قلق الأداء في بداية الممارسة المهنية

أنا مجنونة

أنا تعبت من نفسي، بجد تعبت من نفسي، دايمًا شايلة الهم، على الرغم أني لو فكرت في المشكلة كويس مش هتلاقي مشكلة أصلا، لو نزل جدول جديد في الشغل ببقى شايلة همه، لو سمعت إشاعة ببقى شايلة همها، أبسط دليل على الموضوع، إن من فترة قريبة واحدة زميلتي طلبت مني حاجة، وأنا رفضت لقيتها بعتالي "أنتِ متكلمنيش تاني خالص" أنا فعلا مكنتش أقدر أعملها، والفكرة أنها قليلة الذوق، وممكن تقل أدبها عليّ في وسط الشغل، فدماغي تفضل تودي وتجيب "طب لو قالت كذا هرد عليها بكذا، ولو شتمتني هشتمها، طب لو رديت عليها هتقلب عليّ كل صحباتي (وهي نوعًا ما تعتبر صاحبتي) طب بلاش أرد عليها"

وهكذا كل مواضيع حياتي ولما تحصل مشكلة أفضل أفكر فيها ليومين قدام، ومتخلينيش عارفة أشتغل في اليوم، اللي يضحك، إن كل الحاجات اللي بتقلقني بتخلص على خير، ولو أنا بفكر وحد كلمني بزعق ولو متضايقة بزعق، ببقى مبسوطة جدًا لو خدت مهدئ كالميبام، وخايفة أتعود عليه.

بالإضافة إلى ذلك، أنا عندي مشكلة في النوم، لأن عشان فيه نباطشيات صبح ومرة تاني ليل؛ مبعرفش أنام منتظم، ولو راجعة من الشغل وتعبانة جدًا، وكنت ناقصة نوم، وفضلت أفكر امتى هنام مبنامش، لكن لو موراييش شغل بنام عادي جدًا، ولما بقلق من النوم، أو لو شاغلني حاجة بنام ب night calm

أنا عارفة، إنها مش مشكلة أوي جنب الأمراض الصعبة زي السرطانات أو المشاكل النفسية التانية،
بس أنا بتصعب عليّ نفسي من نفسي بجد، أنا بأذي نفسي بإيديا وعايزة حلا.
14/06/2015