فاشل أم حائر أم مكتئب ؟ توقف عن الطب أولا ! م3

الشخصية التجنبية والخروج إلى الحياة م2
السلام عليكم

سميها شخصية فاشلة عاجزة بعد ثلاث سنين تقدر تسميها كده. أنا فشلت في أن أكون طبيب، أنا شخصية عاجزة أنا اخترت تخصص صدر ومش قادر أتعلم فيه، أنا مش عارف أخوض الحياة وأُعلم نفسي وأكافح أنا بقالي 6 أشهر فيه ومعرفش غير إن أعالج مرضين سهلين وليس معقدين وهي (البرد والنزلات الشعبية) ومش عارف أتطور زي زمايلي، مش قادر أحفظ حاجات كثيرة في نفس الوقت وللأسف المستشفى لا يوجد فيها رقابة واهتمام بالأطباء الجدد، وأنا مش قادر أكون علاقات مع دكاترة أكبر مني ولا أفهم ما يقوله الناس ولا أستطيع أن أفسر أعراض وشكوى المرضى إلى أمراض. وفي العيادة والنبطشيات أكتب أي أدوية لمجرد التخلص من اللي قدامي من المرضى ولا أستطيع أن آخذ وأدي في الكلام ولا أستطيع الرد على من يكلمني مابالك لو مازحني....

أنا فاشل كطبيب ولست مثل زمالائي وفاشل في حياتي لا أذهب إلا للعمل الرسمي فقط ولا أذهب إلى عمل خاص مثل زملائي "برايفت" زي ما بيقولوا وبالتالي لا أكسب مثلهم ولم أخطب أو أتزوج مثلهم لا أستطيع.... ممكن تقولي ليه ما تعملش زيهم؟ أقولك فات الأوان بعد التخرج بأربع سنين ونسيان كل شيء.... أنا راحت علي كل حاجة كده لم يبقى لي إلا الجلوس في المنزل وانتظار الموت الذي حاولت أن أصل إليه بابتلاع مجموعة من الأدوية....

أنا مش بتاع شغل دماغي مابتستحملش التفاصيل الكثيرة.... مش عارف أحول لتخصص تاني لا يكون به كلام كثير وحفظ كثير، أفكر في بنك الدم لا يختاره أحد وسمعيات ولكني أراه أجهزة وصعب. أنا متأخر في كل شيء وضايع ومش بحب حاجة. أنا مقتنع خلاص أنني لا أنفع في الصدر اللي طلع فيه عناية مركزة وأنا مش قدها...... أحس أنني لن أنفع في أي حاجة تانية. أنا عايز وظيفة بسيطة حتى لو وقفت في محلات!! زهقت من الدكاترة النفسييين وأدويتهم، أنا مش عندي اكتئاب! أنا مش قادر أكون دكتور أو أي حاجة ثانية... في دكتور يبقى ما يعرفش يتكلم ويحور في الكلام ويهرج وياخد ويدي؟ في دكتور مابيعرفش يحفظ؟ 

أنا كنت مدمن بشراهة للعادة السرية وأفلام البورنو ولكن الآن ومنذ فترة لم أعد أشاهد مثل هذه الأشياء وأحس بقرف منها، بس المشكلة أني بقيت ما بحسش بإثارة جنسية تجاه أي مثير ده سببه إيه؟.....؟؟
ماتقوليش اللي نجح في الكلية يقدر ينجح في الحياة العملية! الله أعلم أنني كنت أنجح بمذاكرة أيام الامتحانات فقط وبمذاكرة الأسئلة القديمة للامتحانات، مجرد حفظ للامتحان وبمجر انتهاء الامتحان أنسى كل شيء.
هو فيه أمل أعيش ليه في الحياة دي؟ أنا مش قادر أعمل حاجة خالص.

أعمل إيه بالضبط لكي أخرج من اللي أنا فيه؟ أنا مش قادر أعمل حاجة لا أحفظ ولا أذاكر عايز حد يحركني قبل كل خطوة يوجهني أحس أنني انتهيت. تخصص الصدر أنا مش قده ولا قد أي تخصص تاني حتى التحاليل صعبة بالنسبة لي كلها، أنا دماغي بقت ممسوحة لا قادرة تفكر ولا تحفظ ولا تتخذ قرار. موضوع التخصص مخليني زي المجنون، أكلم نفسي ولا أتوصل لحاجة. أنا فشلت خلاص في الصدر ولا أعلم أول من آخر فيه

مش قادر على الحياة وبقيت مش مهتم بحاجة خالص ولا عارف إيه اللي بيحصل حولي ومش عارف أتكلم في أي موضوع ومعظم الوقت راقد في السرير،
مش فاهم أي حاجة خالص أنا مش نافع في حاجة بجد الناس بتتكلم حولي ولا أعلم كيف أجاريهم أوكيف أفهمهم؟
19/04/2015