حب الجامعة البريئ والله زمان!! م

حب الجامعة البريء والله زمان!!
نفسي عاطفي

أنا اسمي... عندي ٢٠ سنة بنت عادية جدا بس مليش نصيب في أي حاجة ومش بتكمل لي فرحة أبدا واتصدمت كتير في حياتي واتعالجت من سنتين نفسي ومكملتش مع دكتورة ........ في مدينة نصر وكنت بآخد نوع من المهدئات بس مش فاكرة اسمه وكانت قالت لي وقتها عندي اكتئاب حاد، دلوقتي حاسة إني اتغيرت كتير عن الأول يمكن كبرت أو عقلت وأصبح عندي أصحاب ودخلت الجامعة حياتي أصبحت أحسن عن زمان كتير ومليانة مش فاضية ومبقتش لوحدي لي صاحبات كويسين جدا، بس من فترة كدا حبيت حد معايا في الجامعة فضلت 4 شهور معرفش عنه حاجة ولا حتى اسمه بس كان كل ما يشوفني يفضل واقف ويبص لي بيستنى أتكلم وأنا كنت زيه وأكتر حبيته بس مكنتش أعرفه وكنت بتمنى يكون كويس علشان كل حاجة تكمل وتكون كويسة،

وبعدين يوم 31/3/2019 اتعرفنا على بعض وأنا اللي بدأت الخطوة دي وبعت له شات وكلمته قال لي إنه عارفني وكان عاوز يكلمني بس كان بيقول مستحيل أقبل أكلمه أو أقف معه هو أكبر مني بسنة وشاب محترم ويعرف ربنا وكان أول كام يوم من كلامنا 24 ساعة بيكلمني وقالي إنه بيحبني وأني بوحشه وأنه مش هيخبي عني حاجة وحاجات كتير حلوة كأننا ارتبطنا فعلا وأنا قلت له أني بحبه جدا من شهور فاتت وإني كنت بتمنى نتكلم وخفت وهو فرح جدا كمان وماكناش ننام علشان نفضل نتكلم ولو نمنا نصحى بسرعة نتكلم كان جمبي دايما

وقعدنا مرة في الجامعة واتكلمنا وكان مبسوط وفضل يحكي عن حياته كتير ورحنا مع بعض لحد الجمعة اللي فاتت اتغير وقال لي نكون صحاب بس وبعد أوي ومبقناش نتكلم أبدا وأنا دايما دلوقتي اللي ببدأ كلام وبقيت بحس إني تقيلة أوي على قلبه وبيتعامل معايا وحش سألته أبعد رد رد صدمني قالي أنا مبكدبش لو عاوزك تبعدي هقولك ابعدي مبتكسفش ولا بكدب، هو قال لي نكون أصحاب نفهم بعض ونتكلم أكتر ونشوف بعض إحنا منعرفش بعض ونسيب الوقت ياخدنا زي ما ياخدنا أنا مش مستعجل وبعد ما قال كدا مبقاش موجود حتى ومن يومين قال لي ارتباط وحب الموضوع مش هيكون لذيذ صحاب أحسن،

اتندمت وزعلت أوي وأنا بصراحة طبعي بعيط كتير أوي وزعلي بيبان أوي ومتسرعة وهو شاف إني متسرعة أوي كمان بس أنا حبيته والله أوي وكنت فعلا محتاجة إنه يكون سند وراجل بجد زي ما اتمنيت قبل ما أعرف اسمه حتى بس اتغير أوي بجد وفعلا حسسني إنه مش عاوزني ورافض أحبه بس قالي مش هقولك محبتكيش لا حبيتك بس خلينا نعرف بعض إزاي هنعرف بعض وإحنا ما بنتكلمش ولا بنشوف بعض في الجامعة كأننا 2 ميعرفوش بعض ليه اتغير كدا وهل أنا تسرعت أو مزوداها هو قالي إنه مر بمشاكل كتير صدمته ومحتاج وقت وفجأة طريقته بقت وحشة أتصرف إزاي أنا بجد بحبه ومبعرفش أقول لولد إحنا صحاب معنديش المبدأ دا أتصرف إزاي والله حبيته أوي

أرجو الاهتمام بالسؤال
أنا فعلا عقلي هيتشل من التفكير وتعبت من العياط والزعل
8/4/2019

*وكررت صاحبة الاستشارة إرسالها مرة أخرى تحت عنوان : حب love بنفس التاريخ
8/4/2019