حب الجامعة البريء والله زمان!!

حب مشكلات التعلق

أنا بنت في الـ ٢٠ من عمري طالبة بكلية تجارة أول سنة لسة، مكنش لي أصحاب أبدا وتعرفت على بنات كتير في الجلمعة وحبيتهم جدا وبقينا أخوات كمان كنت مقررة مرتيطش بأي واحد في الجامعة أبدا علشان محدش يتكلم عني أو يقول دي مش كويسة ولأن الجامعة اللي فيها مش بيحبو ويرتبطوا لا دا بيتصاحبوا وأنا مبحبش كدا أبدا، في امتحانات الترم الأول شوفت ولد في الامتحانات كان قاعد في وشي في مدرج تاني كنت ببص مرة عالدكتور وجات بالصدفة عيني في عينه مكنتش أعرفه ولا يعرفني وفضلنا طول فترة الامتحانات نشوف بعض صدفة بس كنت كل ما أبص عليه ألاقيه بيبصلي وبيفضل عيني في عينه كنت بتكسف أوي وأخبي عيني منه وهو كان بيضحك من كسوفي خلصت الامتحانات واتمنيت لو بس أعرف اسمه بس معرفتش وقعدنا أجازة

ورجعنا الترم التاني لقيت الولد دا تاني في المحاضرة معايا فرحت أوي إني شوفته بس هو بييجي يحضر ويمشي عطول ملوش في كلام كتير ولا صوت عالي ولا حاجات دي احترمته أوي قررت لسه يوم ٣١/٣/٢٠١٩ إني أعرف دا مين قولت لصحباتي وقولت لبنات كتير يعرفو دا مين بس محدش عرفه بنت واحدة عرفت اسمه وقالتلي قلت أدور عليه عجروب الجامعة وفعلا يوم ٣١ بالليل عملتله فولو على انستجرام لقيته في وقتها قبل وكلمني عطول قالي أنا عارفك على فكرة قولتله عارفة على فكرة وفضلنا نتكلم ونهزر طول الليل لتاني يوم الصبح وقالي إنه ماكانش بيبص علي صدفة في الامتحانات لا كان بيبقى قاصد وإنه كان عاوز يتعرف علي كتير بس اتحرج وقالي كنت بفضل أقول عمرها ماهتكلمك ولا تقف معاك بس أنا وقتها كنت فعلا مشدودة ليه بس كنت عاوزة أعرفه أكتر وفضلنا نتكلم ونتكلم،

وبعدها نزلنا الجامعة واتقابلنا لأول مرة وقعدنا مع بعض وهو فضل يحكيلي ويتكلم أنا كنت طايرة من الفرحة بس معرفتش أبصله أبدا اتكسفت أوي كنت ببص عليه لو مداري وشه عني واتكسف أوي لو شافني فضلنا نتكلم ونهزر وكمان روحنا مع بعض يومها هو روح مبسوط أوي وأنا كنت طايرة من الفرحة إن أخيرا قربنا من بعض وبعدها بكام يوم اعترفتله إني معجبة بيه وقال إن هو كمان بيحبني وخايف يقولي وبقينا مع بعض،

من يومين زعلنا مع بعض في الجامعة بسبب إني كنت مستنياه وهو جه حضر ونزل ومش قالي وقتها بعت كلام كتير إننا استعجلنا في قرارنا وإن نصبر شوية وإن نقفل دلوقتي وكذا حاجة شلتني في مكاني حسيت فجأة إني مش عارفة دا مين مع إنه فعلا كان مبسوط أوي وأنا مصدقاه جدا إنه حبني، بعد لما بعت كل دل وطلعت حضرت تاني ونزلنا بقى نروح لقيته بيتصل بي وبيقولي مش يالا نروح واقفه ليه أنا مستنيكي قولتله هروح مع صحباتي وكل واحد مشي وفضلنا نتكلم شات قولتله لما روحت يمكن استعجلنا خلينا نبعد أحسن وبلاش نكمل فضل يقولي لا مش هتبعدي دخلتي حياتي يومين علشان تقوليلي نبعد لا مش هتمشي

أنا ليه محدش بيستحملني ويكمل معايا حتى إنت عاوزة تسيبيني كلامه وجعني لأني حبيته ومش عاوزة أبعد بس كلمة استعجلنا ضايقتني أوي لما قالهالي، ومرضتش أبعد وكملنا قولتله إحنا أصحاب لحد ما نقرر هنعمل إيه قالي عاوزين نتكلم أكتر نتعامل مع بعض أكتر. خليكي قريبة مني وفعلا عملنا كدا وبقيت أقوله يا صديقي يا صديقي فجأة قالي متقوليش يا صديقي إحنا مش صحاب إحنا أقوى من كدا بس حاجة ملهاش مسمى أنا عارف اللي جواكي واللي جوايا بس مش أصحاب أبدا فرحت أكتر وكملت أكتر بس شخصيته غريبة أوي مبيتعاملش مع ناس كتير مبيخرجش غير كل كام شهر مرة مبيشوفش تليفزيون ولا حاجة قاعد عاللاب وبس وبعدين امبارح صورلي إنه علشان عارف إن شخصيته وحشة بيتعامل مع صفحة أون لاين لدكتور نفسي قولتله ليه كل دا هنحل كل حاجة مغ بعص أنا بحبك زي ما إنت وقابلة بعيوبك وكله هيبقى كويس قالي متأكدة قولتله أكيد وبردو بالليل بنتكلم وبقوله زعلانه منك وبهزر لقيته قالي عارفة زعلنا كام مرة من يوم ماعرفنا بعض عارفة كنا عاوزين نبعد كام مرة وقالي هقفل وسلام وفعلا قفل ولدلوقتي متكلمناش،

أنا فعلا بحبه وفعلا عاوزة أكون جمبه وأصلح حياته ونفضل سوى بس مش فاهمة هو ماله إيه اللي فيه مخليه كدا وليه مش بيحكي إيه معنى يقولي بحبك شوية وشوية مفيش مسمى للي إحنا فيه يعني إيه وعد مزعلكيش وفجأة يقفل ويقولي أنا ببوظ كل حاجة أنا مش عاوزة حلول لي أنا بس عاوزة أعرف أتصرف إزاي معاه هو بيحبني بجد ولا لا هو متلخبطة مشاعره ناحيتي ولو متلخبطة طيب ما إحنا قولنا هنقرب أكتر لحد ما نشوف هنوصل لإيه ليه فجأة بيتحول ويقول كلام بيرجع يقولي آسف ومتبعديش وأنا عصبي ويوعدني ميعملش كدا تاني أنا بجد بحبه أوي ونفسي تساعدوني أتصرف إزاي معاه وأخرجه من كل دا إزاي

أرجوكم ردو علي علطول أنا مش عايزاه يبعد ولا حتى يفضل كدا
أتصرف إزاي معاه بليز ؟
5/4/2019