حكاوي القهاوي (133)

حكاوي القهاوي (132)
(614)
اسمعوا لي

قلتلكم قبل كده أن الراجل عنده مشكله في "الحكم على الأمور"، وده نتيجة احتمال اصابة الفص الجبهي للمخ المسئول عن القيام بالوظيفة دي. طب بذمتكم فيه حد في الدنيا يعمل اللي عمله؛ يقعد مع الناس ويسيبهم يقولوا خططهم لمواجهة الأعداء من غير ما يقول لهم إن اللقاء مذاع مباشر ع الهواء. ولما واحد منهم يقول خطته الجهنمية اللولبية ويقول طبعاً الكلام ده مش مذاع. أوم بسلامته يضحك ويقول لأ ده مذاع!!!!! يكونش يا حيله عامل فيهاا الكاميرا الخفية؟!!!! بذمة أبوكم حد شاف كده قبل اليوم الأسود اللي شفنا فيه طلعته البهية. يا شباب حد يعمل أي حاجه، مقطعية، رنين، كهربا، لوريا علشان خاطر النبي حد يتصرف، حرام... هو فاضل كام يوم على أم آخر الشهرر ده؟ 

(615)
الست مرجانه

ووقفت الست مرجانه وقالت أخ نسيت أقول لكم إن اللقاء مباشر ع الهواء، طبعاً علشان تداري على خيبة أفندينا. كان فاضل تغنيها وتقول "أخ اللقاء متذاع، أخ أنا شايفه صباع".

(616)
استرجل

مش عارف ليه كل ما اشوف قنديل افتكر اعلان تيجر، مش فاضل غير إنه يطلع ويقول للشعب تووووووت.

(617)
الملّواني

الاستاذ الملواني في مدرسة المشاغبين كان بيقلع هدومه حتة حتة، وكل ما يقولوله اقلع كان يقلع على طول ويقول "أوكي"، ولما وصل لـ اللامؤاخذة رفض الملواني وقال عبارته المشهورة "لا أبرد". الملّواني بتاعنا جاي وعارف المطلوب منه، على طول قلع اللامؤاخذة. ما هو الملواني بتاعنا جلده تخين ومش فارق معاه البرد.

(618)
مهما عملوا

مهما قالت ومهما عملت جماعة ستة ابريل جبهة احمد ماهر ومهما انقبض على حد منهم؛ فأنا بصراحة لا أثق فيهم وأخشى ان تكون الحكاية كلها مجرد لعبة لصناعة بطل ليستخدم لضرب الثورة في وقت معلوم. لا أعرف على وجه التحديد لماذا لا أشعر بالراحة تجاههم، ولماذا لا استطيع رؤيتهم إلاّ وأنهم يتحركون وفقاً لأجندة غير خالصة لوجه الله والوطن.
                                                ويتبع >>>>>>>>: حكاوي القهاوي (134)