حكاوي القهاوي (107)

حكاوي القهاوي (106)
(486) 
إللهم إخزيك يا إبليسكو

إليسكو هناك كان نائب تشاوشيسكو، إليسكو ضحك على شعبه وركبهم، إليسكو هناك بقى الريس وعاش سعيد متهني، والثورة هناك ساحت؛ راحت مطرح ما راحت.

أما هنا فعندنا إبليسكو. وعلشان إبليسكو هو إبليسكو، قال مطلوب حمار يسوق البهايم دول. إبليسكو مش غاوي يبان في الصورة. إبليسكو يهمس في ودن الحمار وهمسه أوامر، أبليسكو يقول شي، والحمار يقول حا وينفذ. إبليسكو هنا عندنا من المنذَرين، قاعد على قلوبنا ليوم الدين. إبليسكو مرة تلاقيه دراع حسنيسكو، ومرة يلبس لنا الكاكي، ومرة يجي لابس الأسود، ومرة طالق اللحية ومقصر لنا التوب، ومرة يحلف إخواني والله بحبكم. إبليسكو حالف يمين بالله ما يسيب التكية، إبليسكو قال زي ما ركب هناك إليسكو، أنا هنا راكب على نفسكوا، وما حدش يزعجني بقولة ثورة تاني داهية تاخدكوا.

يارب.. يارب لاجل حبيبك النبي.. تخزي إبليسكو

(487)

يا واد يا خبرة
خرج علينا بيت من بيوت الخبرة وقال باسم الله تبرعوا لبناء بيت لإعالة الوطن. الخبرة قال بلهجة الواثق، يوم واحد مش أكتر يلزمني. هتف له الشلة والمحاسيب، الله عليك، الله عليك يا لعيب. الخبرة قال ونسبتي بالطبع محفوظة وبما لا يخالف شرع الله أكيد.

(488) 

كوكو كوكو
وقف الديك في العشة وقال كوكو كوكو، ضحكت الفراخ وادلعت في مشيتها وقالت كاك كاك. طلع ديك تاني من جوا القفص وقاله ماتعملش ديك وتزايد عليّ، أنا هنا الديك، أنا هنا ديكك وديك أمك.

(489)

أنا باشتغل نفسي 
يا ترى الست فوفه هي اللي بتشتغل المجلس؛ فصدق إن الخواجات دول نظام تخابر وإن الخرايط اللي معاهم بجد خرايط لتقسيم البلد، مش خرايط بتاعة تقسيم اللجان الانتخابية، ولاّ يكون المجلس هو اللي عامل الهيصة دي وبيشتغلنا علشان نقول عليه بطل، ولاّ يكونش المجلس شرب حاجة أصفره وبقى يشتغل نفسه.

(490) 

العبارة في المغارة
- استبينا يا تيفا
- خلاص يا أبو شفة، أنت شايفني صغير ولاّ إيه؟ قلت لك هاروح للعيال دول وأقول لهم سيبوا كل حاجة زي ماهي وما حدش يعمل منهم عواء في الحارة ولهم علينا إن أبو العربي هو اللي هيبقى شيخ الحارة، وبعدها هوب يوم النتيجة الراجل بتاعنا يقول أسمك أنت مش أسم التاني.
- عفارم عليك يا تيفا ومني لهم علبة بنبوني حلاوة النجاح.
- بونبوني لأ خليها هولز أحسن
- وماله أهو برضه بيجيب طراوة
20/2/2012
                            ويتبع >>>>>>>>: حكاوي القهاوي (108) 
واقرأ أيضاً:
شرق أوسط جديد بلحية إسلامية!!! / للسلطة فتنة... لكن لصبرنا حدود / المرحلة الخرسانية / دليل الحاكم المسلم: لحكم شعب مؤمن / حكاوي القهاوي