|
| 
|
أنا في موقف محتارة فيه جداً ومش عارفة أخد قرار
أنا وزوجي طلقنا مرتين وهو يحاول يرجعني دلوقتي تاني بس أنا حاسة إنه مفيش تغيير ولو رجعنا بنفس الوضع نطلق ثالث.
سأحكي عن حياتنا باختصار،
أولاً: هو ابن خالتي وده من الأسباب اللي خلتني أوافق عليه كنت فاكراه هيصوني لأني مليش أخ وكمان والدي توفى.
هو مهندس بترول بس أول ما تجوزنا كان مرتبه صغير جداً وكنا ندفع منه إيجار كمان وبعد لما ظروفه تحسنت شوي جاب عربية ودبسنا في قسط كان ساعتها يأكل معظم المرتب وبعد شوي سافر يشتغل بره ولما حوش قرشين راح اشترى فيهم أرض في البلد وبعد الأرض اشترى فيلا ويدفع أقساطها ٦ سنين طبعاً كل الحاجات دي بتزنقنا وتخلينا عايشين عيشة الموظفين
وعلى طول الكلمة اللي في بقه مافيش فلوس لأي حاجة إذا كان ملابس أو خروجه أو مصيف بالرغم أنه بعد ما سافر بره مرتبه كبير جداً وزملائه عايشين عيشة الملوك وبالرغم من كده يتهمني أني مش بساعده لما بيقولي مزنوق وأنا موظفة حكومة هكون بقبض كم يعني بالنسبة له ولما بقول ما معيش بيزعل ويقولي أنت عازلة نفسك عن البيت وأبويا وأمي ماكنوش بيعملوا كده زيك.
لحد في مرة طلبت منه فلوس لمدارس الأولاد رفض وقالي استلفي من مامتك بالرغم أنه كان راجع من الشغل شنطة فلوس تخنقنا يومها خناقة كبيرة وساب البيت ولا سأل فينا اتخنقت من الانتظار وسافرت أنا وأولادي ومامتي الإسكندرية نغير جو بس بصراحة ماكنتش قلت له عرف وزعل وجالنا هناك ودي أول مرة طلقنا فيها والناس ادخلوا للصلح وفي مرة اتصل هو بمامتي وكلمني قلت له تعال نرجع ونجرب ثاني علشان أولادنا
ويارتني ما قلت كده ردني ورجعنا بس طبعاً لما الناس كانوا يتدخلوا للصلح اتحكى أساس المشكلة أنها مشكلة مادية وأنها من يوم ما تجوزنا لما هو عرف الكلام ده زعل وقالي فضحتيني وأنا اللي بعمل لكم فيلا علشان نعيش في مستوى تقولي للناس في الآخر إني مابصرفش وكمان عايز فلوسك، وقعدنا مع بعض سنة كل شوية يفتكر الكلام ده ونتخانق عليه أو يتلكك ويتخانق على أي حاجة ثانية
حاجة كمان مهمة هو دماغه صعيدي ومابيتفاهمش والفكرة اللي بتدخل فيها مابتطلعش ولا بتتغير، دخل في دماغه إن الناس اللي حوالي هما اللي عايزني أطلق وهما اللي بيقوموني على الخناق معه، الناس دول أمي وأختي الكبيرة واثنتين من أصحابي
وعلشان يثبت كلامه ده راح سجلنا مكالمات بدون علمي علشان يسمعهم بيقول لي إيه طبعا أنا في المكالمات بفضفض وبشتكي منه والخناق اللي من غير سبب كلهم كانوا متعاطفين معاي ويستنكروا تصرفاته وساعات يطلع منهم ألفاظ خارجة عليه
جه في يوم واعترف لي إنه سجل المكالمات وكان ثائر جداً لدرجة إنه شتم أخواتي وأهلي كلهم وهددني أنه سيخرب بيوت أخواتي البنات كلهم وكمان الاثنتين أصحابي، وفعلا بعت لكل واحدة منهم رسائل تهديد بكلام هي قالته في المكالمات وأنه سيوصله لجوزها علشان يخرب بيتها زى ما هو فاهم إنها بتخرب بيته أنا بصراحة ما استحملتش التصرفات دي وصممت أني أطلق والمرة دي تطلقنا بورق رسمي
واحنا في العدة دلوقتي وعايز يرجعني بس أنا مش قادرة أسامحه على اللي عمله ده وفقدت الثقة فيه بس كل اللي حوالي يقنعوني أني أجرب معه ثاني وإن الفيلا قربت تخلص ولو رجعنا هنروح نعيش فيها ونبعد عن الناس اللي هو فاكرهم سبب في المشاكل وعلشان ما أحرم أولادي منه ولا من خير أبوهم وكمان أولادي صبيان بيقلولي مش هتقدري تربيهم لوحدك.
أنا مش عارفة أعمل إيه وخصوصاً إنه لحد النهاردة مش مقتنع أنه عمل حاجة غلط وعايزني أقاطع الناس دي
آسفة للإطالة وياريت تساعدوني
12/1/2018
رد المستشار
السلام عليكم ورحمة الله وبركاته
الشرع يقول حكماً من أهله وحكماً من أهلها فحكم من سيكون المستشار، سأكون من أهلك عزيزتي وأذكرك بأن الطلاق أبغض الحلال، لكن لن أنصحك بالرجوع إليه وأستغرب رغبته في العودة إليك.
مشكلاتكما مادية وأسباب تفكيرك بالعودة إليه مادية أيضا، لا شك أنه سيصبح عريس لقطة بعد أن ينتهي من بناء الفيلا التي لم تشاركي فيها ماديا،. أعرف الرواتب الحكومية بالطبع ولكن هل أنت فعلاً بلا دخل مادي آخر كالميراث مثلاً بما يمكنك من المساعدة في بعض المصروفات.
نعم سلوكه بتسجيل المكالمات وتهديده بفضح صديقاتك وعائلتك غير أخلاقي ولكن هل انشغالك بالفيلا وباقي الماديات من مصيف وخلافه أخلاقي في حين تذمين طريقة تفكيره وتصفينه بالصعيدي، ألم تكوني تعرفين أصله وطريقته بالتفكير قبل الزواج منه، هو بالنسبة لك مصدر دخل والمال ليس أساس الزواج، يلزمه الزواج بالإنفاق على الأساسيات وما تذمين منه ليس أساسيا.
نعم خدعكِ جميع من حولك حين ملأن قلبك عليه ونعتنه بالتقصير في حين يوحي سلوكه بالذكاء في استثمار ما يحصله من مال كثير لفترة تدوم مع دوام غربته ومعاناته اليومية بعيداً عنك وعن أولاده، أليست الأرض والفيلا رصيد لك ولأولادك على المدى البعيد أكثر من النزهات والمصايف.ما تقديرك لزوجك على الصعيد الشخصي والعاطفي، ما موقفك إن وقع مريضاً واضطررت لبيع الفيلا والأرض لعلاجه لا قدر الله، تشكين غضبه وعصبيته وأرها مبررة حين لا يجد منك وداً أو تقديراً.
كي تتخذي قراراً سوياً فيما يخص العودة إليه قيميه وقيمي حياتك معه بعيداً عن المال، هل تجدين فيه رجلاً يتحمل مسؤولياته، هل ترين فيه رفيق درب يؤنس حياتك، هل ترين فيه والدا يربي أولادك، هل تجدين في نفسك القدرة على الحياة بدون زواج في انتظار فراغ صديقاتك لك لبعض الوقت، هذه الأمور بعض الجوانب التي يجب عليك وضعها في الاعتبار عند اتخاذ قرارك، سأدعو الله أن يشرح صدرك وييسرك لما فيه خيرك في الدنيا والآخرة.
ويتبع >>>>: بعد الطلقة الثانية أرجع له أو لأ؟؟ م
تعليقات الأعضاء