باعتبار أننا أصبحنا في عصر ما بعد الكهرباء... وأصبحت الكهرباء جزءا من تراثنا الحضاري الذي نفتخر به، اشتغلت الإبداعات التي يشتهر بها الشعب السوري...
إبداع يضرب عصفورين بشمعة...
إذا عندك قرص مضغوط خرب وإنت عم تنسخ عليه المعلومات (مو فارقة: CD أو DVD). وزعلت على 25 ليرة (أو 12 حسب نوع القرص DVD أو CD) يلي دفعتهم ثمنه من غير ما تستفيد منه، يمكنك جعل القرص صحنًا للشمعة...
1- قم بسد الفتحة التي في وسط القرص بشقفة كرتونة ولزيقة...، وذلك برسم دائرة بتدوير القلم داخل الفتحة فوق الكرتونة، ثم قص الكرتونة، ثم تغليفها باللزيق من الجانبين، ثم لزقها باللزيق بحيث يكون اللزيق من جهة وجه القرص الأبيض الذي يكتب عليه محتوى القرص (لو كان ما خرب) عادة...
2- أشعل الشمعة ونقط كم نقطة شمع بالنص فوق الكرتونة يلي رح تفشّي رغم اللزيق...، من جهة أسفل القرص يلي بضوي بأضواء ملونة حلوة ومنسجل عليه المعلومات...
3- ثبت الشمعة في الوسط فوق الشمع السايخ...
4- بعد ما تنطفى الكهربا يلي هي من آثار العصر السابق، بس بتجي أحيان بسبب تخلفنا عن ركب الحضارة ولسه في عنّا منها شوي...، أشعل الشمعة، وممكن تشعلها قبل موعد اختفاء الكهربا عن البيت، مو فارقة..
5- ستلاحظ لما بتشعلها إنو الشمعة البيضا صارت ملونة بألوان القرص: (من تحت زرقا، وبالنص حمرا، وفوق بتبقى بيضا، انظر الصور المرفقة)...
6- استمتع بألوان الشمعة الجديدة، واحمد الله على نعمة طفي الكهربا، لأن لولاها ما كنا قدرنا نشعل الشمعة.
7- صور الشمعة إذا بتحب بالجوال متل ما عملت أنا...
8- أرسل الصورة إلى الصحف المحلية والعالمية، وانشرها على صفحات الإنترنت إذا بتحب لما بتجي الكهربا وبيشتغل خط الإنترنت بالسرعة يلي مفروض إنك اشتركت فيها...
9- ادعيلي على هذا الاختراع، وحاول إبداع طرق أخرى لضرب عصفورين بشمعة...
مع تحيات المبدعة السورية، الشمعة المضْوِيّة، المنظومة المرْضِيّة، لا أدخلها الله إلى العصفورية، آمين
واقرأ أيضاً:
قانون التغيير والمطبخ النفسي/ العبادة في الهرج/ عندما عتب العيد/ في هذه اللحظة/ الكفالة الربانية للشام../ ساعات مع الشمعة
تعليقات الأعضاء