(447)
كاطو خيبة
قالوا الحمار رفس البنية، قلت أنا ماشي؛ دينا قوية وعفية وربك للمنكسر جابر.
قالوا الحمار هاج وسط الغيطان ما خلاّ؛ في الخضرة ولروس البشر ناوي يحش.
أنا قلت الله يلعنه؛ طب يعمل خاطر لولاد العم!!
شكاني حمار للقاضي وقال مين اللي قال إن بسلامته حمار؛ دا لا هو مني وأنا ليوم الدين بريء منه؛ كفاكم ظلم يا بشر، تعملوها ودايماً تلزقوا العيبة فيّا
أنا قلت آسف حقك عليّا، غُلب حماري..... بالراحة فهمني، من أي فصيلة دا الكائن؟
قال الحمار برضه بتقول حمار؟!! روح الله ما يسامحك.
أنا قلت آسف وحقك على راسي، حسبي الله في من شال الكمامة عن فمه، كاتو خيبة، داهية تاخدوه هو وهم بعيد عنّا.
(448)
الحمد لله يارب على نعمك
قال الخنازير هي اللي غلطانة، ليه تنزل الميدان؟!! دي آخرة نزول النسوان للشارع، واللي لفتاوينا ما يسمع.
قال الخنازير لازم حزام العفة ولسبع طبقات تلبس؛ لاجل ما نسمح لها بالخروج م البيت.
قعد الخنزير وصحبته يتمئلسوا على الجدعان، هأ.. هأ.. ليبرالي بيدافع عنها، يا واد يا مؤمن؟!!
ماهو حسب فكر الخنازير؛ دام اللي بيدافع ليبرالي تبقى البنت مشبوهة، ولازم تجنب موطن الشبهة، ما هو كل ليبرالي كافر وفي رواية أخرى زنديق.
الحمد لله يارب على فضلك ونعمك .. الحمد لله يارب إني زنديق ومش خنزير
21/12/2011
(449)
أنت حمار يا حمار
ومن على منصة العباسية وقف واحد يهتف ويقول "يا برادعي يا خسيس دم الشهدا مش رخيص". أنت حمار يا حمار؟!! أنت كده دخّلت المشير على البرادعي، لازم تبرشم ع الصبح وتيجي مش عارف شمالك من يمينك والتحرير من العباسية.
(450)
لا للمتاجرة بالدين
طلع الشيخ على منصة العباسية وأفتي بأن اللي ماتوا في محمد محمود وفي مجلس الوزراء مش شهداء، وقعد يثبت بالحديث الشريف إن تعريف الشهيد لا ينطبق عليهم. طبعاً لو حد قال له يا منافق حرام عليك أتقي ربنا، ممكن يرد ويقول ده اجتهادي في التفسير، ومش بعيد يقول زي اللي مشغلينه "الرأي والرأي الآخر، مش هي دي الديمقراطية اللي بتنادوا بيها". حد يشوف لنا حل في المتاجرة بالدين، هنلاقيها من مشايخ السلفية ولاّ مشايخ المجلس العسكري، كده الواحد هيطلع من هدومه، اللهم نجّنا من النفاق والرياء وسوء الخلق.
(451)
سوفخس
بيقولوا إن فيه طرف تالت. بيقولوا إن الطرف التالت أمريكا لقطت مكالماته التليفونية أثناء تدبيره للمكايد وعمل الاتفاقات. بيقولوا إن الطرف التالت هو إيران وحماس وتلات دول من الخليج. بيقولوا إن الطرف التالت بعت مجموعات لقنص الثوار حتى يتم الإيقاع بين الجيش والشعب. بيقولوا إن أمريكا حذرت قيادات الإخوان والسلفيين بالمعلومات اللي عندها علشان كده قيادات الإخوان والسلفيين ما بيخرجوش للشارع وعاملين بيات شتوي في جحورهم خايفين حد يخلّصنا منهم.
ماشي يا عم بس المثل المصري بيقول إذا كان اللي بيتكلم مجنون يبقى المستمع عاقل، لو كان الكلام ده صح، ليه ما قبضوتش عليهم؟! خصوصاً إن الست أمريكا عملت اللي عليها وقالت لكم على المكالمات وتتبعتها كمان، يعني أسهل من كده مفيش. وبعدين ايران وحماس عارفينهم؛ بس مين بقى التلات دول الخليجية اللي بيدبروا مكايد لمصر، دول كلهم ست دول والحمد لله حبايبنا؛ حتى أمير قطر الراجل ما قصّرش وجه لمصر وبارك للمجلس العسكري قعاده ع الكرسي. طب قولوا كدبة صح واتعلموا من نجيب الريحاني، اخترعوا شيء لزوم الشيء، قولوا مثلاً الجماعات الشيعية الموالية لإيران في تلات دول خليجية بيدبروا مؤمرات لمصر بتخطيط إيراني، كده ممكن نبلعها.
وإيه حكاية القنص دي بقى، يا خوفي تكون دي لعبة علشان تصفوا اللي انتوا عايزين تخلصوا منه وتلزقوا التهمة في حد تاني وتقولوا الطرف التالت الإيراني هو اللي قتل الشيخ عماد عفت وهو اللي نواي يقتل علاء الأسواني ونواره نجم وكل ولاد الكلب اللي عاملين لكم وش في دماغكم. يا أخي منك له، المثل المصري بيقول كدب مساوي ولا صدق ملخبط، وانتوا بقى بتعملوا كدب ملخبط، الله يرحم عم استيفان روستي لما قال "سوفوخس ع اللي علمك".
(452)
نهاية الإخوان
إن جماعة حماس مثلها مثل الإنترنت لا وجود لها إلاّ في الفضاء الافتراضي. ويظهر وجودها في الواقع من خلال أذرعها فنجد ذراعاً عسكرياً وآخر سياسياً، وكأن حماس هي العقل؛ ذلك المفهوم المجرد والذي لا وجود واقعي له، وأن كتائب عز الدين القسام هي الذراع الذي نراه على الأرض ليثبت وجود هذا العقل المحرك للذراع. ويساعد عدم مسامية الذراع على بقاء هذا الذراع واستمراره بالكيف الذي نشأ عليه؛ بمعنى أنه لما كان الذراع منغلقاُ على ذاته فإنه لا يسمح بدخول أي شخص للانضمام إليه إلاّ بموافقة ذلك الكيان الافتراضي المسمى بجماعة حماس والتي هي بالضرورة أيضاً منغلقة على ذاتها.
الإخوان المسلمون، كما هو الحال مع جماعة حماس، هم جماعة منغلقة على نفسها غير مسامية؛ لا تسمح بدخول أعضاء لها جدد أو خروج أعضائها منها. وتحاول الآن جماعة الإخوان تطبيق فكرة الجناح السياسي ليكون حزب الحرية والعدالة هو هذا الذراع السياسي لجماعة الإخوان المسلمين. هذه التطور للجماعة سيؤدي في تصوري إلى حتمية فناء الجماعة، لأنه ببساطة أهم خاصية في الحزب السياسي هي أنه مسامي يسمح بدخول وخروج أعضائه ولا وجود لعهد الدم الذي يفرض عدم دخول العضو إلاّ بشروط ويستحيل عليه خروجه من الجماعة إلاّ بالموت، كما هو الحال في الأجنحة العسكرية والسياسية للمنظمات الافتراضية كحماس، لهذا يفرض الواقع الجديد باشتراك جماعة الإخوان وكذلك الجماعات السلفية في الحياة السياسية، وتكوينهم للأحزاب، أن ستختلط الأنساب ولن يكون الحزب دماؤه خالصة من أبناء الجماعة، إذ ستؤدي مسامية الأحزاب إلى ضرورة انتهاء خصوصية هذه الجماعات الدينية المنغلقة، مما سيؤدي إلى تحللها في غضون عشر سنوات على الأكثر. فطالما أنه يحق بموجب القانون لأي مواطن مصري الانضمام لهذه الأحزاب، فإنه في حال سرعة انضمام كل الأطياف إليها، فسوف تتحلل هذه الجماعات حتماً.
تخيلوا مثلاً لو أن كل المسيحيين في مصر قد انضموا لهذه الأحزاب ذات المرجعية الدينية الإسلامية، فحتماً سيتم تغيير البنية والجوهر لهذه الأحزاب إذا ما تم إعادة بناء أهداف وسياسات الحزب وفقاً لقرار أعضائه وليس كما ترى الجماعة الأم. أعلم أن الكنيسة لن توافق على هذه الفكرة خوفاً من احتمالية عدم عودة أبنائها للكنيسة ثانية، ولكن بافتراض إمكانية تحقيق هذه الفكرة فإنه حتماً ستنتهي هذه الجماعات وتنفصل العلاقة بينها وبين الأحزاب المعبرة عنها. إلاّ أن الأمر مرهون بانضمام كل الطوائف المخالفة لفكر هذه الجماعات للأحزاب السياسية المعبرة عنها حتى يغيروها من الداخل، ولهذا أدعو الجميع من مخالفي فكر هذه الجماعات المغلقة إلى الانضمام لأحزابها السياسية حتى يطهروها من الداخل.
(453)
مبروك علاء الحرية.... عقبال مصر
24/12/2011
ويتبع >>>>>>>>: حكاوي القهاوي (98)
واقرأ أيضاً:
الثورة مستمرة!!! هنا لندن / وجوه مصرية في التحرير / سلفي فوبيا / الديمقراطية بعيون سلفية / من قتل الشيخ؟ / حكاوي القهاوي
تعليقات الأعضاء