. كان جنبي ثلاجة "كولمان" كبيرة فيها وتلج للعطشانين. اللي بيزودها بالمية والتلج شاب بسيط عضلاته ما شاء الله قوية شكله بيقعد ساعات في الساحة الشعبية. في لحظة ثورية أعلن واحد من على المنصة أنهم مش ح يمشوا وراح يفضلوا قاعدين معتصمين لما يسقط المشير ومجلسه. هلل المتظاهرين وهللوا، وهنا لقيت الشاب عايز يكلم أي حد بس هو مش عارف حد، الظاهر إني من طول القعدة ع السور بسبب التعب حصل بينه وبيني علاقة من غير ما نتكلم. لقيت الشاب بيبص لي والدموع نازلة على خده من شدة الفرح ويقول لي خمس أيام بس، لو قعدنا خمس أيام بس المجلس ح يسقط. قعدت أتأمل دموعه ووعيه السياسي وحبه لمصر وهو الشخص البسيط. هنا أدركت إنْ في مصر ثورة، وأنها ستنجح رغم أنف الكارهين.
(410)
الثورة نجحت
في 25 يناير الطبقة الوسطى المثقفة خرجت في أول أيام الثورة وانضم لهم بعد كده طبقات الشعب من البسطاء. وعلشان كده مكنش فيه تخريب؛ الثورة كانت بكتالوج الطبقة الوسطى "سلمية .. سلمية". النهارده وفي مظاهرات 20 نوفمبر كانت في الطليعة الطبقة البسيطة، وبرضه مكنش فيه تخريب كانت "سلمية .. سلمية". ده معناه حاجة واحدة "الصورة نجحت"؛ الثورة نجحت والشعب فهم ونضج وتغير وعرف حقوقه. الثورة نجحت رغم أنف الكارهين.
(411)
يا رب يعند
المشير حيتكلم بعد شوية، يارب يستلهم روح مبارك ويعند علشان البلد تنضف.
(412)
غباء وجهل وعنصرية
الشخصية الوحيدة من مرشحي الرئاسة الموجودة ف الميدان هي السيدة المحترمة بثينة كامل. الشخصية الوحيدة من مرشحي الرئاسة اللي تم إلقاء القبض عليها واحتجازها في وزارة الداخلية هي السيدة المحترمة بثينة كامل. الشخصية الوحيدة من مرشحي الرئاسة اللي شمت قنابل الغاز الجديدة ف الميدان وكان ممكن تنصاب بخرطوش وتفقد عينها أو تموت هي السيدة المحترمة بثينة كامل. الشخصية الوحيدة من مرشحي الرئاسة التي تتواصل مع الثوار لحظة بلحظة وتنقل طلباتهم للشعب وما يحتاجونه من أدوية وخلافة لعلاج المصابين هي السيدة المحترمة بثينة كامل. الشخصية الوحيدة من مرشحي الرئاسة التي تعرف وتثق أنها لن تنجح في إنتخابات الرئاسة ولكنها تعمل فقط لأنها تحب مصر هي السيدة المحترمة بثينة كامل.
الشخصية الوحيدة من مرشحي الرئاسة التي طالما حاربت الفساد وكسرت وراء كل فاسد قلة السيدة المحترمة بثينة كامل. وبعد كل ده بمنتهى عنصرية الرجل وعنجهيته يستبعدونها من حكومة الإنقاذ الوطني ويحطوا أسماء كل الرجالة المرشحين للرئاسة. بالذمة لو كان عندكم ذمة ولاّ ريحة ضمير مش هي بمية راجل من عينة الزعما اللي قرفونا على شاشة التليفزيون. الوحيدة اللي تستحق تكون رئيس لمصر. بالذمة لو كان عندكم ذمة ولاّ ريحة ضمير مش هي اللي تستحق تكون رئيس مصر أو على الأقل نائب الرئيس. بطلوا عنصرية يا أغبيا، ولاّ الفكر السلفي خلاص عشش في عقولكم وبقت الست عندكم بس تشتغل خدامة لسيادتك ف البيتز أنا أدعو كل ستات مصر يثوروا لكرامتهم ويطالبوا بأن بثينة كامل تكون عضو في حكومة الإنقاذ الوطني وشوفوا هي ممكن تعمل إيه لمصر.
22/11/2011
ويتبع >>>>>>>>: حكاوي القهاوي (91)
واقرأ أيضاً:
تعليقات الأعضاء