حكاوي القهاوي (141)
(678)
نجيب عاليها واطيها
الإخوان قالوها لأمريكا كلمة ومن غير لوكلوك كتير، يا نخرج كلنا من السجن ونحط رجل على رجل رغم أنف التخين في البلد دي، أو يمين طلاق بالتلاتة لنقول كل حاجة ونكشف المستور ويروح ما بعدك روح. هي موتة ولاّ أكتر، وفي المحكمة وشرط هتكون علنية، الناس كلها هتعرف كنتم ناويين على إيه لمصر وكل خططكم راح تنفضح وبالصوت والصورة تنقال. قصر الكلام يا مره ياوش النحس، يا نخرج من القضية دي زي الشعرة من العجين يانجيب عاليها واطيها.
(679)
البقاء لله
حكومتنا الرشيدة عاملة زي واحد أمه مريضة وبتموت، صاحبنا قعد يصرخ علشان حد ينقذها، صاحبنا شال أمه المريضة ونزل جري ع السلم من الدور السابع ومخدش الأسانسير، ولما نزل للشارع بأمه اللي بتموت قعد يجادل ويفاوض سواقين التاكسي ع الأجرة للمستشفى، الست والدته فجأة وقعت ماتت والبقاء لله.
(680)
ألزهايمر
حكومتنا الرشيدة عندها ألزهايمر وناسية أصلاً هي بتعمل هنا إيه. يا شباب محدش هيحلها غيرنا، من الآخر تعالوا نعمل دعوة لفض الاعتصامات الإخوانية في أول جمعة بعيد العيد. ونعمل زي ما عملوا أهالي ألف مسكن والمنيل والدقي. إذا الجيش والشرطة عايزين ينزلوا في ضهرنا أهلاَ وسهلاً، إذا عايزين يستنوا موافقة أشتون وباترسون وأمير قطر ومالوا خليهم يستنوا براحتهم. مش هنقعد ساكتين على شوية مومياوات في الوزارة لما تاخد القرار.
لو فضلنا قاعدين هنلاقي بديع والشاطر ومرسي بيحركوا الإرهاب من الخارج وينعمل بدل الاعتصام ألف. لو فضلنا نايمين هنلاقي روبرت فورد هو السفير الأمريكي الجديد اللي بيحرك العرايس في مصر. لو فضلنا ساكتين يبقى نستحق اللي يجرى لنا، ونستحق إن الإخوان يركبونا. كل كلب من الكلاب اللي بتورطنا هياخد بعضه ويسافر بره، ده إن كان له في العمر بقية، واحنا اللي هنلبس الخزوق.
(681)
مرحاض عمومي
أنا حاسس إن مصر بقت مرحاض عمومي، كل واحد ماشي وحاسس إنه مزنوق يدخل على مصر يفك زنقته وياخد بعضه ويمشي. وبعد ما يعملها علينا يخرج المسئولين في مصر يشكروه على ما بذله من مجهود.
(682)
ملف نووي
البرادعي بيتعامل مع ملف الاخوان زي ما كان بيتعامل مع الملف النووي في العراق، ناس رايحة وناس جاية في مفاوضات، مش فارق معاه الوقت. المهم يتأكد إذا فيه نووي في الإعتصام قبل ما يفضه ولاّ لأ. أمريكا ضحكت عليك يا بوب، عارفه إنك بتحب التفاوض وجابت لك حاجة تلعب فيها. كده ننزل إحنا بنفسنا نفض أم الإعتصامات الفاشلة دي يا عم الحاج، وخليك أنت إتفاوض براحتك مع نفسك.
(683)
مطلوب جوكي
السيسي بتاعنا حصان عربي أصيل، بس يا خسارة طلع على كتفه بلاوي لا مؤاخذة ماتعرفش غير الكرو.
5/8/2013
(684)
أسفين يا قراطيس
إمبارح طلع بهاء الدين وحسام عيسى وأعلنوا عدم علم أي وزير في الوزارة بأسباب الزيارات الكتير للقرد ميمون وللقرداتي بتاعه، وكمان أعلنوا رفضهم وقرفهم من اللي بيحصل في البلد وعدم موافقتهم عليه. وده معناه إنْ اللي بيجرى مسئولية البرادعي وحده مش حد تاني. وحيث إن الموضوع كده يبقى واجب علينا الإعتذار لحكومة المومياوات علشان شتمناهم إمبارح في حكاوينا، ونقول لهم إسفين يا قراطيس.
(685)
نداء أخير
يعلن مطار شعب مصر الدولي عن النداء الأخير لكل القراطيس، ستقلع الطائرة المتجهة لإنقاذ مصر بعد دقائق من الآن، إما أن تتحركوا أو سيتم استبعادكم من قائمة الركاب. ملحوظة لن نقبل شكاواكم بأنكم لسه واصلين المطار، لا مؤاخذة الطيارة عليها أقساط للبنك وبقالها سنتين ونص ماتورها داير ومشغلة الانتظار. بالمناسبة كل واحد يحافظ على تذكرته، واللي هيستهبل ويقول نسيت الحد الادني للأجور في الشنطة التانية، أو الواد حميدة هيحصلني وجايب معاه إعفاء الفلاحين من ديونهم، يبقى يقابلني في مولد أم هاشم لزوم قراطيس الترمس.
(686)
طعمه ماسخ
عدم المؤاخذة يا كوتش الشعب المصري مش قراطيس، والماتش بتاع فض الاعتصام ده مش ساعة ونص وكل واحد يروح لحالة وخلاص، لا يا ابن عمي، الماتش بقى طويل قوي وزي ما بيقولوا عندنا في الصعيد طمعه بقى ماسخ.
(687)
تقييم موضوعي
بمنتهى الموضوعية بما إن اللي بيجرى في البلد مسئولية البرادعي يبقى نعمل تقييم موضوعي لأداء الكوتش في الأسبوعين اللي فاتوا كالآتي:
1- جودة العلاقات العامة: استخدم الكوتش علاقاته الدولية في عدم تفاقم الأزمة مع أشتون وأخواتها. ياريت يساهم بالمرة موضوع السفير الأمريكي روبرت فورد ويعملها أوباما بجميلة من عنده بدل المشاكل.
2- تأكيد دولة القانون: ساهم رفضه لفض الاعتصام بالقوة على تأكيد دولة القانون، واللي مش هتقبله النهاردة على الإخوان مش ممكن نقبله بكره على غيرهم. يعني إن شاء الله حتى الحرامي حقه القانوني محفوظ، فما بال سيادتك المواطن المحترم هيكون تعاملك إزاي لما تدخل قسم شرطة.
3- مفيش شفافية: لما الوزارة والشعب ميعرفوش إيه اللي بتعمله؟ وليه عملته؟ وإيه نتائجه؟ يبقى لا مؤاخذة مفيش شفافية. يعني لا أنت بتقعد مع الوزراء وتفهمهم علشان على الأقل يدعموك لما حد يسألهم، ولا أنت بتخرج في مؤتمر صحفي تتكلم بشكل مستمر تحكي للناس وتجاوب على تسأولاتهم. وأنت شفت كويس لما اتكلمت مع اشتون كان تأثير المؤتمر إيه. وبصراحه كده نظام لقاءات شريف ومنى كان يمشي زمان، سيادتك مسئول دلوقت؛ والمسئول يعمل مؤتمر صحفي مش قعده في قناه تليفزيونية. أنت كده رايح لسكة التعالي والديكتاتورية.
4- مفيش عدل: لما سيادتك تسمح لكل واحد ماشي يزور القرد والقرداتي، يبقى مفيش مساواة بين القرد ده والقرد اللي قبله. وده معناه ببساطة إن بتوع أسفين ياريس يرحوا هم كمان يشوفوا لهم ميدان يحتلوه ويجيبوا سلاح علشان يتفاضوا على زيارات للوفود الاجنبية وخروج آمن لمبارك وعياله. الفرق بينهم إيه كلهم قرود ولامؤاخذة برضه حمرا.
5- سوء استخدام للتفويض: إحنا عملنا تفويض لفض الاعتصام بشكل سلمي أو بأقل الخسائر، مش علشان تتفاوض مع خارجين على القانون. ولو تسأل الحاج اوباما والست أشتون عندهم مبدأ أسمه "لا تفاوض مع الأرهاب"، ولو سألت الراجل اللي في المكتب اللي على يمينك هيقولك إنه رافض يتفاوض مع الارهاب في سيناء يبقى إزاي يتفاوض مع إرهاب في النهضة ورابعة. واضح إن سيادتك مدمن تفاوض، ممكن نفتح لك كشك تفاوض على ناصية الشارع لو مش قادر تستحمل.
6- دعم الإرهاب: اللي بيعملوه الإخوان في رابعة والنهضة اسمه في القانون "إرهاب"، وعندنا في علم النفس اسمه "تعزيز سلبي" زي اللي بيحصل من البيه الظابط في أقسام الشرطة المصرية، وبلغة أمي الله يرحمها اسمه "عيّل وبيزن" علشان ياخد اللي هو عايزه. اللي سيادتك بقى بتعمله اسمه في القانون دعم للإرهاب، وبلغة علم النفس أسمه تعزيز سلوك مرفوض، وبلغة أمي الله يرحمها كده بتبوظ الواد وأبقى قابلني لو عرفت تلمه بعد كده. لو سألت الناس طب أعمل إيه؟ هيقولوا لك بلغة القانون تفض الإعتصام وبالقانون ياعم الحاج علشان ما تزعلش؛
وبلغة أمي هتقولك شبشبين على ضهره وهيبقى زي البلسم، وعلشان خاطر حكوك الطفل بتوع علم النفس بيقولوا لك حط الواد في أوده لوحده لما يزهق ويعرف إن الزن مش هيجيب فايدة، وقتها هيبطل زن من نفسه، ساعتها بس إتكلم معاه وفهمه غلطه واتفاوض ياعم براحتك. وده معناه على الأرض إنه مفيش مانع يعتصموا بشرط عدم إزعاج السكان في المنطقة وفتح الطريق للسيارات والمارة وعودة مستشفى رابعة لتقديم خدماتها الطبية لأهالي المنطقة. وافقوا خير ولو قالوا لأ يبقى مفيش غير شبشب أمي الله يرحمها والتعامل معاهم بالقانون.
هو ده التقييم المبدأي لأداء الكوتش، ياريت تسمع علشان انت مش بتلعب في دوري يا عم الحاج، انت بتلعب في الكأس والغالب مستمر والمهزوم بره. وأنا مش مصلحتي أنك تخرج بدري من اللعبة، علشان يا أسطى خروجك معناه بهدلة وش للبلد والناس زهقت، ده غير إن عيال مبارك وتجار الدين هيرجعوا ينطوا لنا تاني وإحنا خلاص كرهنا عيشتنا.
ما تسمعش للخوجات علشان هيضيعوك. أقول لك نصيحة وبجد الجد المرة دي وبمنتهى الحب والله، روح زور سيدنا الحسين والسيدة زينب وياريت السيدة نفيسة كمان، هتلاقي قلبك وذهنك بقوا صافين وربنا يلهمك الصواب إن شاء الله علشان خاطر مصر والمصريين. طب روح كده اسأل الوالده ربنا يديلها طولة العمر، أكيد هي ست من بتوع زمان وعارفة يعني ايه زيارة الحسين والسيدة وياما أكيد زارتهم كتير أيام أبوك ما انظلم.
6/8/2013
ويتبع >>>>>>>>: حكاوي القهاوي (143)
تعليقات الأعضاء