وسواس الكمال واللا اكتمال !

وساوس الكمال

السلام عليكم، هي فكرة معينة بترسخ في دماغك ومبتعرفش تتخلص منها.. ده اللي فهمته من خلال قراءتي لموضوع الوساوس.. أنا أحب كل حاجة كاملة حرفيا الموضوع مش مسألة تنظيم وعمل كل شيء بشكل ممتاز بل الموضوع تطور إن حياتي وقفت ومش قادر أعمل أي حاجة لازم تكون كل حاجة بيرفكت جدا لا تشوبها شائبة

وإن غلطت بعيد كل حاجة من أول.. مخي ميعرفش حاجة اسمها تصحيح أخطاء، الوضوء مثلا لو حسيت إني ماشوفتش المياة على ذراعي كويس بعتبر الوضوء لاغي.. الصلاة لو حسيت ولو 1% أن قراءتي مثلا للفاتحة فيها أخطاء بعيد الصلاة من أول..

المذاكرة عمري ما خلصت كتاب في حياتي وسقطت سنة في الكلية بسبب كده وجبت مجموع في ثانوي زي الزفت بسبب كده بسبب إني مش قادر أذاكر ولو حاولت أذاكر على طول لا لا لا أنت أكيد فوت كلمة من الشابتر وبعيد تاني ولو حصلت معجزة وقدرت أخلص شابتر لما بخش في التاني بتكون طاقتي استهلكت تماما وبعد ساعة ولا حاجة بعيد تاني برضه..

صحابي كلهم خلصوا واتجوزوا وعاشوا حياتهم وأنا مش قادر أطلع من الكابوس ده وكل ده أبويا لسه بيصرف علي 24 سنة ولسه قاعد في البيت والله كاتب الرسالة دي بالعافية..

وصل بي الحال أني مرة في عز الوساوس هي بتبقى مرات شديدة ومتوسطة عمرها ما بقت منخفضة أني جيبت ألبس الشبشب فحسيت أني ملبستوش كويس وقلعت ولبست مرة تانية قعدت والله خمس دقايق أعمل كده رحت داخل ومعيط وحسيت أني أهبل خلاص.. حاولت أني أعمل حاجة زي أخلي مخي يعترف بأنه وارد أغلط فقررت أني لما أعمل حاجة أحط نسبة 10% أخطاء في أي حاجة يعني لما بآجي أصلي بقول أني لازم أغلط 10% ولو عديتها يا سيدي أبقى أعيد الصلاة..

مش هكدب وأقول الموضوع منفعش لا نفع جدا بس أرهقني تماما تماما والله تقدر تقول قعدت أسبوع أصلي كامل على نسبة الـ10% دي وفي الآخر استسلمت.. عايز أعيش حياتي زي البشر مش عايز فكرة الكمال تسيطر علي

والله بكتب ولسه متوضي للعصر ومش قادر أصلي فرض ربنا مش قادر أصليه وأبويا طول الوقت يقول لي أنت عالة وكنت هتطرد هو ميعرفش اللي جوايا أنا على طول قافل على نفسي مش قادر أواجه حد بسبب كده

أنا بس لو أتخلص من الوساوس دي والله لأنطلق وأعمل المستحيل جوايا إرادة من نار بس مش قادر والله بكتب الرسالة دي وأنا والله الدموع في عيني ده مبقاش وساوس ده بقى مرض.. بحثت على الموضوع ولقيت دواء اسمه سيروكسات 12.5 وبعد شهر 25 خدته مقدرتش أكمله حتى الدواء مقدرتش أكمله وعملي اكتئاب أصلا..

أتمنى أنك تساعدني ياللي بتقرأ الرسالة
وشكرا يا عزيزي
16/3/2019