|
| 
|
من الحشيش إلى الهلع إلى اختلال الإنية الدائم
لن أستطيع التحمل أكثر من ذلك فأرجو المساعدة..
قبل أي حاجة أنا بعتذر لأن ذي هتكون أطول رسالة حد يبعتها للموقع لكن أنتم بإذن الله هتساعدوا إنسان أنه ماينتحرش... أو ما يتجننش لأن مش ببالغ بس أنا حاسس بجحيم قسماً بالله ومش لاقي وصف غير كدا
أنا محمد 19 سنة طالب جامعي.. كنت عايش حياتي تمام والحمد لله وكنت محب للحياة اجتماعي بحب نفسي بستمتع بشخصيتي وبطريقة تفكيري ... وبخطط لحياتي كان في جانب شهواني للأسف وحب للملذات وكنت بدور على أني أستمتع لكن عمري ما كنت عدواني أو حاد الطبع كنت بسيط وطيب وفي حالي جداً وأحلامي بسيطة.
تعرضت لمشكلة من وأنا صغير وهي أني رُبيت بطريقة مغلقة وكان أبويا حادًا في معاملته معي وكانت أمي بتفصلني وتعزلني عن حاجات كثير خوفاً عليّ, كمان كنت بتعرض لقسوة عند المدرسة وأنا صغير لأني كنت غلبان زيادة عن اللزوم فكنت ممكن حد يهينني ومعرفش آخد حقي وأخاف كنت جبان جداً
ممكن يكون الموضوع ده أثر فيّ من غير ما آخد بالي لكن وقت الثانوي لما سبت المدرسة وجربت حاجات كتير وعرفت ناس ثانية مكنتش بلتفت لموضوع زمان كثير لكن كان له أثر برضه جوايا وهو أني مش هعرف أهرب من محمد صاحب الشخصية الضعيفة زمان اللي كان مبيعرفش ياخد حقه وبيخاف يتخانق ويخاف يزعق ويقلق لو أتحط في مشكلة مع حد بس وقتها مكنتش في حالة نفسية وحشة خالص وكنت بعيش حياتي تمام ..
جربت التدخين وبعدها الحشيش وكنت بحب الحشيش جداً ووقتها ابتدت ملامح المشكلة التي هتكلم عنها تظهر، أنا كان لي حد معين في الشرب مبزودش عنه خوفاً من أن يحصل حاجة يعني مكنتش بشرب كميات كبيرة وفي أوقات كثير كنت ألاحظ أن حاجة في الإحساس عامة تغيرت فأتفاعل معها وقلبي يرتجف وأقوم أرجع غصب عني يعني مفيش قابلية أو إحساس بالترجيع أصلاً وبعدها أقعد تاني مفيش أي حاجة ومديش الموضوع اهتمام خالص
وفي مرة حصلت لي حالة كانت هي بداية الجحيم بالنسبة لي وبداية المصائب كلها وكنت وقتها أثناء الشرب: (خفقان, تنميل, خوف, إحساس أني مش موجود, مستغرب شكلي وجسمي وبيتي وكل حاجة, ارتباك وظن مني أن ده الموت خلاص فبدأت أتشاهد وقلت خلاص) اليوم ده أنا هعيش لحد ما أموت وأفضل فاكره مش هنساه بكل تفاصيله
بعدها مش عارف ليه استبعدت خالص الدكتور النفسي وكنت مصمم أصنف نفسي أن الحشيش عمل حاجة في الجسم فرحت وعملت تحاليل وكشفت كل حاجة وكله قال سليم وقتها أنا شفت أيام جهنمية ومش ببالغ والله أنا شفت كمية مشاعر وأفكار غريبة ومخيفة تجيب لأعقل واحد جنان
بعدها بدأت أتعامل مع نفسي أني مراحل جنون وخلاص دي النهاية المأساوية وطبعاً من يومها لحد دلوقتي حالاً أنا بطلت تماماً وعندي فوبيا من الحشيش وأي حاجة مخدرة حتى الشيشة ساعات بخاف أشربها مع العلم أني طول عمري مجربتش غير الحشيش بس
بعدها بالصدفة من مواقع الاستشارات عرفت أني مش لوحدي وشفت كمية ناس كتير شبهي وحصل لهم شبه اللي حصل لي فتطمنت شويه، ولكن دخلت في حالة نوبات الهلع كل يوم, موضوع التبدد للشخصية والواقع وأني أقول أنا بتكلم بس مش حاسس أني بتكلم، عارف أنا بعمل إيه بس مش حاسس باللي بعمله, ساعات كنت بقول أنا عندي الزهايمر في المشاعر لكن عقلي عارف كل حاجة بكل عقلانية وعمري ما عملت تصرف غريب ولا حركات هلوسة أو شيء من هذا القبيل إطلاقا كنت عايش بجدية أوي ومراقب نفسي دايما وكان الموضوع ده مفيش غيره في عقلي وأثر عليّ في كل حاجة بس كنت شبه متأقلم بشكل بسيط بقدر آكل أشرب أهزر
كانت مشكلتي واضحة جدا وهي الخوف ومشاعر التبدد اللي بتيجي وتختفي لحد ما ظهر حاجة جديدة من 4 شهور بوظت كل حاجة ومش لاقي ليها تفسير نهائي في وقت الامتحانات أجهدت نفسي شوية وضغطي كان بيرتفع ولما عرفت كده اتشديت مع الموضوع ده وركزت معاه وبعدها دخلت في صداع يومي مبيرحش وأكشف يكتبون لي مهدئات
وقتها لاحظت أن نوبات الهلع قلت جدا وشبه اختفت وحل مكانها حاجات أصعب كرهتني في عيشتي وهي التي دفعتني أكتب الرسالة : حاسس بمشاعر غريبة في شخصيتي وفي الحياة عامة: شعور بالضيق بدرجة كبيرة, حاسس كأني (لأول مرة مش عارف أتكيف مع العيشة نهائي)
مش عارف أعمل حاجة ولا لي نفس لحاجة, حزين, محبط لدرجة أني بقول خلاص أقضي الأيام لحد ما ربنا يفتكرنى وأرتاح ودي لأول مرة تحصل لي, حاسس أني مش عارف أتحمل أي حاجة خالص, حاسس بمشاعر قهرية كأنها ملهاش وصف بس بتأثر علي أوي حاولت أصنفها مع نوبات الهلع وخلافه لكن مش مقتنع وحاسس أنها شعور جديد وغريب كاره الشارع والناس وكل حاجة, بعمل أي حاجة بالعافية, مفيش إحساس بالطمأنينة نهائي, حاسس (أني بتعذب أوي من جوايا) مفيش صبر خالص, أيام نوبات الهلع مكنتش بدرجه التعب ده إيه اللي تغير ؟ وإيه اللي حصل بوظ التكيف مع الحياة, إيه الشعور الجديد أو اللي أنا فاكره جديد ده ؟
أرجو المساعدة بالله عليكم أنا بتعذب وحدش حاسس بي ولو جت لحظة حلوة سرعان ما بتروح بسرعة عارف إن اللي أنا فيه حالة نفسية لكن من صعوبتها حاسس أنها فوق مستوى التحمل للإنسان الهلع والخوف كنت بهرب منه بأي حاجة تلهيني إنما الإحساس ده مش عارف أهرب منه خالص
بحاول أوهم نفسي أن الشعور ده جاء لي قبل كده وأنه زي التبدد مش عارف برضه وحاسس أن المشاعر التي وصفتها دي أكبر من مشاعر الخوف جوايا لكن فى قلق برضه
15/5/2018
رد المستشار
الابن الفاضل "محمد يونس" أهلا وسهلا بك على مجانين وشكرا على ثقتك، واختيارك خدمة استشارات مجانين بالموقع.
في متابعتك هذه أنت ترسل نفس مشكلتك القديمة مع إضافة بعض التفاصيل عن حياتك وعن مشاعرك، ولو أرسلتها للمستشار أ.د نبيل نعمان الذي أجاب استشارتك الأولى لرد بأنه تكرار لنفس الاستشارة.
ما تشير إليه وتصف كيف طغى في آخر فترة قبل الكتابة لنا على كل ما سبقه من أعراض مزعجة هو بوضوح اضطراب الاكتئاب الجسيم.... وهو إحدى عقابيل استعمال المخدرات، أو نوبات الهلع أو اختلال الإنية يعني يمكن أن يكون ثانويا لأي منهم ولا مانع أن يكون ثانويا لهم جميعا مثلما أرجح أنه ما حدث معك.... وقد أفاض مستشارك الأول في الشرح لك في كل من نوبات الهلع واختلال الإنية.
أشرت في منتصف الاستشارة إلى استغرابك من أنك لم تفكر في الطبيب النفساني .. وأتمنى ألا يقتصر انتباهك إلى أهمية الجانب النفسي على الكتابة لنا وقراءة ما يتيسر من الاستشارات النفسية ... إذ أنه في حالة وصول الأمر إلى الاكتئاب الجسيم كما حدث لابد من تلقي العلاج على يد طبيب نفساني حقيقي.
وأخيرا قبل أن أختتم ردي هذا عليك أشير إلى أن استشارتك لم تكن أطول استشارة ترسل إلى الموقع ولا حتى تحسب ضمن متوسطات الطول ... وهذا الشعور الكاذب يا "محمد" يا ولدي بأنك ثقيل أو ستكون ثقيلا على الآخرين هو أيضًا من علامات الاكتئاب فلا تتهاون ولا تتباطأ واطرق باب الطبيب النفساني لتبدأ العلاج، وأهلا وسهلا بك دائما على موقع مجانين فتابعنا بالتطورات.
تعليقات الأعضاء