حكاوي القهاوي (105)

حكاوي القهاوي (104)
(481)
عسكر وداخلية وحتة كيك 

- الداخلية قالت إحنا اللي في وش المدفع، في المظاهرات إحنا اللي بننضرب وبنضرب، وفي الإضرابات موجودين، أمن دولة طبعاً ده أساسي، يعني باختصار إحنا الداخلية اللي شايلين الشيلة كلها وبيتلعن أبونا كل يوم م الشعب.

- الداخلية قالت أما أنتم يا عسكر واكلينها والعة، يعني واخدين البلد بيضة كده مقشرة ع الجاهز.

- الداخلية قالت، معقولة يا عسكر يبقى لكم الجاه والسلطة والمشاريع وأرباحها، وكل نطع منكم يقعد على كرسي يلزق فيه، وكل قفا يسيب الخدمة ينط على محافظة ويركبها، وبالقليل يبقى رئيس حي وإن تعذر الأمر ينزل بالبراشوت على أي شركة أو وزارة ويعمل فيها بيه ومدير.

- الداخلية قالت إيه سفن إيه يا أولاد التيت يا عسكر، بإمارة إيه نشيل الهم دا كله، حتى المثل بيقول شيال السم يدوقه يا عسكر.

- الداخلية قالت وحياة أبوكم ما أحنا لاعبين، يالكيكة تتقسم من جديد بالعدل ويكون لنا منها نصيب أو شيلوها أنتم بقى يا عسكر، واللي يشيل قربة مقطوعة بتخر على ضهره.

- العسكر قال بالاسكندراني من إمتى طلع لكم أسنان؟ كفاية عليكم اللي كنتم بتاخدوه، شقق وأراضي مع شوية إمتيازات، وكفاية عليكم الشعب تلطشوا فيه، أوعاكوا تكونوا فاكرين إننا عاجزين نعمل الشوية بتوعكم.

- الداخلية قالت شعب مين اللي نلطش فيه؟ ما خلاص يا عسكر، م الآخر اللي عندي قلته يا توافق يا نسيبها لكم، ونشوف بقى في ماسبيرو هتعملوا إيه؟

- الداخلية بعد كام يوم ضحكت من قلبها ها ها ها شوفتم بقى مش قلت لكم نقسم الكيكة أحسن.

- العسكر قال أنسى، دي غلطة ومش حتتكرر ثاني، وشعبنا طيب ونسّاي والبركة في دعم الإخوان والسلف الصالح اللي بيدعولنا.

- الداخلية قالت أضحكتني يا عسكر، مسنود سيادتك على المايلة، اسألني أنا ، أنا اللي عاجنهم وخابزهم، ومنهم رجالتي قبل ما يبقوا رجالتك.

- العسكر قال ولاد التيت دول لو نطاوعهم بكره يركبونا ويدلدلوا الرجلين، بس يا واد هاودهم ونشوف بعدين.

- الداخلية قالت هنصبر عليكم ونعمل برضه بأصلنا ونشوف، وأدينا في محمد محمود هنشتغل ونوريكم الفن والهندسة.

- العسكر يومين وقال فن؟!! فين الفن؟!! لا فن عندك ولا دياوله، بس فالقنا وعايز من الكيكة، كيكة إيه اللي عايزها يا أبو كيكة؟

- الداخلية قالت براحتك يا حبيبي اعمل ما بدا لك، بكرة نقعد ع الحيطة ونسمع الزيطة، على ميسد كول يا حلاوة.

- العسكر قال لأ بقى وشرف أمي لأعصركم ونركب على أنفاس وزارتكم، البلد بلدنا وإحنا اللي نأمر فيها ونتحكم، ووزيركم ده يبقى لنا برافان.

- الداخلية قعدت على حيطة مجلس الوزراء تسمع الزيطة، ووقعت ع الأرض م الضحك على خيبة العسكر.

- العسكر قال فيه إيه؟ عايزين تعملوها وتنفذوا مخططكم؟ طب لما نشوف وأيمانات الله لنأمر ونتحكم فيكم وبأيدكم يا كلاب نعمل اللي إحنا نقول عليه، أعصر فيهم لما يقولوا بعلو الصوت آه حقي يا عسكر برقبتي.

- الداخلية قالت خلاص، اللي عندك قلته يا عسكر؟ فاكر إنْ صباعي تحت ضرسك، طب ما صباعك أنت تحت ضرسي كمان، عموماً استبينا.. نتقابل بقى في بورسعيد يا عسل.

- العسكر رد وقال طب الحق اللي وقع منك في شرم يا أهبل.

- الداخلية بعد يومين بعتت ماسدج على موبايل العسكر "إيه آخر الأخبار يا حلاوة تسيب وأنا أسيب ولاّ نفضل كده على دا الحال، تفجير مرة عليّا ومرة عليك؟"

وآدي حالك يا هوى.. وبقيتي يا حبيبتي كيكة بين فكين.
8/2/2012
                                                     ويتبع >>>>>>>>: حكاوي القهاوي (106) 
واقرأ أيضاً:
سيناريوهات الذكرى السنوية للثورة / من 25 إلى 25 ثوار مجانين! / عيد ميلاد الشعب المصري / حكاوي القهاوي