حكاوي القهاوي (108)

حكاوي القهاوي (107)
 (491)
 أمريكا ما بتكذبش
 
 شكراً للأخ ماكين اللي فضح الإخوة المسلمين لضغطهم على القضاء المتين فسمحوا بسفر المتهمين بعد موافقة العسكر ولاد الستين.
 
 (492)
 من فضلك ما تفهمنيش غلط
 
 مش ذنبي إن سيادتك أهبل وعبيط، مش ذنبي إن سيادتك غبي، أنا لما قلت مصر لن تركع أبداً كنت أقصد ع الصلاة يا خفيف، إنما في غير كده أنا غاوي انبطاح وسجود وتاريخي يشهد على كده. إيه ذنبي بقى إنك ما بتفهمش.
 
 (493)
 
 والنعمة ما أنا
 الإخوان أنكروا وقالوا والنعمة ما أنا دي أختي منى، الإخوان قالوا أمريكا عايزه توقع بينا وبين الشعب علشان الشعب بيحبنا وأمريكا خايفة مننا. طيب هتعملوا ايه يا عفاريت لو ويكيلكس سربت المقابلات بالأسماء اللي اجتمعت معاهم أمريكا، أو لو طلع إن اللقاء كله متصور، ولاّ أنتم كنتم عاملين حسابكم وقلتم ممنوع حضور الاجتماع بالموبايل. أكيد الإخوان ساعتها هيقولوا بإن العضو اللي دعم الأمريكان وهروبهم وعمل مقابلات معاهم هو مسئول عن نفسه وعن تصرفه وأن هذا العمل إنما هو عمل فردي من عمل الشيطان بعيداً عن تاريخ الجماعة وكفاحها. وممكن ياخدوا قرار بقطع العضو قليل الأدب ده اللي عمل فعل خارج. وطبعاً الجماعة حتلاقي اللي يشيل القضية ويتحمل المسئولية. الجماعة دول بيفكروني بتاجر المخدرات دائماً عنده عيل مستعد يشيل القضية ويدخل السجن بدل المعلم الكبير.
 
 (494)
 
 لحن جديد
 بدأ يظهر لحن جديد يعزفه بعض المنتمين للتيار الإسلامي، اللحن بيقول ومالوا لما نرجع في كلامنا، إيه يعني لما ننبطح أو ننفشخ أو حتى يهتكوا عرضنا، مدام قبضنا الثمن وقبضنا فلوس كتير كتير كتير وأخدنا عربيات ومراكب وغواصات، وده طبعاً غير الكام مليون الفكة اللي لمهم الحاج حسان. النغمة دي بتفكرني بالبنت اللي بتخرج مع شاب علشان يشتري لها فستان وتتفسح معاه وتنبسط، وفي المقابل الواد يمسك إيدها أو ياخد بوسة أو يعمل حاجة كده ع الماشي. والبنت تقول وإيه يعني مدام عود الكبريت لسه موجود يبقى خلاص هو أخد إيه يعني أنا اللي ضحكت عليه وأخدت كتير قوي منه. مصيبة يطلع لنا بكره تفسير ورأي يقول بجواز ممارسة الدعارة شرط أن يكون العائد مجزي ويا حبذا يكون بالدولار.
 
 (495)
 
 الصومال الجديدة
 في الصومال الناس هناك شغالين قراصنة يعني بيسرقوا السفن الأجنبية اللي بتمر جنبهم ويطلبوا فدية، إحنا بقى في مصر عملنا تطوير في الفكرة، إحنا في مصر بنخطف بني آدمين ونطلب فدية.
 
 (496)
 
 عايز فلوسي
 ماليش دعوة يا أولاد التيت، أنا عايز فلوسي اللي تبرعت بيها، ضحكتوا عليً وقلتوا تبرعوا لبناء وطن، وتبرعت باللي معايا وفي الآخر يطلع كل ده لعبة علشان تطلعوا بنحتاية من الأمريكان. أنا عايز فلوسي من كل الحرامية ومن شيخ المنصر بتاعهم.
 
 (497) 
 
 كشف حساب
 كانت أهم إنجازات التيار الإسلامي في خلال شهر من عمر المجلس تتمثل في إتمام صفقة الخروج الآمن للأمريكان على يد الأخوان المسلمين. أما السلفيين فطالبوا بإلغاء الفيس بوك ثم طالبوا بإلغاء اللغة الانجليزية من التعليم، وأخيراً حدثت عملية تجميل العضو. طبعاً كل عضو حر في نفسه يبقى اللي عايزه، عايز يبقى مهند ولاّ حتى شاكيرا هو حر. بس الحقيقة عيب على العضو يفتري على البلطجية ويقول ضربوني وهجموا عليّ، واللي زعلّني أكتر المية ألف جنيه اللي أخدهم من المجلس واتهم البلطجية إنهم سرقوهم، واللي زعلّني أكتر وأكتر لما قال (لن أنسى مشاهد محاولة اغتيالي، ونجاتي رسالة من عند الله، ووقت الحادث توقعت الموت فدعوت بصوت عال "اللهم أكرمني حسن الخاتمة"). أظن إن ربنا استجاب له وحزب النور طرده.
 
 (498)
 
 اللحظات الأخيرة
 أتصور أن الشهور القادمة هي أخطر شهور ستمر على مصر منذ قيام الثورة، فكل من يخفي ثعبان في جرابه سيخرجه الآن ليحقق مخططه، فإن لم تظهر الثعابين الآن فقد لا تظهر بعد انتخاب الرئيس هذا إن كان سيأتي استقرار بعد الرئيس، ولعبة منظمات المجتمع المدني هي مجرد ثعبان من ضمن الثعابين اللي تخرج علينا كل يوم من القوى اللي تتلاعب بمصر حتى تحقق أحلامها، مثل ثعبان الانفلات الأمني، وانتشار البلطجية. ربنا يستر ولا يخرج علينا غداً ثعابين تنفجر.
 5/3/2012
                                                     ويتبع >>>>>>>>: حكاوي القهاوي (109) 
 واقرأ أيضاً:
مجلس الشعب بدون سلطة أبوية / الانشقاق العاطفي للإخوان / شرق أوسط جديد بلحية إسلامية!!! / للسلطة فتنة... لكن لصبرنا حدود / حكاوي القهاوي