حكاوي القهاوي (103)
(475)
أروح لمين
(476)
حتى أنت يا بروتس
الله يخرب بيت الكرسي اللي بتغيروا جلدكم علشانه، أو للحق بيبان كل واحد على حقيقته. حتى العوا اللي كنت فاكره مش من إياهم، طلع هو أبو إياهم، العوا أعلن إنه مش مع تسليم العسكر للسلطة، حتى أنت يا بروتس!! قال إيه فيه ملفات مهمة وخطيرة لازم يتم دراستها أولاً؟!! المصيبة إنه كمان بيدافع عن النائب العام وبيقول الله يكون في عونه تشيلوه ليه خلوه. طب لو ربنا يكون في عونه، إحنا مين يكون في عونّا منكم؟!! اللي بجد مزعلني إنن كل ما الواحد يقول فيه مسلم نضيف، يطلع ولا موأخذه، طيب نعمل إيه؟
(477)
البحث عن منى
كل ما تسأل واحد من اللي قاعدين على أنفاسنا في البلد، مين اللي عملها في بورسعيد يحلف ويقول والنعمة ما أنا دي أختي منى. إشتاقت أشوف منى اللي بتعمل كل البلاوي دي، حد يا جماعة يعرف لها عنوان؟
(478)
عصيان
الولاد قالوا قولتهم "العصيان هو الحل". طبعاً الإخوان والسلفيين قالوا مالناش دعوة بالعصيان. معاهم حق كفاية إنه أسمه عصيان، والعصيان من المعصية، وكل معصية في النار، ولهذا فالعصيان حرام شرعاً بإجماع الفقهاء لأنه خروج على العسكر. بس الولاد قالوا قولتهم خلاص العصيان المدني لغاية ما العسكر يرحل، البداية كانت من 18 جامعة وكلية، طب لو حصل وانضم لهم عمال غزل المحلة ومعاهم سائقي النقل العام والقطارات وكمان المترو علشان خاطر القاهرة الزاهرة العامرة؟ كده الغازية لازم ح ترحل، وجواز عتريس من فؤاده هيكون باطل.
طبعاً لو العصيان نجح هيخرج الإخوان ويقولوا كنا معاكم حتى البلطاجي كان في الميدان بيدعمكم، وشباب الإخوان في الجامعات شارك، ويخرج السلفيين كمان ويقولوا كنا معاكم ولكن في صمت؛ بالدعاء لنا يعني. يارب إليك بالإخوان والسلفية أما العسكر فالعصيان كفيل بهم.
(479)
العصيان المدني في السودان
صديق سوداني قال لي لو عملتوا عصيان مدني يبقى المجلس لازم يرحل، إحنا في السودان عملنا عصيان مدني ضد النميري في سنة 1985 ورحل على طول. أنا قلت له وطبعاً الفكرة لقت قبول عند السودانيين لسببين الاول ان السودانيين شعب ذكي عرف يجيب حقه من الآخر ومن غير تعب، وكمان بيني وبينك فرصة تريحوا في البيت وتاخدوا أجازة.
(480)
راجل وابن راجل
أبو تريكة رفض الجلوس والسلام على المشير طنطاوي في جلسة عقدت للاطمئنان على اللاعبين، حمل أبو تريكة المجلس العسكري المسئولية الكاملة لما تمر به البلاد في هذه الايام. كما خرج أبو تريكة في مظاهرة اليوم ضد المجلس العسكري قائدا الهتافات قائلا "يسقط يسقط حكم العسكر".
6/2/2012
ويتبع >>>>>>>>: حكاوي القهاوي (105)
واقرأ أيضاً:
سيناريوهات الذكرى السنوية للثورة / من 25 إلى 25 ثوار مجانين! / عيد ميلاد الشعب المصري / حكاوي القهاوي
تعليقات الأعضاء